ဆန်ဖရန်စစ္စကို (စ-ဆုံး)

ဆယ်ပိုင်းပေါင်းပြီး ဖတ်ဖို့

ဆန်ဖရန်စစ္စကို

အမိမြေနှင့် မိုင်သောင်းချီဝေးသောမြို့။ ငယ်ငယ်ကကြည့်ခဲ့ဖူးသည့် Take me Away ဆိုသော ဂျပန်ရုပ်ရှင်ထဲမှာ မြင်ဘူးတဲ့မြို့။ ဟောလိဝုဒ်ရုပ်ရှင်တွေထဲမှာ မကြာခဏ ပါတဲ့မြို့။

ဒီမြို့ကို ၁၉၉၆မှာ စတင်ရောက်ဖူးသည်။ တောင်ကုန်းတွေအပြည့်နဲ့မြို့မို့ လမ်းတွေက အတက်အဆင်းကြမ်းသည်။ ဝါယာကြိုးကြီးနဲ့ ရွေ့လျှားတဲ့ ကေဘယ်လ်ကား ဆိုတာကြီးလည်းတွေ့သည်။ မြို့ပတ်ရထားစီးသည်။ တရုတ်တန်းသွားသည်။ အမှတ်တရ ဓါတ်ပုံရိုက်သည်။ ဒီမြို့မှာ အလုပ်သမားဖြစ်မည်ဟု ယောင်လို့တောင် အိပ်မက်မမက်ခဲ့။ ဒီမြို့အကြောင်းလည်း ဘာမျှမသိခဲ့။

ဆန်ဖရန်စစ္စကိုတဝိုက်မှာ စတင်နေထိုင်သူများသည် အိုလိုနီ(Ohlone) အမည်ရှိသော ဌာနေအင်းဒီယန်း(Native Indian) တို့ဖြစ်၍ ဘယ်အချိန်ထဲက ရောက်နေကြသည်မသိ။ အနည်းဆုံးတော့ နှစ်ပေါင်းသောင်းချီမည်။ ခရစ်တော်မပေါ်မှီ နှစ်သုံးထောင်ခန့်(3000 BC) ကနေထိုင်ခဲ့ကြသည့်အထောက်အထားတွေတော့ တွေ့ရှိခဲ့ပြီ။ သူတို့ကို အာရှအလယ်ပိုင်းမှ ရောက်ရှိလာကြသော လူတွေဟု ယူဆကြသည်။ အုပ်စုလေးတွေဖွဲ့ကာ နေကြသည်။  ထိုအာရှသားတို့ပင် အမေရိကတိုက် အနှံ့ပျံ့နှံ့နေထိုင်ကြကာ မာယာ(Maya)လူ့အဖွဲ့အစည်းကြီးကို တည်ထောင်ခဲ့ကြ၏။ အမေရိကတိုက်၏ မူလပိုင်ရှင်များမှာ သူတို့ဖြစ်ကြသည်။

ဒုတိယရောက်လာသူများကား ဥရောပတိုက်သားစပိန်များပင်။ စပိန်ဘုရင်အတွက် အိန္ဒိယတိုက်သို့သွားသော ပင်လယ်ရေလမ်းခရီးရှာဖွေရင်း မျက်စိလည်လမ်းမှားကာ အမေရိကတိုက်ကို ကိုလံဘတ်တွေ့ပြီးနောက်ပိုင်း ဥရောပသားတွေ နယ်မြေသစ်ရှာဖွေရန် ခြေဆန့်ကြသည်။သာသနာပြုမစ်ရှင်တွေကို အကြောင်းပြုကာ ဒီနေရာသို့ ပထမဆုံး ရောက်လာသည်က ဟိုဆေး(José) မိုရာဂါ(Moraga) နှင့် ဖရန်စစ္စကို( Francisco) တို့သုံးဦးသား။ နေရာသစ်ကို စိန့်ဖရန်စစ်(St Francis) အားဂုဏ်ပြုသည့်အနေဖြင့် ဆန်ဖရန်စစ္စကို(San Francisco) ဟု အမည်သညာ ပေးကြလေ၏။ ၁၇၇၆ခုနှစ် ဇွန်လ လေးရက်နေ့တွင် နာမည်သစ်နှင့်အတူ စပိန်လက်အောက် ရောက်ခဲ့ပြန်သည်။

ထိုအချိန်တွင် ကယ်လီဖိုးနီးယားပြည်နယ်တစ်ခုလုံးမှာ လူအနည်းငယ်သာရှိသည့်အတွက် ဆန်ဖရန်တစ်ဝိုက်မှာ ကျီးနှင့်ဖုတ်ဖုတ်အခြေအနေ။ အနေအထားပြောင်းချင်တော့ ဒီဒေသကြီးတစ်ခုလုံးသည် ၁၈၂၁တွင် စပိန်လက်အောက်မှ မက္ကဆီကိုအောက်ရောက်လာခဲ့သည်။ ထိုမှတဖန် ၁၈၄၈ခုနှစ်တွင် အမေရိကန်ပြည်ထောင်စုအောက်သို့ ရောက်လာ၏။

ထိုအချိန်အထိ မည်သူမျှ စိတ်မဝင်စားသည့်အနေအထား။ မြေပြင်ပေါ်မှာလည်း သစ်ပင်ကြီးတွေကလွဲလို့ ဘာမျှမရှိ။မမြင်ရသည့်  မြေအောက်တွင်တော့ ရွှေကြောကြီးတွေအပြည့်။ ဒီရွှေကြောကြီးက ပဲ့ထွက်လာသော ရွှေသားအပဲ့အပိုင်းအစတွေကို မတော်တဆတွေ့သွားရာမှ ရွှေပြည်နယ်(Golden State)အဖြစ် နာမည်ကြီးကာ ကယ်လီဖိုးနီးယားပြည်နယ်မြောက်ပိုင်းသို့ ရွှေရှာကြမည့်လူများ အလုံးအရင်းဖြင့် ဝင်လာကြသည်။ ၁၈၄၉မှာ အများဆုံးရောက်လာကြ၍  ၄၉သမား( 49ers) တွေဟု ခေါ်ကြပါ၏။

ဒီလူတွေအတွက် ဆန်ဖရန်စစ္စကိုသည် ပျော်စရာနေရာဖြစ်ဖို့ ဖန်တည်းခဲ့သည်။ ၁၈၄၈ခုနှစ်က လူဦးရေတစ်ထောင်သာရှိသောဆန်ဖရန်စစ္စကိုသည် နောက်တစ်နှစ်ဖြစ်သော ၁၈၄၉တွင် လူနှစ်သောင်းခွဲအထိ တိုးပွားလာခဲ့ရာမှ ၁၈၅၀တွင် တရားဝင်မြို့အဆင့်သို့ ရောက်လာသည်အထိ။ ထိုနှစ်မှာပင် ကယ်လီဖိုးနီးယားပြည်နယ်သည်လည်း အမေရိကန်ပြည်ထောင်စု၏ ဖက်ဒရယ်ပြည်နယ်တစ်ခုအဖြစ်တရားဝင် သတ်မှတ်ခံရခြင်းဖြစ်လေသည်။

ဆန်ဖရန်စစ္စကို၏ စည်ကားမှုက မယုံနိုင်စရာ။ ရွှေတူးပြီး ချမ်းသာဖို့စိတ်ကူးယဉ်အိပ်မက်ကိုယ်စီနှင့် အမေရိကန်ပြည်ထောင်စုအနှံ့မှ ရောက်လာကြသူအပေါင်းကြောင့် ရွာသိမ်လေးဘဝမှ မြို့အဖြစ်ရုပ်ချည်းပြောင်းခဲ့ခြင်းဖြစ်သည်။

မြို့ကွက်တွေအမြန်ဖေါ်၊ အမြန်ရောင်း၊ ရေ၊မီး၊ မိလ္လာ၊ ဘာမှပြည့်စုံအောင် မရှိခဲ့။ ခါတော်မှီကန်ထရိုက်တွေဆောက်ပေးသော အရည်အသွေးမမှီ အထပ်မြင့်တိုက်တွေ အစီအရီပေါ်လာသည်။ စီစစ်နိုင်မှုအားနည်းတော့ ဖြစ်သလိုဆောက်ကြသည့် အရည်အသွေးနိမ့်အိမ်တွေအများကြီး။ လမ်းတွေကကျဉ်း၊ မြင်းလှည်းပင် ဝင်ရထွက်ရခက်သည်အထိ။

ဒါတွေက အရေးမကြီးလှ။ မြို့တော်ဘဝပြောင်းတော့ အနယ်နယ်ကလူတွေစုံသည်။ ရွှေတွင်းတူးသူတွေက ရွှေစတွေသယ်လာ၊ ရောင်းချပြီးငွေရွှင်တော့ သုံးဖြုံးကြသည်။ နယ်စုံက ဒုစရိုက်သမားတွေရောက်လာသည်။ တည်းခိုခန်းတွေအစီအရီပေါ်လာသည်။ အပျော်မယ်တွေ၊ ဇိမ်ခန်းတွေ၊ အရက်ဘားတွေ၊ အနှိပ်ခန်းတွေ၊ လောင်းကစားဝိုင်းတွေ လက်ညှိုးထိုးမလွဲဖြစ်လာသည်။ လပ်စ်ဗေးဂတ်(Las Vegas) မရှိသေးခင်က ဆန်ဖရန်စစ္စကိုသည် ထိုမြို့အလား စည်ကားခဲ့၏။ ငွေကိုသာရေလိုသုံးရင် တပြည်လုံးမှာ လုပ်သမျှတင့်တယ်ပေါ့။ ရွှေတူးသမားတွေအများစုကတော့ အပျော်အပါးပေါတဲ့မြို့မှာ ရလိုက် သုံးလိုက် ကုန်လိုက်နှင့်ပင် လုံးပါးပါးကြသည်ဟု ဆိုသည်။ စုမိဆောင်းမိသူ အနည်းငယ်မျှသာ။

ချမ်းသာဖို့အာမခံချက်က အတော်ကြီးတော့ အနယ်နယ်က ဆိုက်ရောက်လာသည့် လှေသဘောင်္မှ သဘောင်္သားများလည်း ရေပျော်ဘဝကိုစွန့်ခွာကာ ရွှေမိုင်းရှိရာဆီခရီးနှင်ကြသည်။ သဘောင်္သားမရှိတော့၍ ဆိပ်ကမ်းမှာသောင်တင်ပြီးကျန်ခဲ့သည့်သဘောင်္အစင်းရေ ငါးရာခန့်အထိရှိခဲ့၏။ ထိုသဘောင်္များသည်လည်း ပင်လယ်ကွေ့တဝိုက်ကျောက်ချထားရင်း၊ စတိုခန်း၊ တည်းခိုခန်းစသည်ဖြင့် ဘဝပြောင်းကြရသည်။

ရွှေဝယ်သူ၊ရွှေရောင်းသူ၊ ငွေပို့လိုသူတွေ စည်ကားလှတော့ ဘဏ်လုပ်ငန်းတွေ အတော်အဆင်ပြေကြသည်။ အမေရိကန်ပြည်ထောင်စု၏ နာမည်ကျော်ဘဏ်ကြီးများဖြစ်သည့် Well Fargo, Bank of America စသည်တို့သည် ဆန်ဖရန်စစ္စကိုမှာ စတင်တည်ထောင်ကြီးပွားခဲ့ခြင်းဖြစ်၏။ ၁၈၇၀မှ ၁၉၀ဝပြည့်နှစ်များအထိ ဆန်ဖရန်စစ္စကိုသည် အမေရိကန်ပြည်ထောင်စု အနောက်ဖက်ကမ်းတွင် အကြီးဆုံးမြို့ ဖြစ်ခဲ့သည်။ ကယ်လီဖိုးနီးယားပြည်နယ် လူဦးရေစုစုပေါင်း၏ လေးပုံတစ်ပုံလောက်မှာ ဆန်ဖရန်စစ္စကိုတွင် နေခဲ့ပါ၏။

သည်လိုမြို့ကြီးဖြစ်လာသည်က ရွှေတူးလုပ်ငန်းတစ်ခုတည်းကြောင့်မဟုတ်။ ၁၈၆၉တွင် ပစိဖိတ်မီးရထားလမ်းက အမေရိကန်ပြည်ထောင်စု အရှေ့ဖက်မှ အနောက်ဖက်ကမ်းအထိ ရောက်ရှိလာသောကြောင့်လည်းပါသည်။ ဆန်ဖရန်စစ္စကိုသည် ကုန်သွယ်ရေကြောင်းမှဝင်လာသောပစ္စည်းများကို ဖြန့်ချီရာ ကုန်သွယ်မြို့လည်း ဖြစ်လာခဲ့၏။ စီးပွားရေးလုပ်ငန်းရှင်များကလည်း စက်ရုံများတည်ထောင်ရာ ကမ္ဘာကျော် ဂျင်းဘောင်းဘီတံဆိပ်ဖြစ်သော လီဗိုက်( Levi Strauss), ချော့ကလက်ကုမ္ပဏီကြီးများဖြစ်သည့် Ghirardelli, Domingo တို့ ပေါ်ပေါက်လာသည်။

