ဘဝတကွေ့မှ ဆရာတော်များ
မောင်လူပေက ဘုန်းကြီးအမျိုးပါ။ အမေ့ဖက်က တော်စပ်ရတဲ့ အဖိုးလေးနှစ်ပါးက ရွှေကျင်ဂုဏ်းမှာ ဆရာတော်ကြီးတွေအဆင့် ညီအကိုအရင်းတွေပေါ့။ အကိုကြီးက ဗာရာဏသီဆရာတော်လို့အမည်ထင်ရှားသလို ညီငယ်ဖြစ်သူကလည်းမေမြို့ဆရာတော်လို့ ထင်ရှားပါတယ်။
ဆရာတော်ကြီးတွေရဲ့မြေးမို့ အရေးပေးလည်း ခံခဲ့ရဖူးပါတယ်။ ဗာရာဏသီဆရာတော်ကြီးကို ချစ်ကြသလို သူ့မြေးကိုလည်း ချစ်ကြတယ်။ အမေက ဆရာတော်ကြီးရဲ့တူမတော်စပ်ပါတယ်။ အမေရဲ့အမေ(အမေကြီး)က အမေနဲ့အတူနေတာမို့ ဒီဆရာတော်ကြီးတွေ တောင်ငူကြွလာတိုင်း သူတို့အမတော်ကြီးဆီကို ရောက်အောင်လာလေ့ရှိပါတယ်။
ဆရာတော်ကြီးတွေကြွလာပြီဆိုရင် အမေကြီးက ခရီးဦးကြိုပြီးတာနဲ့ ငိုတာပါပဲ။ သူ့မောင်တွေကို လွမ်းတာရယ်၊ သူ့ရပ်သူ့ရွာကို လွမ်းတာရယ်ကြောင့်ပါ။ ဆရာတော်ကြီးတွေက သူတို့အမတော်ကြီးအငိုရပ်တဲ့အထိစောင့်၊ ပြီးရင် တရားသေချာဟောပြကြတယ်။
အမေတို့ရွာက မကွေးတိုင်း၊သရက်ခရိုင်၊ အောင်လံမြို့၊ ရွှေပန်းတောတိုက်နယ်၊ ဇိန့်ရွာ တဲ့။ ရိုးမတောင်ခြေအနီးက အလွန်ခေါင်လှတဲ့ရွာကလေးပါ။ အနီးမှာ ချင်းရွာကလေးတွေရှိတယ်။ အရင်အခါကဆိုရင် သွားရေးလာရေးအလွန်ခက်ပေ့ါ။ အနီးဆုံးဖြစ်တဲ့အောင်လံမြို့နဲ့ မိုင်နှစ်ဆယ်ပဲ ဝေးပေမဲ့ လေးငါးနာရီသွားကြရတယ်။ အခုခေတ်မှာတော့ ဆိုင်ကယ်တွေတန်ခိုးနဲ့ သွားလာရေး တိုးတက်လာပြီး အတော်စည်ကားနေပြီလို့သိရတယ်။
ဇိန့်ရွာဆိုတဲ့နာမည်က အဆန်းသား။ ဒုတိယအင်္ဂလိပ်မြန်မာစစ်ပွဲ ပြီးတဲ့နောက်မှာ အင်္ဂလိပ်က မြေထဲ(အောင်လံ)အထိ သိမ်းပိုက်ခဲ့တယ်။ မူလမြို့ဝန်ကိုပဲ မြေထဲမြို့ဝန်ခန့်ပါတယ်။ ဒါပေမဲ့ မြန်မာဘုရင်ကိုသာ သစ္စာခံတဲ့မြေထဲမြို့ဝန်က သူ့ကျွန်မခံပြီဆိုတဲ့ စိတ်နဲ့ သူ့ရဲ့ဆွေမျိုးတစ်စုကိုအကုန်ခေါ်ပြီး မြေထဲနဲ့အဝေးဆုံးမှာရှိတဲ့ သူ့ရဲ့သစ္စာခံ ချင်းရွာလေးတွေနားမှာ ရွာတည်ခဲ့ရာက ဖြစ်တည်လာတဲ့ ရွာကလေးပေါ့။ ရွာအမည်ကိုလည်း အောင်မြေဆိုတဲ့နာမည်ဖြစ်အောင် ဇိန့်လို့ပေးခဲ့လေတယ်။ ပါဠိဘာသာနဲ့ ဇိန ဆိုတာ အေင်မြင်ခြင်းလို့ အဓိပ္ပါယ်ရှိပါတယ်။