ပစိဖိတ်မီးရထားလမ်းဖေါက်သည့်အချိန်မှာ အလုပ်သမားရှားပါးသဖြင့် တရုတ်ပြည်ကွမ်တုန်၊ ရှန်ဟိုင်းစသည့်မြို့များသို့သွားကာ အချိန်ပိုင်းလုပ်သားများအား စုဆောင်းခဲ့ရာမှ တရုတ်အလုပ်သမားများသောင်းချီပြီးရောက်လာကြသည်။ ထိုသူတွေမှာလည်း မီးရထားလမ်းဖေါက်လုပ်ရေးပြီးဆုံးသောအခါ ရွှေတွင်းအလုပ်သမားတွေ ဖြစ်လာကြသည်။ ဆန်ဖရန်မှာစတင် အခြေချကြသည်။ ဤသို့နှင့် ဆန်ဖရန်စစ္စကိုမြို့လယ်တွင် တရုတ်တန်း(China Town) ကို ၁၈၇၀တွင် စတင်တည်ထောင်ခဲ့ကြ၏။ မြို့၏(၈%) သည် တရုတ်လူမျိုးများဖြစ်ကြသည်။ ( ယခုတော့ ၂၀%အထိ တိုးပွားနေပါပြီ။)

တောင်ကုန်းတွေများသောမြို့မို့ မြင်းလှည်းများသွားလာရေးတွင် အခက်အခဲရှိ၏။ အလွန်မတ်စောက်သောတောင်ကုန်းများဆိုလျှင် မြင်းလှည်းတွေ လန်ကျသည်အထိဖြစ်ကြရ၏။ သည်အခက်အခဲကိုကျော်လွှားဖို့ ကြံဆကြရင်း ၁၈၇၃တွင် ကြိုးနှင့်ဆွဲသော ကေဘယ်လ်ကား( Cable car) များစတင်ပေါ်ပေါက်လာခဲ့သည်။

မြို့လူထု၏တောင်းဆိုမှုကြောင့် ကျောင်းများ၊လမ်းများ၊ အခြေခံအဆောက်အအုံများ ဆောက်လုပ်တို့ချဲ့ခဲ့၏။ အများပြည်သူအပန်းဖြေရန် Golden Gate Park , Presidio Park စသည့် ပန်းခြံကြီးတွေ ဖြစ်တည်လာသည်။ Presidio တွင် ရေတပ်စခန်းတည်ဆောက်ပြန်တော့ စစ်သားတွေနှင့် မိသားစုဝင်တွေ ထပ်ရောက်လာပြန်သည်။ သည်လို တစစ ကြီးထွားခဲ့ရာမှ ၁၈၅၀တွင် လူဦးရေ နှစ်သောင်းခွဲရှိခဲ့သော ဆန်ဖရန်စစ္စကိုသည် နောင်နှစ်လေးဆယ်အကြာ ၁၈၉၀တွင် လူဦးရေသုံးသိန်းကျော်အထိ တိုးပွားလာခဲ့၏။ အမေရိကန်ပြည်ထောင်စုတွင် နံပါတ်(၈)အကြီးဆုံးမြို့ ဖြစ်ခဲ့သည်အထိ။ ဒါတွေက မြို့၏ ရွှေထီးဆောင်းခဲ့သည့်အချိန်များပေါ့။ သို့သော် မမြင်နိုင်သည့် ကံကြမ္မာဆိုးများကို မမျှော်လင့်ပဲ ကြုံတွေ့ရသောအခါ ဆန်ဖရန်စစ္စကိုသည် ဗုန်းဗုန်းလဲခဲ့ရပြန်ပါသည်။

ကံကြမ္မာဟူသည် မည်သူကိုမျှ အမြဲတစေ မျက်နှာသာပေးသည်မဟုတ်။ ဒုက္ခပေးသည်လည်းရှိသည်။ ဆန်ဖရန်စစ္စကိုသည်လည်း ထိုနည်းလည်းကောင်း။

ဆန်ဖရန်စစ္စကို၏ ပထမဆုံးတွေ့ရသော ကံကြမ္မာဆိုးကား ၁၉၀ဝပြည့်နှစ်တွင် တရုတ်တန်းမှ စတင်ဖြစ်ပွားခဲ့သည့် ပလိပ်ရောဂါ ပျံ့ပွားမှုကြီးဖြစ်ပါ၏။ ၁၈၅၅ခုနှစ်တွင် တရုတ်ပြည်နှင့် အိန္ဒိယပြည်တို့မှာ ပလိပ်ရောဂါဆိုးကြောင့် လူပေါင်း(၁၅)သန်းခန့် သေဆုံးခဲ့ဘူးသည်။ထိုနိုင်ငံများရှိ ကြွက်အပေါင်းမှာလည်း ရောဂါပိုးတွေကူးစက်လျှက်။ ထိုကြွက်များက ကုန်သွယ်ရေကြောင်းသဘောင်္များတွင် ခိုကပ်လိုက်ပါကာ ဆန်ဖရန်သို့ရောက်ရှိခဲ့ဟန်တူပါ၏။

ဆန်ဖရန်စစ္စကို တရုတ်တန်းမှ တရုတ်လူမျိုးများသည် ထိုအချိန်က လူမျိုးရေးခွဲခြားမှု ပြင်းထန်စွာခံစားရချိန်ဖြစ်၏။ အိမ်ခန်းပိုင်ရှင်များက အိမ်ခန်းကောင်းလျှင် ငှားရမ်းဖို့ငြင်းဆန်သည်။ မည်သူမျှမငှားလိုသည့် စုတ်ပြတ်နေသော အိမ်ခန်းများကိုသာ တရုတ်များကို ငှားသည်။တရုတ်များ မသွားရနယ်မြေလည်း ကန့်သတ်ထားသေး၏။ ဆန်ဖရန်တရုတ်တန်းသေးသေးလေးမှာ လူတွေပြည့်ကျပ်လာတော့ သန့်ရှင်းမှုလည်းမရှိ။ အမှိုက်တွေပွရှုပ်လာ၏။ အမှိုက်သိမ်းသမားလည်း မလာ။ ကြွက်တွေခိုအောင်းရာနေရာ ဖြစ်လာ၏။ ရောဂါကူးနေသောကြွက်မှတဆင့် လူဆီသို့ ကူးစက်ပျံ့ပွားလာခဲ့သည်။

ဆန်ဖရန်မှာပလိပ်ရောဂါ စတင်ပျံ့ပွားစဉ်က အချိန်မှီသိခဲ့ကြသော်လည်း ကယ်လီဖိုးနီးယားပြည်နယ်အုပ်ချုပ်ရေးမှူး(ဝန်ကြီးချုပ်)က သည်သတင်းကို ပြည်သူတွေသိအောင် ဖြန့်ချိဖို့ သဘောမတူခဲ့။ သူ့အကြောင်းပြချက်က ဆန်ဖရန်စစ္စကို၏ဂုဏ်သိက္ခာကျဆင်းမည်၊  ဧည့်သည်မလာဖြစ်ကာ ဝင်ငွေကျဆင်းမည်ဟူ၏။ သည်လိုနှင့်(၂)နှစ်တာမျှ ပလိပ်ရောဂါသတင်းကိုဖုံးဖိခဲ့ကြသည်။ ၁၉၀၂ ခုနှစ်ရောက်မှ အုပ်ချုပ်ရေးမှူးအသစ်တက်လာကာ သည်ကိစ္စကို ကိုင်တွယ်ခဲ့ရသည်။ ထိုအချိန်တွင် လူတစ်ရာ့နှစ်ဆယ်ခန့်သေဆုံးပြီး ဖြစ်သည်။ နောက်ပိုင်းနှစ်များစွာအထိ ပြန်လည်ဖြစ်ပွားနေမှုကြောင့် ထပ်မံ၍ လူပေါင်းရာချီ သေခဲ့ကြရသဖြင့် ကြွက်ကောင်ရေပေါင်း သန်းချီကာ သတ်ဖြတ်နှိမ်နှင်းခဲ့ကြရပါ၏။

ဒုတိယကြမ္မာဆိုးကတော့ ၁၉၀၆ခုနှစ် ဧပြီလ(၁၈)ရက်နေ့မနက် ငါးနာရီဆယ့်နှစ်မိနစ်အချိန်က လှုပ်ခတ်ခဲ့သော ဆန်ဖရန်စစ္စကိုငလျှင်ကြီးပင်။ အမေရိကန်ပြည်ထောင်စုသမိုင်း၌ အဆိုးဝါးဆုံး သဘာဝဘေးအန္တရာယ်ကြီးတစ်ခုအဖြစ် မှတ်တမ်းဝင်ခဲ့သည်။

ရစ်တာစကေး (၇.၉) အဆင့်ရှိ ပြင်းထန်သောငလျှင်ကြီး၏ လှုပ်ခတ်မှုဒါဏ်ကြောင့် အဆင့်အတန်းမမှီသောအဆောက်အဦများပြိုကျပျက်စီးကာ မြို့၏တစ်ဝက်ခန့်မှာ အုပ်ပုံဘဝရောက်သွားသည်။ ငလျှင်လှုပ်ပြီးနောက် လောင်ကြွမ်းခဲ့သောမီးကိုလည်း သုံးလေးရက်ခန့်ထိ မငြိမ်းသတ်နိုင်ခဲ့။ မြို့ရေပေးဝေရေးစနစ်တစ်ခုလုံး ပျက်စီးသွား၍ဖြစ်သည်။ မီးငြိမ်းသတ်ရေးအတွက် မပြိုသေးသောအဆောက်အဦများကို ဒိုင်းနမိုက်ဖြင့်ခွဲခါ မီးကြီးကို တားဆီးခဲ့ကြရသည်။ ထိုမီးကြီးကြောင့် မြို့၏လေးပုံသုံးပုံမှာ ပြာအတိကျသွားခဲ့ရပြီး လူပေါင်းလေးသိန်းခန့် အိုးမဲ့အိမ်မဲ့ဖြစ်ခဲ့ကြ၏။ သေဆုံးသူဦးရေမှာ တရားဝင်စာရင်းအရ(၄၉၈)ဦးဟု ဆိုသော်လည်း နှောင်းခေတ်လေ့လာမှုများအရ သုံးထောင်နီးပါးသေဆုံးသည်ဟု ယူဆကြသည်။ တရုတ်တန်းတစ်ခုထဲမှာပင် လူပေါင်းနှစ်ထောင်ကျော်ပျောက်ဆုံးခဲ့ရ၏။ သည်လူတွေက တရားဝင်နေထိုင်သူများစာရင်းမှာ ထည့်သွင်းခံကြရသူတွေမဟုတ်တော့ တရားဝင်သေဆုံးသူစာရင်းထဲမှာ မပါခဲ့။ ဒုက္ခသည်တွေထဲမှ အချို့ကတော့ ဆန်ဖရန်စစ္စကို ကိုစွန့်ခွာကာ ပင်လယ်ကွေ့၏အရှေ့ဖက်(East Bay) သို့ ပြောင်းရွှေ့သွားကြသည်။

မီးလောင်ပျက်စီးခဲ့ရသောဆန်ဖရန်စစ္စကိုအတွက် အဆိုးထဲမှ အကောင်းဖြစ်ခဲ့ရသည်ကတော့ မြို့ကို စည်းကမ်းတကျ ပြန်လည်တည်ဆောက်နိုင်ခဲ့ခြင်းဖြစ်ပါ၏။ အဆင့်အတန်းမမှီ၊ ဖြစ်သလိုတည်ဆောက်ခဲ့သော နေအိမ်များအစား အဆင့်အတန်းမှီ ခိုင်ခန့်သောနေအိမ်များ၊ အထပ်မြင့်တိုက်များဖြင့် အစားထိုးနိုင်ခဲ့ကြသည်။ မြို့ပြဖွံ့ဖြိုးမှုအတွက် စနစ်တကျဖေါ်ဆောင်နိုင်ရန်အတွက် ငွေ၊လူ၊ နည်းပညာ ပံ့ပိုးမှုတွေရခဲ့လေတော့ ငလျှင်ဘေးကြီးအပြီး (၇)နှစ်ခန့်တွင် မြို့သစ်ကြီးတစ်ခုကို အောင်မြင်အောင် ဖေါ်ဆောင်နိုင်ခဲ့ကြပါ၏။ သည်အဖြစ်အပျက်ကြောင့် ဆန်ဖရန်စစ္စက်ုမြို့ကို မီးလျှံထဲမှနိုးထလာသော ဖီးနစ်ငှက်အဖြစ် တင်စားခဲ့ကြရသည်။ မြို့နေလူထု၏ မဆုတ်သောဇွဲလုံ့လ၊ အစိုးရ၏ ထောက်ပံ့မှုများက အရာထင်ခဲ့လေပြီ။