ဒီလိုရွာကလေးမှာ ဗာရာဏသီနဲ့မေမြို့ဆိုတဲ့ ဆရာတော်နှစ်ပါးကို မွေးဖွားခဲ့တယ်။ ဆရာတော်တွေရဲ့မိဘနှစ်ပါးက ဦးစံတူးနဲ့ ဒေါ်ဆေး တဲ့။ ဗာရာဏသီဆရာတော်က မွေးချင်းဆယ်ယောက်မှာ သုံးယောက်မြောက်ဖြစ်ပြီး မေမြို့ဆရာတော်က အငယ်ဆုံးပါ။
မောင်လူပေရဲ့အမေကြီး(အဖွား) ပြောပြဖူးတာ မှတ်မိသလောက်ကတော့ ဆရာတော်တွေရဲ့မယ်တော်ကြီးဒေါ်ဆေးရဲ့ညီအမတွေက ဒေါ်ကွမ်း၊ ဒေါ်ထုံး လို့ ခေါ်ကြသတဲ့။သူတို့ကြိုက်လို့ စားကြတဲ့ ကွမ်းယာထဲထည့်ရတဲ့ အမည်တွေပေ့ါ။ ရှေးက မြန်မာ့ဓလေ့။ ဒေါ်ဆေးရဲ့သမီးတွေက မသင့်ယုံ၊ မမွှေးယုံ၊ မတွေးယုံ တဲ့။ အမေကြီးနာမည်က မချစ်ယုံ ပါ။ ညီအမတစ်တွေကို နာမည်တွေမှာ ယုံပါအောင် အမည်ပေးထားကြတယ်။
ဗာရာဏသီဆရာတော်ရဲ့ ငယ်အမည်က မောင်ကျော်ယုံ လို့ခေါ်တယ်။ (ရွှေကျင်သာသနာ နှစ် ၁၅၀ စာအုပ်ထဲမှာ သေးသေးတင်ကျန်ခဲ့လို့ မောင်ကျော်ယု ဖြစ်နေတယ်။ စာရိုက်တဲ့သူအမှား ဖြစ်မှာပါ။) မန္တလေးက မဟာဝိသုဒ္ဓါရုံကျောင်းသစ် စည်ရှင်ဆရာတော်ထံတပည့်ခံရင်း သာသနာတော်ထဲရောက်ခဲ့တယ်။ စံကင်းဆရာတော်ကြီးရဲ့ တပည့်လည်း ဖြစ်ခဲ့တယ်။ ပထမကျော်ဆိုတဲ့ ပထမဆု လေးခါရဖူးသလို သကျသီဟ ဓမ္မာစရိယတန်းမှာလည်း ဒုတိယရခဲ့တဲ့အထိ ပညာထူးချွန်သူမို့ အိန္ဒိယနိုင်ငံရှိ ဗာရာဏသီမြို့ကို ပါဠိ၊ သက္ကတ ဘာသာတွေသင်ကြားဖို့ စေလွှတ်ခဲ့ရာက ဗာရာဏသီဆရာတော်အဖြစ် အမည်တွင်ခဲ့တယ်။ သက္ကတဟိန္ဒီဘာသာ မဟာဝိဇ္ဖာဘွဲ့ကို ရယူလာခဲ့ပြီးမှ မြန်မာပြည်ကို ပြန်ကြွလာပါသတဲ့။
ဗာရာဏသီကို ကြွတော့ ဆရာတော်ရဲ့ ကျောင်းသားအဖြစ် လိုက်ပါသွားသူက အမေကြီးရဲ့သားကြီးမောင်စံသိမ်းပါ။ မောင်လူပေရဲ့ဦးကြီးပေါ့။ ဦးကြီးက အန္ဒိယမှာ လေးတန်းကနေ ခုနှစ်တန်းအထိ နေခဲ့ပါတယ်။ ဆရာတော်ကြီးက သူ့တူကို သူ့လိုပဲ သာသနာ့အမွေခံ ရဟန်းတစ်ပါးဖြစ်စေချင်ခဲ့တာတဲ့။ အမေကြီးကလည်း ရဟန်းမယ်တော်လုပ်မဟဲ့လို့ စိတ်ကူးခဲ့ဟန်တူပါရဲ့။ မြန်မာပြည်ပြန်ရောက်ပြီးမကြာခင် ဦးကြီးက ဗိုလ်သင်တန်းတက်ဖို့ တပ်ထဲဝင်သွားလို့ အမေကြီးမှာ အတော်စိတ်မကောင်းဖြစ်ရသတဲ့။ "မင်းဦးကြီးက လူသတ်ဖို့ ဝါသနာပါတဲ့အတွက် ရဟန်းတွေနဲ့နေရင်း စစ်ထဲလိုက်သွားတာ"လို့ သူ့မြေးဖြစ်တဲ့ မောင်လူပေကို အမေကြီးက ပြောပြဖူးတယ်။ ဘုန်းကြီးကျောင်းသားဘဝကနေ စစ်ဗိုလ်ဖြစ်ခဲ့တဲ့ ဦးကြီးကလည်း တပ်မတော်မှာ တပ်ရင်းမှူးဖြစ်တဲ့အထိ ပုတီးစိတ်လွန်းလို့ ရသေ့စံသိမ်းလို့ အမည်ပေးခံခဲ့ရသူပါ။
ဗာရာဏသီဆရာတော်ကြီးကို ပြည်မြို့သို့ ပင့်ဆောင်ကိုးကွယ်ခဲ့သူကတော့ ရန်ကုန်ကဒေါ်သိန်းတင်လမ်းအမည်ပိုင်ရှင်ဖြစ်တဲ့ သခင်မကြီးနဝင်းဒေါ်သိန်းတင်ဖြစ်တယ်။ ပြည်မြို့က မဟာဝိသုဒ္ဓါရုံတိုက်သစ်ကျောင်းအမကြီးပေါ့။ ဒီကျောင်းကြီးမှာ မောင်လူပေ ရှင်ပြုခဲ့ရတယ်။ ငါ့မြေးကို ငါ့ကျောင်းမှာရှင်ပြုရမယ်လို့ ဆရာတော်ကြီးက မှာလို့ တောင်ငူကနေ တကူးတက သွားရှင်ပြုရတာလို့ အမေတို့ကပြန်ပြောပြဖူးတယ်။ ရှင်ပြုပွဲကို ကျောင်းအမကြီးဒေါ်သိန်းတင်လည်း တက်ရောက်လာတယ်။ ဆရာတော့မြေးက ခပ်သွက်သွက်မို့ ချစ်သွားပုံလည်းရတယ်။
တောင်ငူမြို့ကြီးရပ်က မဟာဝိသုဒ္ဓါရုံကျောင်းသစ်နဲ့ မြို့ထောင့်ကျောင်းတို့မှာ တလှည့်စီကျင်းပတဲ့ မြို့နယ်လုံးဆိုင်ရာ ရွှေကျင်စာပြန်ပွဲရောက်ရင် ဆရာတော်ကြီးတွေ တောင်ငူကိုကြွလာလေ့ရှိတယ်။ နှစ်စဉ်အမြဲကြွတဲ့ဆရာတော်ကြီးတွေထဲမှာ မန္တလေးကပိုက်ကျုံးဆရာတော်ကြီးလည်း ပါတယ်။ ရွှေကျင်ဂုဏ်းရဲ့ ဒုတိယသာသနာပိုင်၊ နိုင်ငံတော်သြဝါဒါစရိယ၊ အဘိဓဇ မဟာရဋ္ဌဂုရု ဆရာတော်ကြီးပါ။ သူကလည်း မောင်လူပေကိုချစ်လို့ ဗာရာဏသီမြေးလို့ ခေါ်လေ့ရှိတယ်။ ဒီဆရာတော်ကြီးတွေဟာ အလွန်ကို ရိုးသားသလို နိုင်ငံရေးနဲ့လည်းကင်းအောင် နေတတ်ကြတဲ့ဆရာတော်ကြီးတွေမို့ အလွန်ကြည်ညိုစရာကောင်းပါတယ်။