ဆန်ဖရန်စစ္စကိုငလျှင်ကြီးအပြီး ဆယ်နှစ်ခန့်တွင် မြို့တော်ကြီးမှာ အရင်အတိုင်းပင် စည်းကားစွာဖြင့် ပြန်လည်လှုပ်ရှားအသက်ဝင်ခဲ့ပြန်ပါသည်။

ဆန်ဖရန်စစ္စကိုမြို့ကို ငလျှင်ဘေးဒါဏ်သင့်ထားသော အုပ်ပုံဘဝမှ မြို့သစ်အဖြစ် ပြန်လည်တည်ဆောက်ရာတွင် စီမံကိန်းရေးဆွဲရေးနှင့် ဆင်ခြေဖုံးဒေသ ဖွံ့ဖြိုးမှု လေ့လာရေးအသင်း (San Francisco Planning and Urban Research Association)ဟူ၍ အသေအချာဖွဲ့ကာ လုပ်ကိုင်ခဲ့ခြင်းဖြစ်သည်။ စီမံကိန်းကို ရည်တို၊ရည်ရှည်၊ နောင်နှစ်ငါးဆယ်စသည်ဖြင့် အသေးစိတ် အကောင်အထည်ဖေါ်ခဲ့ကြသည်။

ထိုစီမံကိန်းမှ အကောင်အထည်ဖေါ်ခဲ့သော ဆင်ခြေဖုံးမှ မြို့တွင်းအထိပြေးဆွဲသည့် ထရော်လီရထားလမ်းများဖြစ်သည့် J,K,L,M နှင့် M လိုင်းတို့သည် နောင်နှစ်တစ်ရာကျော်ကြာသော ယခုအချိန်အထိ သုံးစွဲနေဆဲဖြစ်ကြသည်။ မီးငြိမ်းသတ်ရာတွင်သုံးရန် သီးသန့်ရေလှောင်ကန်များ၊ ရေလိုင်းများ၊ ရေပန့်စက်များကို တည်ဆောက်ခဲ့သည်။ ရေဆိုးထုတ်ပိုက်လိုင်းများ အပြင် ရေဆိုးသန့်စင်စက်ကြီးများပါ တည်ဆောက်သည်။ ဆောက်လုပ်ရေးဆိုင်ရာများအတွက် လိုက်နာရန်စည်းကမ်းသစ်များ ထပ်မံရေးဆွဲသည်။

ထို့အပြင် မြို့နေလူထု တိုးတက်များပြားမည်ကို ကြိုတင်တွက်ဆပြီး ဆန်ဖရန်စစ္စကိုနှင့် မိုင်ပေါင်းနှစ်ရာနီးပါးဝေးကွာသည့် တောင်တန်းကြီးပေါ်မှာ Hetch  Hetchy Reservoir, Herch Hetchy Aqueduct, O’Shaughnessy Dam စသည့် ရေလှောင်ကန်၊ ရေကာတာဆည်ကြီးများ တည်ဆောက်ခဲ့သည်။ ထိုရေများသည် တောင်ထိပ်ရှိနှင်းများအရည်ပျော်ရာမှ ကျဆင်းလာသည့် သဘာဝရေသန့်များဖြစ်ရာ အလွန်ကြည်လင်အေးမြလှ၏။ သဘာဝရေသန့်များကို ဆန်ဖရန်အရောက် ရေပိုက်လုံးကြီးများ၊ ရေတွန်းစက်များဖြင့် သွယ်တန်းနိုင်ခဲ့ကြသည်။ ယခုတိုင်အောင် သောက်ရေ သုံးရေအတွက်မပူရပဲ သုံးစွဲနေရသည်မှာ ထိုခေတ်က ဦးဆောင်သူများ၏ ကျေးဇူးတရားများကြောင့်ဆိုလျှင်မမှား။

မြို့ကိုပြန်လည်တည်ဆောက်ပြီးကြောင်း ပြသနိုင်ရန်အတွက် ငလျှင်လှုပ်ပြီး ကိုးနှစ်အကြာ ၁၉၁၅တွင် အပြည်ပြည်ဆိုင်ရာ ပနားမား ပစိဖိတ် ကုန်စည်ပြပွဲကြီး (Panama-Pacific International Exposition) ကို လက်ခံကျင်းပခဲ့သည်။ ဆန်ဖရန်စစ္စကိုဟုဆိုလျှင် ငလျှင်ဒါဏ်ကြောင့် ပျက်စီးခဲ့သည့်မြို့ဟု သိထားကြသည့် ကမ္ဘာ့နိုင်ငံများစွာမှ ရောက်လာကြသူအပေါင်းမှာ မြို့သစ်ကြီးအဖြစ် ပြန်လည်တည်ဆောက်ထားပြီးကြောင်း ကိုယ်တွေ့မျက်မြင်ဖြစ်၍သာ ယုံကြည်သွားကြရ၏။

၁၉၂၉တွင် အမေရိကန်ပြည်ထောင်စုသမိုင်း၌ အဆိုးဝါးဆုံးစီးပွားပျက်မှု (Great Depression) နှင့်ရင်ဆိုင်ခဲ့ရာတွင် နယူးယော့ခ်၊ ချီကာဂိုစသည့်မြို့ကြီးများစွာ ဒုက္ခပင်လယ်ဝေခဲ့သည်။ ဘဏ်များစွာ ဒေဝါလီခံရသည်။ လူများစွာ အလုပ်လက်မဲ့ဖြစ်ကာ အငတ်ဘေးဆိုက်ခဲ့သည်။ ထိုဘေးဆိုးကြီးတွင် ဆန်ဖရန်စစ္စကို မပါဝင်ခဲ့။ ခိုင်ခန့်သော စီးပွားရေးအဆောက်အဦများဖြင့် ကျားကန်နိုင်ခဲ့မှုကြောင့် ဆန်ဖရန်အခြေစိုက်ဘဏ်များ မပြိုကျအောင် တောင့်ခံနိုင်ခဲ့သည်။

အလုပ်လက်မဲ့များအတွက် အလုပ်အကိုင်ဖန်တည်းရေးအတွက် ဆောက်လုပ်ရေးလုပ်ငန်းများစွာ အကောင်အထည်ဖေါ်ခဲ့ရာတွင် ပင်လယ်ကွေ့တံတားဟုခေါ်သော(Bay Bridge) နှင့် ဂိုးလ်ဒင်းဂိတ်တံတား ( Golden Gate Bridge ) တို့သည်လည်း ပါဝင်သည်။ ၁၉၃၆နှင့်၁၉၃၇ တို့တွင် ထိုတံတားနှစ်စင်းကို ရှေ့နောက်ဖွင့်လှစ်နိုင်ခဲ့သဖြင့် လမ်းပမ်းဆက်သွယ်ရေးများ ပိုမိုလွယ်ကူလာခဲ့သည်။ ပင်လယ်ကွေ့တံတား (Bay Bridge) အလယ်ရှိ ရတနာကျွန်း ( Treasure Island ) သည် လူလုပ်ကျွန်းတစ်ခုဖြစ်ပြီး ထိုကျွန်းပေါ်တွင် Golden Gate International Exposition အမည်ရ အပြည်ပြည်ဆိုင်ရာကုန်စည်ပြပွဲကြီးကို ၁၉၃၉တွင်း ကျင်းပခဲ့ပြန်သည်။ ပင်လယ်ကွေ့၏ အလယ်တည့်တည့်တွင် လူလုပ်ကျွန်းဖန်တည်းခြင်းသည် တံတားအတွက်ဖြစ်သလို အိုးအိမ်သစ်များတည်ဆောက်ရန်လည်းပါဝင်သည်။

ဆန်ဖရန်စစ္စကို၏ နောက်ထပ်ထူးခြားမှုတစ်ခုမှာ ဒုတိယကမ္ဘာစစ်ပြီးဆုံးကြောင်း ကြေညာနိုင်ခဲ့သည့် ဂျပန်တို့လက်နက်ချခြင်းစာချုပ်ကို လက်မှတ်ထိုးခဲ့သည့်မြို့လည်း ဖြစ်သည်။ ကမ္ဘာစစ်တစ်ခု ထပ်မံဖြစ်ပွားမည့်အရေးကို ရှောင်ရှားနိုင်ရေးအတွက် ကမ္ဘာ့နိုင်ငံအသီးသီးပါဝင်သည့် ကမ္ဘာ့ကုလသမဂ္ဂ(United Nation) အဖွဲ့ကြီးစတင်တည်ထောင်မွေးဖွားခဲ့သည့်မြို့၊ ကုလသမဂ္ဂလူ့အခွင့်အရေးကြေညာစာတမ်းကြီးကို စတင်ပြီး လက်မှတ်ရေးထိုးခဲ့သည့်မြို့မှာလည်း ဆန်ဖရန်စစ္စကိုမြို့ပင်ဖြစ်ပါ၏။ နောက်နှစ်နှစ်အကြာမှ ကုလသမဂ္ဂရုံးချုပ်ကို နယူးယော့ခ်မြို့သို့ ရွှေ့ပြောင်းခဲ့ကြသည်။

ဆန်ဖရန်စစ္စကိုသည် ၁၉၀၆ခုနှစ် ငလျှင်ဘေးဆိုးကြီးရင်ဆိုင်ရပြီးနောက်တွင်လည်း ငလျှင်ဘေးတစ်ခုကို ၁၉၈၉တွင်ရင်ဆိုင်ရခဲ့သေး၏။ Loma Prieta ငလျှင်ဟုခေါ်ကြသည်။ ထိုငလျှင်ကြောင့် အဝေးပြေးလမ်းပိုင်းအချို့၊ တံတားအစိတ်အပိုင်းတစ်ခု၊ အိမ်အချို့ ထိခိုက်ပျက်စီးခဲ့ပြီး လူသေပျောက်မှုအနည်းငယ်ရှိသော်လည်း ၁၉၀၆ငလျှင်ကြီးလို ကြီးမားသော ပျက်စီးဆုံးရှုံးမှုနှင့် မကြုံတွေ့ခဲ့ရ။

ဆန်ဖရန်စစ္စကိုပင်လယ်ကွေ့ဒေသ (San Francisco Bay Area) ကြီးသည်လည်း ဆန်ဖရန်နှင့်အပြိုင်ဖွံ့ဖြိုးတိုးတက်လာရာတွင် မိုင်လေးဆယ်အကွာရှိ ဆန်ဟိုဆေးမြို့ (San José) မြို့တဝိုက်ရှိ ဆီလီကွန်တောင်ကြား( Silicon Valley) သည် အဆင့်မြင့်နည်းပညာများ၏ ဗဟိုချက်မ ဖြစ်လာခဲ့သလို ဆန်ဖရန်စစ္စကိုသည်လည်း နည်းပညာကုမ္ပဏီမှ ဝန်ထမ်းများစွာနေထိုင်အခြေချရာ မြို့ဖြစ်လာခဲ့၏။ နည်းပညာကုမ္ပဏီအချို့လည်း အခြေစိုက်လာကြ၏။ မိုးပျံတံတားများပေါ်မှ မြင်တွေ့ရသည့် မိုးမျှော်တိုက်ကြီးများစွာသည် အမေရိကန်ပြည်ထောင်စုအနောက်ဖက်ပိုင်း၏ စီးပွားရေးဗဟိုချက်မြို့ဖြစ်သည်ဟုသော သင်္ကေတပင်။

ဆန်ဖရန်စစ္စကိုမြို့သည် ထူးဆန်းခေတ်မှီသော အဆောက်အဦများသာရှိသည့်မြို့မဟုတ်။ မြို့ကြီးတိုင်းလိုလိုမှာ မိုးမျှော်တိုက်များရှိကြသဖြင့်မထူးဆန်းလှ။ ထူးဆန်းသည်က ဆန်ဖရန်စစ္စကိုမြို့၏ ဝိဒေသများ၊ ဆန်ဖရန်သားတို့၏ အတွေးအမြင်များဖြစ်သည်။ လွတ်လပ်သောအတွေးအခေါ်ရှိသူများ နေထိုင်ရာမြို့ဖြစ်သည်နှင့်အညီ မိရိုးဖလာအယူအဆ၊ အနေအထိုင်များမှ ဖေါက်ထွက်ခဲ့ကြသည်ကိုလည်း မကြာခဏတွေ့မြင်ကြရသေးသည်။ မှန်သည်လည်းရှိသလို မှားသည်လည်းရှိခဲ့သည်။ နှောင်းလူတို့အတွက် သင်္ခန်းစာယူစရာတွေအပြည့်နှင့်။

မြို့တိုင်းမှာ သူ့ဝိဒေသနှင့်သူ ရှိကြသည်။ သူ့အလှနှင့်သူ။ ဆန်ဖရန်စစ္စကို၏ ထင်ရှားသောဝိဒေသက အမြဲလိုလိုမြူတွေဆိုင်းနေတတ်ခြင်းဖြစ်၏။ ထို့ကြောင့်လည်း မြူနှင်းမြို့တော် (Fog City) ဟုခေါ်ကြသည်။