တပ်မတော်စစ်ခေါင်းဆောင်ကြီးတွေက သူတို့အာဏာတည်မြဲရေးအတွက် ဘုန်းတော်ကြီးတွေကို ချီးမြှောက်ပေးပြီး ချဉ်းကပ်တဲ့အစဉ်အလာရှိတယ်။ စစ်တပ်အာဏာသိမ်းပြီးမကြာခင် မန္တလေးမဟာမုနိဘုရားကြီးအရေးအခင်းဖြစ်တော့ တိပိဋကဆရာတော်အပါအဝင် ဆရာတော်တွေအတော်များများ အဖမ်းခံရပြီးနောက်မှာ ဆရာတော်ကြီးတွေကို မန်းလေးနန်းတွင်းထဲပင့်ပြီး လစဉ်လိုလို သြဝါဒခံပွဲတွေ ကျင်းပခဲ့တယ်။ ရွှေကျင်ဂုဏ်းရဲ့ အကြီးအမှူး၊ နိုင်ငံတော်သြဝါဒါစရိယဆရာတော်တစ်ပါးမို့ ပိုက်ကျုံးဆရာတော်ကိုလည်း အမြဲပင့်သတဲ့။ ဆရာတော်က တစ်ခါမှ မကြွဖူးတဲ့။ ဘယ်လိုပင့်ပင့် မကြွတော့မှ နောက်ပိုင်းမှာ မပင့်တော့ဘူးလို့ ဆရာတော်ကြီးကမိန့်ဖူးတယ်။
" ဘုန်းကြီးတွေ သြဝါဒပေးတယ်ဆိုတာ နာခံတဲ့သူမှ ပေးရတာ၊ ဒီကောင်တွေက ဘယ်လိုသြဝါဒပေးပေး နာခံမဲ့သူတွေမဟုတ်ဘူး။ တိပိဋ္ဋကတောင် ထောင်ထဲထည့်ထားတာ။ သူတို့လုပ်ချင်ရာလုပ်ကြမှာပဲ။ တို့ပေးတဲ့သြဝါဒကိုမနာခံရင် ပေးတဲ့ဘုန်းကြီးလည်း မကောင်းဘူး။ သူတို့လည်းငရဲရတယ်။ ဒါကြောင့် မကြွတာ။" လို့ ဆရာတော်ကြီးအမိန့်ရှိတာ မှတ်သားဖူးခဲ့ပါတယ်။ ပြည်သူကို ဘာသာရေးနဲ့စည်းရုံးဖို့ကြိုးစားတဲ့ စစ်ဗိုလ်ချုပ်ကြီးတွေရဲ့လှည့်ကွက်ကို ကြိုမြင်တဲ့ဆရာတော်ကြီးပါပဲ။
ဗာရာဏသီဆရာတော်ကြီးကလည်း ပိုက်ကျုံးဆရာတော်ကြီးလိုပဲ ရွှေကျင်ဂုဏ်းရဲ့ ဒုတိယသာသနာပိုင်၊ နိုင်ငံတော်သြဝါဒါစရိယ၊ အဘိဓဇမဟာရဋ္ဌဂုရု ဆရာတော်ကြီးပါ။ ဗာရာဏသီဆရာတော်ကို အဘိဓဇ မဟာရဋ္ဌဂုရုဘွဲ့ပေးတဲ့နှစ်မှာ ဆရာတော်ကြီးတစ်ပါးတည်းသာ ဒီဘွဲ့ရသူဖြစ်လို့ ဆုပေးပွဲတက်လာတဲ့ စစ်ခေါင်းဆောင်ကြီးတွေကို သြဝါဒပေးဖို့ ဖြစ်လာတယ်။ အဘိဓဇမဟာ
ဋ္ဌဂုရုဘွဲ့ရတဲ့ဆရာတော်က သြဝါဒပေး
တာ အစဉ်အလာပါ။ ဒီအစဉ်အလာကို ဗာရာဏသီဆရာတော်ကြီးက မလိုက်နာခဲ့ဘူး။ ကမ္ဘာအေးလှိုင်ဂူမှာ ကျင်းပတဲ့ ဆုပေးပွဲမှာ သြဝါဒကထာကို ကိုယ်စားဆိုပြီး အခြားဆရာတော်တစ်ပါးကိုသာ ဖတ်ကြားစေခဲ့တယ်။ ဗာရာဏသီဆရာတော်ကြီးက ထိုင်ရာကမထခဲ့။ ပိုက်ကျုံးဆရာတော်ထုံးနှလုံးမူပြီး 'ဆုံးမလို့မရမဲ့သူတွေမို့ ဘယ်လိုဆုပေးပြီး ချီးမြှောက်သော်လည်း ဆုံးမသြဝါဒမပေးဘူး' လို့ ဆန္ဒထုတ်ဖေါ်ခဲ့တဲ့ သဘောပါပဲ။