ထို့အပြင်ဆန်ဖရန်စစ္စကိုသည် နိုင်ငံရပ်ခြားမှလာရောက်အခြေချသူ အများဆုံးမြို့လည်းဖြစ်၏။ မြို့နေလူထု၏ လေးဆယ်ရာခိုင်နှုန်းကျော်သည် နိုင်ငံရပ်ခြားမှာ မွေးဖွားခဲ့သူများဖြစ်သည်။ တရုတ်လူမျိုးများက မြို့လူထု၏ ငါးပုံတစ်ပုံကျော်ရှိကာ အများဆုံးဖြစ်သည်။ အာရှတိုက်သားများ၊ စပိန်နွယ်ဖွားများ အများအပြားနေထိုင်ကြသဖြင့် ကွဲပြားခြားနားသော ယဉ်ကျေးမှု၊ အနုပညာတို့ကို တထိုင်တည်း မြင်တွေ့နိုင်သည်။

ဆန်ဖရန်စစ္စကိုတရုတ်တန်းသည် အမေရိကန်ပြည်ထောင်စုတွင်ရှိသော တရုတ်တန်းများအနက် ရှေးအကျဆုံးဖြစ်၏။ နှစ်ပေါင်းတစ်ရာ့ငါးဆယ်ကျော်ရှိခဲ့ပြီ။ ဆန်ဖရန်စစ္စကိုတရုတ်နှစ်သစ်ကူးပွဲတော် အလှပြလှည့်လည်ရေး (San Francisco Chinese New Year Parade) ပွဲသည်လည်း တရုတ်ပြည်ပြင်ပ၌ ကျင်းပသည့်ပွဲများအနက် အကြီးဆုံးပွဲတော်တစ်ခုဖြစ်သည်။ ပွဲတော်ကျင်းပခဲ့သည်မှာလည်း ရွှေတွင်းတူးအလုပ်သမားများခေတ်မှစတင်ခဲ့ရာ နှစ်ပေါင်းတစ်ရာကျော်ရှိခဲ့ပြီ။ အလှပြလှည့်လည်ပွဲတွင်ပါဝင်သူ ငါးထောင်ကျော်ရှိပြီး အားပေးကြည့်ရှုသူ သန်းဝက်ခန့်ထိ ရှိသည်။

တရုတ်တန်း (Chinatown) အပြင် ဂျပန်တန်း (Japantown) ကလည်းအထင်ကရ။ ဂျပန်ဗုဒ္ဓဘာသာရိုးရာ ငြိမ်းချမ်းရေးစေတီ (Japantown Peace Pagoda) သည် အထပ်ခြောက်ထပ်ရှိကာ အဝေးမှမြင်နိုင်သည်။ ငြမ်းချမ်းရေးမီးလျှံသည်လည်း (၂၄)နာရီထွန်းလင်းလျှက်ရှိ၏။ ဂျပန်တန်းရှိ ဈေးဝယ်စင်တာကြီးကလည်း ဂျပန်ပိသုကာပုံစံအတိုင်းပင်။ ယခင်က ဂျပန်လူမျိုးများစွာနေထိုင်ခဲ့သော်လည်း ဒုတိယကမ္ဘာစစ်တွင် ထိမ်းသိမ်းရေးစခန်းများ၌ ထိမ်းသိမ်းခံခဲ့ရ၍ စစ်ပြီးသောအခါ ဂျပန်သို့  ပြန်ကြသူများကြောင်းသိရသည်။

အာရှတိုက်သားစုစုပေါင်းသည် ဆန်ဖရန်စစ္စကိုလူဦးရေ၏ သုံးပုံတစ်ပုံခန့်ရှိသည်။ အမေရိကန်ပြည်ထောင်စုတွင်ရှိ လူဦးရေနှစ်သိန်းကျော်နှင့်အထက်နေထိုင်သော မြို့ကြီးများအနက် ဆန်ဖရန်စစ္စကိုသည် ပထမဆုံးသော တရုတ်လူမျိုး အာရှသားမြို့တော်ဝန်နှင့် ပထမဆုံးသော အာဖရိကနွယ်ဖွားအမျိုးသမီးမြို့တော်ဝန်တို့ ပေါ်ပေါက်ခဲ့သည့်မြို့ဖြစ်သည်။ မြို့လူထုအများစုသည် လွတ်လပ်သောအတွေးအခေါ်ရှိသူများဖြစ်ကြသည်။

ရှေးဟောင်းအနုပညာ ယဉ်ကျေးမှုတို့မှ ဖေါက်ထွက်သည့် ခေတ်သစ်အနုပညာ (Modern Art) တချို့သည် ၁၉၅၀တွင် ဆန်ဖရန်စစ္စကိုမှစတင်ခဲ့သဖြင့် ယင်းတို့ကို San Francisco Renaissance ဟုခေါ်ကြ၏။

လွတ်လပ်မှုကိုရှာကြရာမှ ဖြစ်ပေါ်လာသော ဟစ်ပီ(Hippies) ယဉ်ကျေးမှုသည်လည်း ၁၉၆၀တဝိုက်တွင် ဆန်ဖရန်စစ္စကိုရှိ Haight-Ashbury လမ်းတဝိုက်မှ စတင်ခဲ့ခြင်းဖြစ်၏။ ၁၉၆၇တွင် ဟစ်ပီယဉ်ကျေးမှုအမြင့်ဆုံးဖြစ်ကာ Golden Gate Park ထဲတွင် နွေရာသီအချစ်မေတ္တာ (Summer of Love) ပွဲကြီး ဆင်နွဲခဲ့ကြ၏။ “ If you’re going to San Francisco, be sure to ware flowers in your hair “ ဟူသော သီချင်းစာသားကို သည်ပွဲတော်တွင် ရေးစပ်ခဲ့ကြသည်။ နောက်ပိုင်းတွင် မူးယစ်ဆေးပြသနာ၊ အိုးအိမ်မဲ့ပြသနာ၊ ရာဇဝတ်မှုပြသနာ များစွာဖြေရှင်းခဲ့ရ၍ ဟစ်ပီယဉ်ကျေးမှု တိမ်ကောသွားခဲ့သည်။

LGBT ဟု ခေါ်ကြသည့် လိင်တူချစ်သူများအခွင့်အရေးလှုပ်ရှားမှုသည်လည်း ၁၉၇၀တွင် ဆန်ဖရန်စစ္စကိုမှ စတင်လှုပ်ရှားခဲ့ကြသည်။ Harvey Milk သည် လိင်တူချစ်သူများတွင် ရပ်ကွက်ကိုယ်စားလှယ်( ရပ်ကွက်အုပ်ချုပ်ရေးမှူး)အဖြစ် ပထမဆုံးရွေးကောက်ခံရသူဖြစ်လာသည်။ ကက်စထရို (Castro) ရပ်ကွက်တွင် ပထမဆုံး လိင်တူချစ်သူတို့ရွာအဖြစ် တည်ထောင်နိုင်ခဲ့သည်။

ဆန်ဖရန်စစ္စကို၏ လိင်တူချစ်သူများအလှပြလှည့်လည်ရေးပွဲ ( San Francisco Gay/ Pride Parade) သည်လည်း အမေရိကန်ပြည်ထောင်စုတွင်ကျင်းပသည့် လိင်တူချစ်သူပွဲများအနက် အကြီးဆုံးဖြစ်သည်။ နိုင်ငံအသီးသီးမှ လိင်တူချစ်သူများ၊ နိုင်ငံတွင်းမှ လိင်တူချစ်သူများ သန်းနှင့်ချီကာ လာရောက်ဆင်နွှဲကြသည်။

ထို့အပြင် အားကစားပြိုင်ပွဲမျိုးစုံ၊ ဂီတဖျော်ဖြေပွဲမျိုးစုံ၊ လူမျိုးပေါင်းစုံ၏ ရိုးရာယဉ်ကျေးမှုပြပွဲမျိုးစုံ၊ ကုမ္ပဏီကြီးငယ်များစွာ၏ တွေ့ဆုံဆွေးနွေးပွဲ (Convention)မျိုးစုံ၊ ပြပွဲမျိုးစုံတို့ကို တစ်နှစ်ပတ်လုံးကျင်းပလျှက်ရှိ၏။ ယခင်အခါက ကုန်သွယ်ဆိပ်ကမ်းမြို့ဖြစ်ခဲ့သော်လည်း ပင်လယ်ဆိပ်ကမ်းကြီးကို ဥက္ကလံမြို့(Oakland)သို့ရွှေ့သွားသဖြင့် ကမ္ဘာလှည့်ခရီးသည်များကို များစွာအားထား၍ သည်လိုပွဲတွေ အမြဲတစေ ကျင်းပခြင်းဖြစ်သည်။

ဆန်ဖရန်စစ္စကိုတွင် ထူးခြားသောလမ်းမတစ်ခုရှိ၏။ Van Ness Ave ဟုခေါ်တွင်သည်။ ယင်းလမ်းမသည် ၁၉၀၆ခု ဆန်ဖရန်ငလျှင်ကြီးကြောင့် ဖြစ်ပေါ်ခဲ့သော မီးလောင်မှုကို မြို့အနောက်ဖက်ဆီသို့မကူးစက်ရေးအတွက် အဓိက တားဆီးခဲ့ရာ လမ်းမကြီးဖြစ်သည်။ ဤလမ်းမပေါ်ရှိ မပြိုသေးသော အဆောက်အဦအားလုံးကို အမေရိကန်စစ်သားများက ဒိုင်းနမိုက်များဖြင့် ဖြိုချပြီး မီးတားလမ်းအဖြစ် အသုံးပြုခဲ့ရသည်။ ထိုသို့တားဆီးနိုင်၍သာ မြို့လုံးကျွတ်မီးလောင်မည့်ဘေးမှ လွတ်မြောက်ခဲ့ကြသည်။ ငလျှင်ဘေးနောက်ပိုင်းတွင် စီးပွားရေးအချက်အချာနေရာတစ်ခုဖြစ်လာခဲ့ပြီး ယခုအချိန်တွင် တန်ဖိုးကြီးအထပ်မြင့်အိမ်ယာများစွာ၊ စားသောက်ဆိုင်၊ ရုပ်ရှင်ရုံများဖြင့် စည်ကားလျှက်ရှိ၏။

ဘဘာဝဘေးအန္တရာယ်ကျရောက်ချိန်တွင် တားဆီးနိုင်ရေးအတွက်ဆိုလျှင် နည်းမျိုးစုံသုံးကြရသည်။ အိမ်ကြီးအိမ်ကောင်းများစွာကို ဖြိုချပြီးတားဆီးရသည်မှာ လွယ်လှသည်မဟုတ်။ ပိုင်ရှင်များကလည်း နားလည်သဘောပေါက်စွာဖြင့် ခွင့်ပြုကြ၍သာ  အောင်မြင်ခြင်းဖြစ်သည်။

ဆန်ဖရန်စစ္စကိုမြို့သည် အကျယ်အဝန်းအားဖြင့် (၄၇)စတုရန်းမိုင်နီးပါးသာရှိသော်လည်း ၂၀၁၇စာရင်းအရ လူဦးရေစုစုပေါင်း ရှစ်သိန်းရှစ်သောင်းကျော်နေထိုင်ကြသဖြင့် အမေရိကန်ပြည်ထောင်စုတွင် နယူးယော့ခ်မြို့ပြီးလျှင် ဒုတိယမြောက် လူနေသိပ်သည်းမှုအများဆုံးမြို့ကြီးလည်းဖြစ်၏။

ဆန်ဖရန်စစ္စကိုပင်လယ်ကွေ့ဒေသ (San Francisco Bay Area)တဝိုက်တွင်ရှိသော အုက္ကလံ (Oakland)၊ ဆီလီကွန်တောင်ကြားတည်ရှိရာ ဆန်ဟိုဆေး (San Jose) တို့အပါအဝင် လူဦးရေစုစုပေါင်း ဆယ်သန်းနီးပါးနေထိုင်ကြ၏။ ထိုဧရိယာ၏ ဂျီဒီပီစုစုပေါင်းသည်    ဒေါ်လာဘီလီယံကိုးရာကျော်ရှိသည်။ ဆန်ဖရန်စစ္စကိုတစ်မြို့ထဲ၏ ဂျီဒီပီက ဒေါ်လာဘီလီယံတစ်ရာ့ငါးဆယ်ရှိ၏။ ထို့ကြောင့် ၂၀၁၇စာရင်းအရ ဆန်ဖရန်စစ္စကိုသည် အမေရိကန်ပြည်ထောင်စု၏ ဝင်ငွေမြင့်သောမြို့များစာရင်းတွင် အမှတ်စဉ်(၇)ရှိသည်။ ကမ္ဘာ့အချမ်းသာဆုံးမြို့များစာရင်းတွင် အမှတ်စဉ်(၁၄)ရှိသည်။

၁၉၄၀ခန့်က မြို့နေလူထု၏ ၉၂% ရှိခဲ့သော လူဖြူများသည် ၂၀၁၇တွင် ၄၂%သာ ကျန်ရှိတော့သည်။ ကမ္ဘာ့နိုင်ငံအသီးသီးမှ ပြောင်းရွှေ့လာသူများက သူတို့နေရာတွင် ဝင်ရောက်နေထိုင်ကြသည်။ ၁၉၉၀မှ ၂၀၀ဝပြည့်နှစ်အထိ ဆန်ဖရန်စစ္စကိုပင်လယ်ကွေ့ဒေသသို့ ကမ္ဘာနိုင်ငံအသီးသီးမှ ဝင်ရောက်လာသူစုစုပေါင်း ရှစ်သိန်းခွဲခန့်အထိ ရှိခဲ့ရာ အယ်လ်အေနှင့် နယူးယော့ခ်ပြီးလျှင် အများဆုံးဖြစ်၏။

အာရှသားသုံးပုံတစ်ပုံနေထိုင်သော ဆန်ဖရန်စ္စကိုမြို့၌ ဒုတိယအများဆုံးအာရှသားများမှာ ဖိလစ်ပိုင်လူမျိုးများဖြစ်သည်။ အာရှသားများ၏ လေးဆယ်ရာနှုန်းသည် တရုတ်ပြည်မှာမွေးဖွားသူများဖြစ်၍ ၁၃%သည် ဖိလစ်ပိုင်ပြည်မှာ မွေးဖွားသူများဖြစ်၏။ မြန်မာပြည်ဖွားများစွာ ဆန်ဖရန်စစ္စကိုမြို့တွင် နေထိုင်ကြသော်လည်း စာရင်းအတိအကျမသိရပါ။ ထောင်ဂဏန်းမျှတော့ ရှိနိုင်ပါသည်။ ဆန်ဖရန်စစ္စကို၏ အိမ်ခြံမြေဈေးကွက်က အမေရိကန်ပြည်ထောင်စုတွင် အမြင့်ဆုံးသောဈေးကွက်မို့ ယခင်နှစ်များစွာက ရောက်ရှိလာကြသည့် မြန်မာပြည်ဖွားများနှင့် ဆွေမျိုးသားချင်းများသာ အများစုဖြစ်သည်။ ဆန်ဖရန်စစ္စကိုနှင့်ကပ်လျက်ရှိသည့် ဒေးလီစီတီ (Daly City) မြို့၊ ဖရီးမောင့် (Fremont)မြို့ စသည်တို့တွင်လည်း မြန်မာမိသားစုများစွာနေထိုင်သည်။ ဆန်ဖရန်စစ္စကိုပင်လယ်ကွေ့ဒေသတစ်ခုလုံးဆိုလျှင် မြန်မာနွယ်ဖွား တစ်သောင်းကျော်မျှရှိမည်ဟု ခန့်မှန်းကြသည်။

ဆန်ဖရန်စစ္စကိုမြို့သည် ၂၀၁၄စာရင်းအရ အမေရိကန်ပြည်ထောင်စုတွင် လူနေမှုအဆင့်အမြင့်ဆုံးမြို့များ၌ ပထမနေရာရခဲ့သည်။ သို့သော် အလွန်ကြီးမြင့်လှသော လူနေမှုစာရိတ်ဒဏ်ကြောင့် ကော်လာပြာလုပ်သားဟုခေါ်ကြသည့် အလုပ်သမားမိသားစုများပါဝင်သည့် အလယ်အလတ်တန်းစားများသည် မြို့ကိုစွန့်ခွာ၍ ပို၍သက်သာရာဒေသသို့ ပြောင်းရွှေ့သွားကြသည်။ သူတို့နေရာတွင် ကော်လာဖြူဟုခေါ်သည့် မန်နေဂျာကြီးများအပါအဝင် ဝင်ငွေကောင်းသည့် အဆင့်မြင့်နည်းပညာ (High Tech)လုပ်သားများက အစားထိုးဝင်ရောက်လာသည်။ ကွန်ဒိုအခန်းများသည် ဒေါ်လာသန်းချီတန်ဖိုးများဖြစ်ကုန်ပြီး အခန်း(၂)ခန်းပါ သာမန်အိမ်ခန်းတစ်ခု၏ ငှားရမ်းခသည် တစ်လလျှင် ဒေါ်လာလေးထောင်ကျော်အထိ ပေးရသည်။

၂၀၁၄ခုနှစ် Pew Research Center စာရင်းအရ ဆန်ဖရန်စစ္စကိုမြို့သားများ၏ တစ်ဝက်နီးပါးဖြစ်သည့် ၄၈%က ခရစ်ယာန်၊  ၃၅% ဘာသာမရှိ၊ ၅% ဟန္နူ၊ ၃% ဂျူး၊ ၂% ဗုဒ္ဓ၊ ၁% အစ္စလ္လမ် ဘာသာတို့ဖြစ်၏။ ၅၅% သာ အိမ်မှာ အင်္ဂလိပ်ဘာသာတစ်မျိုးတည်း ပြောကြ၍ ကျန်သူတို့တွင် ၁၉%က တရုတ်စကားမျိုးစုံ၊ ၁၂% က စပိန်စကား၊ ၃% က တဂလို့( Tagalog)ခေါ်ဖိလစ်ပိုင်စကား၊ ၂% က ရုရှစကားများကို အိမ်သုံးစကားပြောကြသည်တဲ့။ ရုရှလူမျိုးဦးရေလည်း ဆန်ဖရန်စစ္စကိုတွင်မနည်းလှ။ မြန်မာများကတော့ အားလုံးလိုလိုပင် အိမ်သုံးစကားကို မြန်မာစကားသာ သုံးကြမည်ထင်ပါသည်။ မြန်မာပြည်ဖွား အမေရိကန်များတွင် တရုတ်နွယ်ဖွားများက အများစုဖြစ်ပါသည်။

အိမ်ထောင်စုစုစုပေါင်း၏ ၄၄%က ရိုးရိုးဘွဲ့တစ်ခု သို့မဟုတ် မြင့်မားသောဘွဲ့များ ရှိကြသူတွေဖြစ်သည်။ အမေရိကန်ပြည်ထောင်စုတွင် ဆီယားတယ်လ် (Seattle) မြို့ပြီးလျှင် ပညာတတ်အများဆုံးဖြစ်၏။ ပညာတတ်များသဖြင့် ကလေးမွေးဖွားမှုနှုန်းသည်လည်း အမေရိကန်ပြည်ထောင်စုတွင် အနည်းဆုံးဖြစ်ရသည်။ ၂၀၁၈တွင် ကလေးမွေးနှုန်းထက် ခွေးမွေးနှုန်းက ပိုများသည်ဟုဆို၏။ ပညာတတ်များက အိမ်ထောင်ပြုနောက်ကျသည့်အပြင် ကလေးမယူသူ၊ ယူလျှင်လည်း ကလေးငယ်တစ်ယောက်ထက်ပို၍မယူကြသူများ၏။ တစ်ယောက်တည်းသမားဘဝနှင့် နေသူတွေလည်းမနည်းလှ။

ဆန်ဖရန်စစ္စကိုလူဦးရေစုစုပေါင်း၏ ၁၅%မှာ LGBT ခေါ် လိင်တူချစ်သူများဖြစ်ကြသဖြင့် အမေရိကန်ပြည်ထောင်စုမြို့ကြီးများတွင် လိင်တူချစ်သူနေထိုင်မှုနှုန်း အမြင့်ဆုံးဖြစ်၏။

အထက်ပါ ကိန်းဂဏန်းများအရ ဆန်ဖရန်စစ္စကိုသည် အစစ ပြည့်စုံသည့်မြို့ကြီးအဖြစ် ထင်စရာရှိပါ၏။ သို့သော် ပြသနာပေါင်းများစွာကိုလည်း ဖြေရှင်းနေရဆဲဖြစ်သည်။ အဓိကမှာ အိမ်ရာမဲ့လူများပြသနာ (Homelessness Problem) ဖြစ်သည်။ အမေရိကန်ပြည်ထောင်စုရှိ မြို့နယ်အသီးသီးမှ ရောက်ရှိလာသည့် အိမ်ရာမဲ့များစွာသည် မြို့လယ်လမ်းဘေးပလက်ဖောင်းများပေါ်၊ အဝေးပြေးလမ်းမကြီးများ၏ အောက်လစသည်တို့တွင် ဖြစ်သလိုနေထိုင်ကြသည်။ ပတ်ဝန်းကျင်မှာ အမှိုက်သရိုက်ပေါင်းစုံ၊ အနံ့အသက်ပေါင်းစုံနှင့် သည်လိုနေထိုင်နေသူဦးရေ ရှစ်ထောင်ခန့်ထက်မနည်းရှိသည်။ အိမ်ရာမဲ့စုစုပေါင်းမှာ ခန့်မှန်းစာရင်းအရ တစ်သောင်းလေးထောင်ခန့်ရှိပြီး ကျန်သူများက မြို့မှစီစဉ်ပေးသော ယာယီအခန်းများတွင် နေကြသည်။ ထိုသူများ၏ သုံးပုံနှစ်ပုံသည် စိတ်ဝေဒနာရှင်များ၊ အေအိုင်ဒီအက်ဝေဒနာသည်များ၊ မူးယစ်ဆေးစွဲနေသူများ ဖြစ်ကြသည်။ မြို့တော်အစိုးရမှ ထောက်ပံ့ငွေများ၊ ထောက်ပံ့မှုများရှိသော်လည်း မူးယစ်ဆေးသံသရာမှရုန်းမထွက်နိုင်ကြ၍ ပြသနာကို မရှင်းနိုင်သေး။ ၂၀၁၇-၁၈ မြို့တော်သုံးငွေစုစုပေါင်း၏ ဒေါ်လာသန်းပေါင်းသုံးရာကျော်ခန့်ကို အိမ်ရာမဲ့ပြသနာအတွက် သုံးစွဲခဲ့ရသည်။

ဆန်ဖရန်စစ္စကိုမြို့လည်ရှိ Civic Center တွင် ခန့်ညားလှသော မြို့တော်ခန်းမကြီးရှိပြီး မြို့တော်အစိုးရရုံးစိုက်သည်။ အစိုးရကို မြို့နေလူထုကရွေးချယ်ပေးသော မြို့တော်ဝန်၊ ရပ်ကွက်အုပ်ချုပ်ရေးမှူးများ၊ အခြားရွေးချယ်ခံပုဂ္ဂိုလ်များဖြင့် ဖွဲ့စည်းထားသည်။

မြို့တော်ဝန်သည် လေးနှစ်သက်တန်းကို နှစ်ကြိမ်အထိသာ တာဝန်ထမ်းဆောင်နိုင်သည်။ အစိုးရအဖွဲ့ကို ဦးဆောင်ရသူဖြစ်၍ ဥပဒေစိုးမိုးရေးအတွက် သက်ဆိုင်ရာမြို့တော်အေဂျင်စီခေါင်းဆောင်များဖြင့် တိုင်ပင်ညှိနှိုင်း ဆောင်ရွက်ရသည်။ ရပ်ကွက်အုပ်ချုပ်ရေးမှူးများ (Board of Supervisors) နှင့် ပေါ်လစီများဆွေးနွေးလုပ်ဆောင်ရသည်။ လစ်လပ်နေရာများအတွက် နာမည်စာရင်း တင်သွင်းရသည်။ မြို့တော်ဘဏ္ဍာရေးရသုံးငွေစာရင်းကို အတည်ပြုလက်မှတ်ထိုးရသည်။ အုပ်ချုပ်ရေးမှူးများတင်ပြလာသည့် ဥပဒေသစ်များကို မဆီလျှော်ပါက ဗီတိုဖြင့်ပယ်ချနိုင်ခွင့်ရှိသည်။ လက်ရှိမြို့တော်ဝန်ဖြစ်သူ နှုတ်ထွက်လျှင်၊ သို့မဟုတ် သေဆုံးလျှင် ရပ်ကွက်အုပ်ချုပ်ရေးအဖွဲ့ခေါင်းဆောင်က ခေတ္တတာဝန်ယူရသည်။ ရပ်ကွက်အုပ်ချုပ်ရေးအဖွဲ့ဝင်များထဲမှ သင့်တော်သူကို ခေတ္တမြို့တော်ဝန်အဖြစ် မဲပေးခန့်ထားနိုင်သည်။

မြို့တော်အုပ်ချုပ်ရေးအတွက် ရပ်ကွက်ခေါင်းဆောင် အုပ်ချုပ်ရေးမှူး (၁၁)ဦးကို ရပ်ကွက်အလိုက် ရွေးချယ်တင်မြောက်ရပြီး ထိုသူများကို Board is Supervisors များဟုခေါ်သည်။ မြို့၏ ကောင်စီဝင်များလည်းဖြစ်သည်။ သူတို့တာဝန်မှာ ဥပဒေပြုရေးနှင့် ရသုံးငွေစာရင်းပြုစုနိုင်ရေးဖြစ်သည်။ ထိုအဖွဲ့တွင် ဥက္ကဌတစ်ဦးရွေးချယ်ကာ ခေါင်းဆောင်ရသည်။ ရပ်ကွက်များကို District ဟုသတ်မှတ်ထားပြီး တစ်မှ ဆယ့်တစ်အထိရှိသည်။ သူတို့၏ သက်တန်းမှာလည်း လေးနှစ်ဖြစ်၏။  သက်တန်းကန့်သတ်ချက်မရှိ။