ဗာရာဏသီဆရာတော်ကြီးရဲ့ညီတော်ဖြစ်တဲ့ မေမြို့ဆရာတော်ကြီးလည်း ထိုနည်းလည်းကောင်းပါ။ နိုင်ငံတော်က အဂ္ဂမဟာပဏ္ဍိတဘွဲ့ချီးမြှင့်တဲ့အခမ်းအနားကို မတက်ရောက်ခဲ့ဘူး။ ဒါကြောင့် မန်းလေးတိုင်းမှူးဗိုလ်ချုပ်ထွန်းကြည်က ကျောင်းအထိလာပြီး ဆက်ကပ်ရတယ်။ " ဒီဗိုလ်ချုပ်တွေက ငါတို့ဘုန်းကြီးတွေကို အသုံးချနေတာ။ ကျောင်းလာပြီး တီဗီတွေလှူတယ်။ ဘုန်းကြီးနဲ့ဘီးလိုပဲ တီဗီဆိုတာမအပ်စပ်ဘူး။ ဒါကြောင့် မလိုအပ်ဘူးလို့ပြောလိုက်တယ်။" လို့ မိန့်ဖူးတဲ့ဆရာတော်က ဘွဲ့သွားမယူရခြင်းအကြောင်းကို မောင်လူပေကိုပြောပြတာကတော့ " ဟိုရှေးခေတ်က အဂ္ဂမဟာဏ္ဍိတဘွဲ့ဆိုတာ နှစ်စဉ်တိုင်းမှာ တကယ်တော်တဲ့ဆရာတော်ကြီးတစ်ပါးနှစ်ပါးကိုပဲ ထိုက်တန်လို့ ချီးမြှင့်တာ။ အခုဟာက သူတို့နဲ့ပတ်သက်ရင် အကုန်ရနေတဲ့ခေတ်။ ဒကာတွေက သူတို့ဘုန်းကြီးကို ဘွဲ့ရစေချင်လို့ လာဘ်ပေးပြီးဘွဲ့ ရတာကတမျိုး။ ဒီလို အုတ်ရောရော ကျောက်ရောရော ဘွဲ့တွေပေးနေတဲ့ခေတ်မှာ ငါ့လာပြီးပေးတော့ ဒီလိုပဲလို့ အထင်ခံရလိမ့်မယ်။ ငါကတောင်းတာမဟုတ်ပဲ သူတို့ဟာသူတို့ပေးတာ။ ဒါကြောင့် သူတို့ဆီမှာ ဆုသွားမယူနိုင်ဘူး။ ပေးချင်ရင် ငါ့ကျောင်းလာပြီးပေးလို့ ပြောလိုက်တယ်။" တဲ့။
ဒီလို ပြတ်သားရဲရင့်လှတဲ့ ဆရာတော်ကြီးတွေ မြန်မာပြည်ရဲ့ သာသနာမှာ ရှိခဲ့ပါကြောင်း မှတ်တမ်းတင်ရင်းနဲ့ ဘဝနတ်ထံပျံလွန်ခဲ့ကြပြီဖြစ်တဲ့ဆရာတော်ကြီးများကို လက်ဆယ်ဖျာထိပ်မှာမိုးလို့ ရှိခိုးကန်တော့အပ်ပါတယ်။
သာသနာတော်သန့်ရှင်းတည်တံ့ ပြန့်ပွားရေးအတွက် ရည်စူးလျှက်ပါ။
ချစ်တဲ့
မောင်လူပေ
( ဓါတ်ပုံများက ရွှေကျင်နိကာယ နှစ်(၁၅၀)ပြည့် သာသနာ့မော်ကွန်းစာအုပ်ထဲကပါ။)
No comments:
Post a Comment