မြို့တော်ဝန်နှင့် ရပ်ကွက်အုပ်ချုပ်ရေးမှူးများအပြင် ရွေးကောက်တင်မြှောက်ရသော မြို့တော်အစိုးရအဖွဲ့ဝင်များရှိသေး၏။ မြို့တော် မှတ်တမ်းထိမ်းသိမ်းသူ (City Assessor-Recorder)၊ မြို့တော်အစိုးရရှေ့နေ(City Attorney)၊ ရပ်ကွက်ဒေသရှေ့နေ (District Attorney)၊ ပြည်သူ့ကာကွယ်ရေးရှေ့နေ (Public Defender)၊ ကောင်တီရဲချုပ် (Sheriff)၊ မြို့တော် ဘဏ္ဍာရေးမှူးနှင့် အခွန်ဝန် ( City Treasurer and Tax Collector) တို့ကိုပါ မြို့နေလူထုက ရွေးချယ်ပေးရသည်။ မြို့တော်အုပ်ချုပ်ရေးဥပဒေ ( City Charter) အရ ဆောင်ရွက်ကြရသည်။

ချာတာ (Charter)ဥပဒေနှင့်အုပ်ချုပ်သော ကောင်တီ (County) များမှာ ကယ်လီဖိုးနီးယားပြည်နယ်တွင် (၁၃)ကောင်တီသာရှိသည်။ ကောင်တီဆိုသည်မှာ မြန်မာပြည်မှ မြို့နယ်အဆင့်ကို ဆိုလိုသည်။ ဆန်ဖရန်စစ္စကိုကောင်တီတွင် ဆန်ဖရန်တစ်မြို့ထဲသာရှိသဖြင့် Government of the City and County of San Francisco ဟု မြို့အစိုးရကို ခေါ်ဝေါ်သည်။ အခြားသော အစိုးရဌာနများနှင့် အေဂျင်စီများစွာရှိသည်။ အများစုသောခေါင်းဆောင်များကို မြို့တော်ဝန်က တိုက်ရိုက်ခန့်ထားသည်။

ဆန်ဖရန်စစ္စကိုမြို့အတွက် ၂၀၁၉-၂၀၂၀ ရသုံးငွေစာရင်းကို ဒေါ်လာ(၁၁)ဘီလီယံ သတ်မှတ်ထားသည်။ အမရေိကန်ပြည်ထောင်စုရှိ မြို့ကြီးများအနက် အသုံးစားရိတ်အများဆုံးမြို့လည်းဖြစ်သည်။ ဤ ရသုံးငွေစာရင်းသည် မြန်မာပြည်တစ်ခုလုံး၏ နှစ်စဉ်ဘဏ္ဍာရေးရသုံးငွေစာရင်းနီးပါးရှိ၏။ အစိုးရ၏ ဝင်ငွေများအနက် အိမ်ခြံမြေခွန်သည် ငါးပုံတစ်ပုံရှိသည်။ တစ်နှစ်လျှင် ဒေါ်လာ(၂)ဘီလီယံကျော် ဖြစ်၏။
ရောင်းဝယ်ခွန် အဖြစ် ဆယ်ရာခိုင်နှုန်းနီးပါး(၉.၇၅%) ကောက်ခံသည်။ ဝင်ငွေ (၃၀%) အထိသည် ရောင်းဝယ်ခွန်မှ ရရှိသည်။ ကျန်သောငါးဆယ်ရာခိုင်နှုန်းသာ အခြားဝင်ငွေများဖြစ်၏။

မြို့တော်အစိုးရသည် မြို့၏ အကြီးမားဆုံးအလုပ်ရှင်လည်းဖြစ်၏။ မြို့တော်၏ အမြဲတန်းနှင့် ယာယီအစိုးရဝန်ထမ်းစုစုပေါင်း နှစ်သောင်းခုနှစ်ထောင်အထိ ရှိသည်။ ပြည်သူ့ဝန်ထမ်းဌာန (Department of Public Work) သည် မြန်မာပြည်တွင် စည်ပင်သာယာနှင့်ညီမျှသည်။ မြူနီစပယ် ပို့ဆောင်ရေး အေဂျင်စီ (Municipal Transportation Agency) မြို့တွင်း ခရီးသည်ပို့ဆောင်ရေးလုပ်ငန်းလုပ်ကိုင်သည်။ ပြည်သူ့အခြေခံလိုအပ်ချက်များ ကော်မရှင် (Public Utility Commission) သည် ရေ၊မီး၊ ဓါတ်ငွေ့ စသည့်လိုအပ်ချက်များကို ကိုင်တွယ်ရသည်။ ရဲဌာန၊ မီးသတ်ဌာန၊ အကျဉ်းဦးစီးဌာနစသည်ဖြင့် အခြားသောဌာနပေါင်း ရာချီရှိသည်။

ဆန်ဖရန်စစ္စကို၏ ရာဇဝတ်မှုသည် အခြားမြို့ကြီးများနှင့်ယှဉ်လျှင် နည်းပါးသည်။ ရဲဌာနတွင် ရဲအရာရှိပေါင်း နှစ်ထောင့်တစ်ရာကျော်ရှိ၍ ရဲစခန်းဆယ်ခုဖွင့်လှစ်ထားသည်။ ဆန်ဖရန် ရဲဌာနသမိုင်းတွင် ပထမဆုံး အာရှနွယ်ဖွားအမျိုးသမီးရဲချုပ်သည်လည်း တာဝန်ထမ်းဆောင်ခဲ့ဖူးသည်။ထိုနည်းတူစွာပင် ဆန်ဖရနစစ္စကိုမြို့၏ မီးသတ်ဦးစီးချုပ်သည်လည်း အမျိုးသမီးဖြစ်သည်။ မြို့တော်ဝန်သည်လည်း အမျိုးသမီးဖြစ်သည်။ မြို့အုပ်ချုပ်ရေးမှူးများတွင်လည်း အမျိုးသမီးများစွာပါဝင်သည်။ ဆန်ဖရန်စစ္စကိုမြို့သည် အမျိုးသမီးများ၏ဂဏ္ဍကို များစွာအားပေးသည့်မြို့တစ်မြို့ဖြစ်၏။ ထို့ကြောင့်လည်း မြို့၏ခေါင်းဆောင်ပိုင်းတွင် အမျိုးသမီးထုအားကောင်းနေခြင်းဖြစ်သည်။ ကျားမခွဲခြားမှုအနည်းဆုံးမြို့ဟု ဆိုသည်။

မြို့၏အထွေထွေကုန်ကျစားရိတ်ကြီးမြင့်သလို လုပ်ခလစာလည်း မြင့်သည်။ အမေရိကန်ပြည်ထောင်စု၏ အနိမ့်ဆုံးလစာသည် (၇.၂၅) ဒေါ်လာသာ သတ်မှတ်ထားသော်လည်း ဆန်ဖရန်စစ္စကိုမြို့အစိုးရက တစ်နာရီလျှင် (၁၅)ဒေါ်လာ သတ်မှတ်ထားသည်။

မြို့တည်နေရာအရ အနောက်ဖက်တွင် ပစိဖိတ်သမုဒ္ဒရာ၊ မြောက်ဖက်နှင့် အရှေ့ဖက်တွင် ပင်လယ်ကွေ့တို့ဝိုင်းရံထားပြီး တောင်ဖက်သည်သာ ကုန်းပိုင်းဖြစ်သည်။ တောင်တန်းများစွာတည်ရှိသဖြင့်တည်နေရာအလွန်ထူးခြားလှပသည်။ ရေနှင့်ကုန်းမြေတို့သဘာဝ၏ ဆက်စပ်အလှတရားများ၊ လူလုပ်ကျွန်း၊ ပန်းခြံကြီးများ၊ ရှေးဟောင်းအဆောက်အဦများစသည်ဖြင့် ကြည့်ရှုလည်ပတ်စရာ များစွာရှိသည့် မြို့တစ်မြို့လည်း ဖြစ်သည်။

ဆန်ဖရန်စစ္စကို လာလည်မည်ဆိုလျှင် မရောက်မဖြစ်သွားလည်ရမည့်နေရာများ မနည်းလှ။ မြို့တွင်းအပြင် မြို့ပြင်ဖက်တွင်ပါ သွားရောက်သင့်သည့်နေရာများစွာရှိသည်။ ထိုနေရာများထဲမှ ကောင်းနိုးရာရာနေရာများကို မိတ်ဆက်ပေးချင်ပါသည်။

(၁)ဂိုးလ်ဒင်းဂိတ်တံတား (Golden Gate Bridge)

Golden Gate တံတားသည် ဆန်ဖရန်၏ သင်္ကေတဖြစ်သည်။ ဆန်ဖရန်မြောက်ဖက်ပိုင်းရှိ မြို့များနှင့်ဆက်သွယ်ရန်အတွက် လေတိုက်နှုန်းအလွန်ပြင်းသော ပင်လယ်ကွေ့အဝကို ဖြတ်သန်းထားသည့် ကြိုးတံတားဖြစ်သည်။ သဘောင်္များဝင်ထွက်ရာအပေါက်ဝဖြစ်၍ ကြိုးတံတားဒီဇိုင်းကို ရွေးချယ်ခဲ့သည်။ ခေတ်သစ်ကမ္ဘာ၏ ထူးခြားအံ့မခန်းသောတည်ဆောက်မှုအဖြစ် ယနေ့တိုင် တည်ရှိနေဆဲဖြစ်၏။ ထိုခေတ်အခါက မဖြစ်နိုင်ဟုဆိုသောအရာကို ဖြစ်အောင်လုပ်ပြခဲ့ကြသည့် အင်ဂျင်နီယာများကို လေးစားပါသည်။ ယခုခေတ်တွင် အလွန်တရာရှည်လျှားသော ကြိုးတံတားများ တည်ဆောက်နိုင်ခြင်းမှာလည်း ဤတံတား၏ ဆောက်လုပ်ရေးလုပ်ငန်းမှ လေ့လာသင်ယူခဲ့မှုများကြောင့် ဖြစ်၏။

တံတားအရှည်စုစုပေါင်း (၁.၇)မိုင်ရှည်ပြီး အကျယ်ပေကိုးဆယ်၊ အမြင့် (၇၄၆)ပေရှိသော ဤကြိုးတံတားကို ၁၉၃၃ခု ဇန်နဝါရီလတွင်စတင်တည်ဆောက်ခဲ့ပြီး ၁၉၃၇ခုနှစ် မေလ(၁၇)တွင်ဖွင့်လှစ်ခဲ့ရာ ယခုဆိုလျှင် နှစ်ပေါင်းရှစ်ဆယ်ကျော်ရှိခဲ့ပြီ။ ဖိုးဖိုးကြီးအရွယ်ရောက်နေပြီဖြစ်သော ထိုတံတားအိုကြီးပေါ်မှ နေ့စဉ်လိုလို ယာဉ်မျိုးစုံအစီးရေစုစုပေါင်း တစ်သိန်းတစ်သောင်းကျော် ဖြတ်သန်းလျှက်ရှိ၏။ ပြုပြင်ထိန်းသိမ်းမှုကောင်းသဖြင့် နှစ်ရာကျော်သည့်တိုင် အသုံးတော်ခံနေမည်မှမလွဲ။ ဘယ်ညာ တစ်ဖက်လျှင် တစ်ပေမျှရွေ့လျှားနိုင်သဖြင့် ငလျှင်ဒါဏ်လည်း ပူစရာမရှိ။

ဤနေရာသည်  ရှုခင်းအလှဆုံးတံတားတစ်ခုမို့ ဓါတ်ပုံဆရာများအကြိုက်တွေ့ကြ၍ ဓါတ်ပုံအရိုက်ခံရဆုံးတံတားတစ်စင်းအဖြစ် တည်ရှိနေသည်။ တံတားပေါ်မရောက်မှီမှစ၍ တံတားပေါ်အထိ ဓါတ်ပုံရိုက်ရန်ရှုခင်းပေါင်းစုံက ရင်သတ်ရှုမော။ ရုပ်ရှင်ဇာတ်ကားများစွာတွင် အဓိကဇာတ်ကောင်အဖြစ်အသုံးတော်ခံခဲ့ရသလို ယနေ့တိုင်လည်း အသုံးတော်ခံနေမြဲဖြစ်သည်။

(၂) အယ်ကာထရဇ်ကျွန်း (Alcatraz Island)

ဆန်ဖရန်စစ္စကိုမြောက်ဖက် ကမ်းခြေနှင့် (၁.၂၅)မိုင်အကွာတွင်ရှိသောကျွန်းငယ်လေးသည်လည်း နာမည်ကျော်နေရာတစ်ခုဖြစ်၏။ မီးပြတိုက်ထားရှိရာကျွန်းကလေးမှသည် ၁၉၃၄မှ ၁၉၆၃ အထိ ဗဟိုအစိုးရအကျဉ်းထောင်ဖြစ်ခဲ့သောသည်ကျွန်းလေးတွင် အမေရိကန်ပြည်ထောင်စု၏ နာမည်ကျော်လူဆိုးကြီး အယ်လ်ကာပုန်း (Al Capone)အပါအဝင် ထိပ်တန်းဒုစရိုက်သမားများစွာကို ထိမ်းသိမ်းထားခဲ့ရာ နေရာဖြစ်၏။

ကမ်းခြေနှင့်တစ်မိုင်သာသာအကွာအဝေးသာဖြစ်၍ အကျဉ်းထောင်မှ ထွက်ပြေးရန်အကြိမ်ကြိမ်ကြိုးစားကြသော်လည်း မည်သူတစ်ဦးတစ်ယောက်မျှ အောင်မြင်မှုမရခဲ့ကြ။ ဖေါက်ထွင်းထွက်ပြေးခဲ့သူ အကျဉ်းသား(၃၆)ဦးတွင် (၂၃)ဦးအရှင်ဖမ်းမိ၊ (၆)ဦးကိုအသေပစ်ခတ်ဖမ်းမိ၊ (၂)ဦးရေနစ်သေဆုံးသည်။ ကျန်သူများမှာ ရေနစ်သေဆုံးဟုယူဆ၍ ပျောက်ဆုံးစာရင်းဝင်သည်။ အလွန်အေးမြသောပင်လယ်ရေနှင့် ပြင်းထန်သောလှိုင်းပုတ်မှုကို အံ့တုနိုင်စွမ်းမရှိခဲ့ကြ။

ယခုအခါ ပြတိုက်ပြုလုပ်ထားသောအကျဉ်းထောင်ဟောင်းပေါ်သို့ သဘောင်္ဖြင့် သွားရောက်လည်ပတ်နိုင်သလို သဘောင်္ဖြင့်ပင် ကျွန်းတစ်ပတ်ပတ်၊ ရွှေတံတားကြီးအောက်မှဖြတ်၍ ဆန်ဖရန်စစ္စကိုမြို့၏ ရင်သတ်ရှုမောရှုခင်းများကို အဝေးမှကြည့်ရှုခံစားနိုင်သည်။ နာမည်ကျော် ဂျိန်းစဘွန်းမင်းသားကြီး ရှောင်ကွန်နရီသရုပ်ဆောင်ခဲ့သည့် The Rock အမည်ရှိ အကျဉ်းထောင်ရုပ်ရှင်ကားသည် သည်ကျွန်းကိုအခြေပြု၍ ရိုက်ကူးခဲ့သည်။

(၃) တောင်ကုန်းညီနောင် (Twin Peaks)

အမြင့်ပေ(၉၂၅)ပေမြင့်သော တောင်ကုန်းညီနောင်သည် ဆန်ဖရန်စစ္စကိုမြို့တစ်မြို့လုံးနည်းပါးကို မြင်တွေ့ရသည့်နေရာဖြစ်၏။ တချိန်က အိုလိုနီလူရိုင်းတို့အမဲလိုက်ရာတွင် အပေါ်စီးမြင်ကွင်းအဖြစ်အသုံးပြုခဲ့ရာဖြစ်သော သည်နေရာသည် ဆန်ဖရန်စစ္စကိုမြင်ကွင်းကျယ်ကြိုက်သူများအတွက် မရောက်မဖြစ်ရောက်ရမည့်နေရာဖြစ်၏။ မနက်ပိုင်းနှင့် ညနေပိုင်းဆိုလျှင် မြူများဖုံးနေ၍  မြို့ကိုမမြင်ရတတ်သောကြောင့် နေ့ခင်းပိုင်းတွင် သွားသင့်သည်။

(၄)ဂိုးလ်ဒင်းဂိတ်ပန်းခြံ (Golden Gate Park)

အရှေ့မှအနောက်သို့ သုံးမိုင်ကျော်ရှည်လျှား၍ တောင်မှမြောက်သို့ မိုင်ဝက်ခန့်ကျယ်သော ဤပန်းခြံကြီးကို ၁၈၇၁ခုနှစ်မှစ၍ စတင်အကောင်အထည်ဖေါ်ခဲ့သည်။ မြေဧက တစ်ထောင်ကျော်အကျယ်အဝန်းရှိသည်။ နယူးယောခ်မြို့ရှိဗဟိုပန်းခြံကြီး (Central Park) ထက် နှစ်ဆယ်ရာနှုန်းကျော်ပိုမိုကျယ်ဝန်းပြီး နှစ်စဉ် လူဦးရေ (၁၃)သန်းကျော်လာရောက်လည်ပတ်ကြသည်။ အပင်ပေါင်း တစ်သိန်းခွဲခန့်စတင်စိုက်ပျိုးပြုစုခဲ့ရာမှ ယခုအခါ တောအုပ်ကြီးများ၊ ပန်းမျိုးစုံ၊ ရေကန်ကြီးငယ်များ၊ ကလေးကစားကွင်းများ၊ ငှက်တိရိစ္ဆာန်များဖြင့် သာယာလျှက်ရှိ၏။မြို့ပြ၏ မွန်းကျပ်မှုကို ရှောင်တိမ်းလိုသူတို့အတွက် အကောင်းဆုံးနေရာဖြစ်၏။ မြို့ထဲမှာ တောအုပ်ကြီးဖြစ်အောင် ဖန်တည်းထားသည်။ ပန်းခြံ၏ အနောက်ဖက်အစွန်းသည် ပစိဖိတ်သမုဒ္ဒရာအထိ ကျယ်ဝန်းသဖြင့် ပန်းခြံမှထွက်၍ ကမ်းခြေတလျှောက် လမ်းလျှောက်နိုင်သည်။ ပနိးခြံထဲတွင်အနုပညာဆိုင်ရာ၊ သိပ္ပံဆိုင်ရာ ပြတိုက်ကြီးများလည်းတည်ဆောက်ထားသည်။

ဤနေရာသည် ၁၉၀၆ခုနှစ် ဆန်ဖရန်စစ္စကိုငလျှင်ကြီးအပြီးတွင် ဒုက္ခသည်နှစ်သောင်းအား ယာယီအိမ်ရာများတည်ဆောက်ပေးခဲ့သည့် နေရာလည်းဖြစ်သည်။ တေးဂီတပွဲတော်များလည်း မကြာခဏ ကျင်းပရာနေရာဖြစ်သည်။

(၅) အနုပညာမြောက်နန်းတော်နေရာ (Palace of Fine Arts)

ရောမနှင့်ရှေးဟောင်းဂရိနန်းတော်ဟောင်းကြီးပုံစံ တည်ဆောက်ထားသည်။ ၁၉၁၅တွင်ကျင်းပခဲ့သော ပနားမား ပစိဖိတ် ကုန်စည်ပြပွဲအတွက် အဆောက်အဦပေါင်းများစွာတည်ဆောက်ခဲ့ရာမှ တစ်ခုဖြစ်၏။ ပွဲကြီးအပြီးတွင် အခြားလက်ရာများစွာကို ဖြိုချဖျက်စီးခဲ့သော်လည်း ဤနန်းတော်ဟောင်းပုံစံ အဆောက်အဦးကြီးကို မဖျက်ဆီးလိုသောသူများက စောင့်ရှောက်ပြင်ဆင်ထိန်းသိမ်းခဲ့ရာမှ ယနေ့တိုင် မြင်တွေ့နေရဆဲဖြစ်သည်။

ဓါတ်ပုံရိုက်ရန် အလွန်လှသောနေရာဖြစ်၍ မင်္ဂလာဆောင်ကြမည့်သူများ မရောက်မဖြစ် ရောက်အောင်လာ၍ ရိုက်ကြရသည်။ မရင်နာ (Marina) ခေါ် ပင်လယ်ဆိပ်ကမ်းလမ်းတစ်လျှောက် လမ်းလျှောက်ရင်း လေကောင်းလေသန့်ရှုနိုင်သည်။

(၆) တံငါဆိပ် (Fishermen’s Wharf)

၁၈၀ဝပြည့်၏ နှောင်းပိုင်းတွင်ရောက်ရှိလာသူ အီတလီနိုင်ငံသားတံငါသည်များ စတင်အခြေချရာမှ တံငါဆိပ်ဖြစ်ပေါ်လာသည်။ ထိုသူတို့သည် ဆန်ဖရန်စစ္စကို မြောက်ပိုင်းကမ်းခြေတွင်နေထိုင်ရာမှ North Beach ရပ်ကွက် ဖြစ်တည်လာသည်။ ထိုနေရာကို ဒေါ်လာ(၁၅)သန်းအကုန်အကျခံကာ ကမ္ဘာလှည့်ခရီးသွားများ စိတ်ဝင်စားလာရေးအတွက် ပြင်ဆင်ခဲ့ကြသည်။

ဆိပ်ကမ်းအမှတ်(၃၉) တည်ရှိရာဖြစ်၍ Pier 39 ဟုလည်းခေါ်သောသည်နေရာနှင့်တဆက်တည်းတွင် အမျိုးသားရေကြောင်းသမိုင်းပြတိုက်၊ ဒုတိယကမ္ဘစစ်ကအသုံးပြုခဲ့သည့် ရေငုတ်သဘောင်္ဟောင်း (USS Pampanito)၊ ၁၉ရာစုက အသုံးပြုခဲ့သည့် ကုန်ပစ္စည်းတင်သဘောင်္ (Balclutha ) စသည်တို့ကိုပါ တွေ့မြင်နိုင်သည်။ ပင်လယ်ဖျံကြီးများ (Sea Lion)သည်လည်း ဆိပ်ကမ်းတစ်ဝိုက်တွင်နေထိုင်ကြသည်။ ပင်လယ်ပြင်မှ ပြန်လည်ဆိုက်ရောက်လာသော ငါးဖမ်းလှေများလည်း နေ့စဉ်ဆိုက်ကပ်နေဆဲဖြစ်၍ လတ်ဆတ်သော ပင်လယ်စာများ ရရှိသည်။ ပင်လယ်ဂဏန်းကြီးများသည် အလွန်အရသာထူးကဲလှသည်။ အမှတ်တရပစ္စည်းအရောင်းဆိုင်များ၊ ပြခန်းများစွာဖြင့် အလွန်စည်ကားသည်။ လွတ်လပ်ရေးနေ့တွင် မီးရှူးမီးပန်းပစ်ဖေါက်ရာနေရာဖြစ်၏။

(၇)ကေဘယ်လ်ကား (Cable Car)

ဆန်ဖရန်စစ္စကိုရောက်လျှင် ကေဘယ်လ်ကားစီးရန်လည်း မမေ့ပါနှင့်။  မော်တော်ကားကဲ့သို့ စက်မပါပဲ မီးရထားလမ်းအောက်တွင် ရွေ့လျှားနေသော ကေဘယ်လ်ကြိုးကြီးဖြင့် ချိတ်ဆက်မောင်းနှင်ခြင်းဖြစ်၏။ ထို့ကြောင့် တစ်နာရီ(၁၃)မိုင်သာသာ အလွန်နှေးသောနှုန်းဖြင့်သာ ရွေ့လျှားသည်။

မြင့်မားသောတောင်ကုန်းများကြောင့် မြင်းလှည်းများလန်ကျ၍ မကြာခဏဒုက္ခဖြစ်ရာမှေ၁၈၇၃တွင် ကေဘယ်လ်ကားပေါ်ပေါက်ခဲ့သည်။ ၁၈၉၀အထိ လိုင်းပေါင်း (၂၃)လိုင်းရှိခဲ့သော်လည်း နှစ်တစ်ရာကျော်ခန့်ကြာသောအခါ လိုင်းသုံးလိုင်းသာ ကျန်ရှိသည်။ နေ့စဉ်လူနှစ်သောင်းခန့်ကိုပို့ဆောင်ပေးနေသောကြောင့် နှစ်စဉ်လူခုနှစ်သန်းခန့် စီးနင်းလိုက်ပါသည်။ ကေဘယ်လ်ကားပြတိုက်သို့လည်း ဝင်ရောက်ကြည့်ရှုနိုင်သည်။ မတ်စောက်သောတောင်ကုန်းများပေါ်တွင် တည်ဆောက်ထားသဖြင့် ကားစီးရင်း သဘာဝရှုခင်းကို ခံစားနိုင်သည်။ ယူနီယံစကွဲမှ တံငါဆိပ်အထိကေဘယ်လ်ကားလမ်းသည် ခရီးသည်များအကြိုက်တွေ့ကာ အထင်ရှားဆုံးဖြစ်၏။

(၈)ယူနီယံစကွဲ (Union Square)

မြို့လည်ရှိ ပန်းခြံလေးတစ်ခုဖြစ်၏။ Shopping သမားတို့အကြိုက်ဖြစ်၍ အမျိုးသမီးထုအတွက် မရောက်မဖြစ်။ အလုပ်သမားသမဂ္ဂများကို ထောက်ခံသူတို့စုဝေးရာနေရာဖြစ်၍ Union Square ဟု ခေါ်တွင်သည်။ စီးပွားရေးရပ်ကွက် (Financial District)၊ တရုတ်တန်း (Chinatown )တို့နှင့် ကပ်လျှက်တည်ရှိသည်။ ဟော်တယ်ကြီးများ၊ ဈေးဝယ်စင်တာများ၊ ပြဇာတ်ရုံများ၊ စားသောက်ဆိုင်များ အနီးအနားတွင်ရှိသည်။ တံငါဆိပ်သွားရာ ကေဘယ်လ်ကားဂိတ် စတင်သည့်နေရာဖြစ်သည်။ ပန်းခြံအလယ်တွင် နိုက်ကီ(Nike) ဟုအမည်ရသည့် အောင်မြင်ခြင်းကိုကိုယ်စားပြုသော ဂရိနတ်ဘုရားမ၏ ရုပ်ထုကိုကျောက်တိုင်ထိပ်တွင် မြင်တွေ့နိုင်သည်။ (ကမ္ဘာကျော်ဖိနပ်တံဆိပ်သည် ထို Nike ခေါ် အောင်မြင်ခြင်းဂရိနတ်ဘုရားမ၏ အမည်ပင် ဖြစ်ပါ၏။)

(၉)တရုတ်တန်း (Chinatown)

အမေရိကန်ပြည်ထောင်စုရှိ တရုတ်တန်းများတွင် ရှေးအကျဆုံးဖြစ်သည်။ မိုင်ဝက်ပတ်လည်အလျှားအနံရှိ စတုရန်းပုံသဏ္ဍန်ရှိ ဆန်ဖရန်စစ္စကိုတရုတ်တန်းသည် မြောက်အမေရိကတိုက်တွင် အကြီးမားဆုံးလည်း ဖြစ်သည်။ ဤနေရာကျဉ်းလေးတွင် နေထိုင်ကြသူ လေးသောင်းနီးပါးရှိသဖြင့် နယူးယော့ခ်မြို့၏ မဟက်တန်ရပ်ကွက်မှလွဲလျှင် အမေရိကန်ပြည်ထောင်စု၌ လူနေသိပ်သည်းမှုအများဆုံးဖြစ်၏။ မိသားစုများ စုစုပေါင်း၏ သုံးပုံနှစ်ပုံသည် ဟော်တယ်ခန်းအရွယ်အခန်းငယ်များတွင် နေထိုင်ကြသည်။ တစ်နှစ်ဝင်ငွေ နှစ်သောင်းခန့်သာရှိသဖြင့် ဝင်ငွေအလွန်နည်းပါးကြသည်။ နေထိုင်သူစုစုပေါင်း၏ ရာနှုန်းပြည့်နီးပါးမှာလည်း တရုတ်လူမျိုးများ သို့မဟုတ် အာရှတိုက်သားများပင် ဖြစ်ကြသည်။ ချမ်းသာသူတရုတ်အများစုကမူ Sunset၊ Richmond စသည့် ပင်လယ်နှင့်နီးသောရပ်ကွက်များတွင် နေထိုင်ကြသည်။ တရုတ်တန်း၏ သမိုင်းကြောင်းမှာ ရှည်လျှားလှသည်။

ဂရန့်လမ်း( Grant Avenue) ပေါ်ရှိ တရုတ်တန်း၏အဝင်ပေါက်တစ်ခုပေါ်ရှိ နဂါးဂိတ် (Dragon Gate) သည် အလှဓါတ်ပုံရိုက်သူတို့အတွက် မျက်စိကျစရာနေရာဖြစ်သည်။ နှစ်တစ်ရာကျော်ပြီဖြစ်သည့် တရုတ်ရှေးဟောင်းလက်ရာ လမ်းမီးတိုင်ကြီးများကိုလည်း တွေ့နိုင်သည်။ တရုတ်ရိုးရာအစားအစာများကိုလည်း ဈေးနှုန်းသက်သာစွာ စားသုံးနိုင်သည်။ အမှတ်တရပစ္စည်းဆိုင်များ၊ ရှေးဟောင်းတရုတ်ဘုရားကျောင်းများ ရှိသည်။

ကမ္ဘာကျော် ကွန်ဖူးဘုရင် ဘရုစလီ ( Bruce Lee) မွေးဖွားခဲ့ရာ တရုတ်ဆေးရုံ (San Francisco Chinese Hospital) ကိုလည်းတွေ့မြင်နိုင်မည်။ ဘရုစလီသည် ထိုဆေးရုံတွင်မွေးဖွားခဲ့ပြီး ဆန်ဖရန်တဖက်ကမ်းရှိ ဥက္ကလံမြို့တွင် ကလေးဘဝက နေထိုင်ခဲ့သည်။ ကိုးနှစ်သားအရွယ်တွင် ဟောင်ကောင်သို့ ပြောင်းရွှေ့သွားကာ အသက်(၁၈)နှစ်အရွယ်တွင် အမေရိကန်ပြည်ထောင်စုသို့ပြန်လည်ရောက်ရှိလာပြီး ဆန်ဖရန်တရုတ်တန်း၌ လအနည်းငယ်နေထိုင်ပြီးနောက် ဆီရားတယ် (Seattle)မြို့သို့ ပြောင်းရွှေ့သွားခဲ့သည်။

(၁၀) ကွိုက်တာဝါ (Coit Tower)

မြို့မြောက်ဖက်ရှိ North Beach ရပ်ကွက်ရှိ တယ်လီဂရပ်တောင်ကုန်း (Telegraph Hill ) ပေါ်တွင်တည်ရှိသည်။ ပေပေါင်း (၂၁၀)အမြင့်ရှိသော ကွန်ဂရိတာဝါတိုင်ကြီးဖြစ်သည်။ မြို့လယ် တစ်မြို့လုံးကို အပေါ်မှ   ၃၆၀ ဒီဂရီ အနေအထားဖြင့် တွေ့မြင်နိုင်သည်။ ၁၉၃၂-၃၃ တွင် မီးသတ်မျှော်စင်အဖြစ်အသုံးပြုရန် တည်ဆောက်ခဲ့သည်။ တယ်လီဂရပ်တောင်ကုန်း၏ လှေခါးထစ်များသည်လည်း မြင့်မားလှသဖြင့် ကျန်းမာရေးလိုက်စားသူများ၊ လမ်းလျှောက်သူများအကြိုက်တွေ့ကြသည်။

ထိုနေရာများအပြင် အကွေ့အကောက်များလှသဖြင့် ကမ္ဘာ့အကောက်ကွေ့ဆုံးလမ်းဟု တင်စားကြသည့် Lombard Street ၊ ဂျပန်တောင်း (Japantown)၊ မြို့တော်ခန်းမ (City Hall) ၊ ကုလသမဂ္ဂပလာဇာ (United Nation Plaza)၊ ဆန်ဖရန်ဆိပ်ကမ်းရှိ သမိုင်းဝင် Ferry Building ၊ Nob Hill တောင်ကုန်းပေါ်ရှိ သန်းကြွယ်သူဌေးကြီးများ၏ အိမ်များ၊ Cliff House ခေါ် ပင်လယ်အစွန်းကျောက်တုန်းကြီးပေါ်မှ အိမ်ကြီး၊ ကုန်းမြေ၏အဆုံး (Land End)ရှိ ပစိဖိတ်ကမ်းခြေ (Ocean Beach)၊ Sea Cliff မှ အိမ်ကြီးများ၊ Presidio ခေါ် ရေတပ်စခန်းဟောင်းတည်ရှိရာ တောအုပ်ကြီး စသည်ဖြင့် မြို့တွင်းလည်ပတ်စရာတွေ အများအပြား ကျန်ရှိနေသေးပါသည်။

ဆန်ဖရန်မြို့တွင်းကို အားရအောင်လည်ပတ်ပြီးလျှင် မြို့ပြင်နှင့်အနီးအနားတဝိုက်သို့ သွားလည်ကြပါစို့။ ဆန်ဖရန်စစ္စကို၏ နာမည်ကျော် ဂိုးလ်ဒင်းဂိတ်တံတားကြီးကို ကျော်ဖြတ်ပြီးမြောက်ဖက်သို့ (၁၂)မိုင်ခန့်ရောက်လျှင် နာမည်ကျော်မြူရာဝုဒ် ( Muir Wood)အမည်ရ သဘာဝသစ်တောကြီးရှိသည်။

ထိုသစ်တောကြီးသည် အမေရိကန်ပြည်ထောင်စု၏ အမျိုးသားအထိမ်းအမှတ်အဖြစ် ထားရှိရာသစ်တောကြီးဖြစ်၍ ဧကပေါင်း (၅၅၄)ဧက ကျယ်ဝန်းသည်။ ဝက်သစ်ချပင်များ၊ မဟော်ဂနီပင်များသည် နေပျောက်မထိုးနိုင်အောင် အကိုင်းအခက်များက ယှက်ဖြာနေကြသည်။ တောင်တန်းကြီးပေါ်မှ ဆန်ဖရန်၏ အဝေးမြင်ရှုခင်းနှင့် ပစိဖိတ်သမုဒ္ဒရာကမ်းခြေကြီးကို အလျှားလိုက်မြင်နိုင်သည်။ အနီးအနားရှိ ကမ်းခြေ(Beaches)များသည်လည်း အလွန်သာယာလှပသလို သန့်ရှင်းသည်။ တစ်နှစ်လျှင် ဧည့်သည်တစ်သန်းကျော် လာရောက်လေ့လာကြသည်။

မြို့၏တောင်ဖက်တွင် ဆန်ဘရူနို(San Bruno)တောင်တန်းကြီးက ကန့်လန့်ဖြတ်တည်ရှိသဖြင့် ခြေလျှင်တောင်တက်သမားများအကြိုက်တွေ့ကြသည်။ မြို့မှထွက်၍ အဝေးပြေးလမ်းမ I-280 အတိုင်း(၁၀)မိုင်ခန့်ဆင်းလာလျှင် လမ်း၏ညာဖက်၌ ပစိဖိတ်မြေသားအပိုင်း ( Pacific Plate) နှင့် အမေရိကမြေသားအပိုင်း (America Plate)တို့ဆုံရာ ဆန်အန်ဒရေးရ ( San Andreas) အမည်ရှိ ငလျှင်ကြော (Fault line) ကြီးကို မြင်တွေ့နိုင်သည်။ ထိုငလျှင်ကြောကြောင့် ၁၉၀၆ခု ငလျှင်ကြီးဖြစ်ပေါ်ခဲ့ခြင်းဖြစ်၏။ တောင်မှမြောက်၊ မြောက်မှတောင် တွန်းနေကြသော မြေသားအပိုင်းနှစ်ခုသည် တစ်နှစ်လျှင် တစ်လက်မခန့် ဆန့်ကျင်ဖက်သို့ ရွေ့လျှားနေကြသည်။ နှစ်နှစ်ရာလျှင် တစ်ကြိမ်ခန့် ပျမ်းမျှအားဖြင့် ငလျှင်ဖြစ်ပေါ်လေ့ရှိသည်။

တောင်ဖက်သို့ မိုင်နှစ်ဆယ်ကျော်ဆက်သွားပါက ကမ္ဘာကျော်တက္ကသိုလ်ကြီးတစ်ခုဖြစ်သော စတန်းဖို့ဒ်တက္ကသိုလ်ကိုတွေ့ရမည်။ ထိုမှဆက်၍ တောင်ဖက်သို့အနည်းငယ်ဆက်သွားပါက ကမ္ဘာကျော်ဂူဂဲလ်(Google)ဖေ့ဘွတ် (Facebook) စသည့်ကုမ္ပဏီရုံးချုပ်များကိုတွေ့ရမည်။ ပန်းသီးရုံးချုပ်( Apple Headquarter) ကြီးနှင့် ရာဟူးရုံးချုပ် (Yahoo! Headquarter) တို့ကိုတွေ့ရမည်။ ထိုနေရာတို့ကား ဆီလီကွန်တောင်ကြား (Silicon Valley) ဒေသပင်တည်း။ ကမ္ဘာ့အဆင့်မြင့်နည်းပညာများကို ဖြန့်ချီရာ၊ ထိန်းချုပ်ရာ ထိုဒေသသည် ဆန်ဖရန်ပင်လယ်ကွေ့ (San Francisco Bay Area) ဒေသတွင် ရှိသည်။

ဆန်ဖရန်စစ္စကိုအနီးတစ်ဝိုက်တွင် လည်ပတ်စရာတွေ များလှသဖြင့် ကုန်စင်အောင်မရေးပြနိုင်ပါ။

သည်မျှဆိုလျှင် ဆန်ဖရန်စစ္စကိုနှင့်ပတ်သက်၍ အတန်အသင့်သော ဗဟုသုတများကို ခြုံငုံမိပြီထင်ပါသည်။ သမိုင်းဆရာမဟုတ်သည်မို့ အကျဉ်းချုံးရေးရာတွင် လိုအပ်ချက်များရှိပါက ခွင့်လွှတ်ပါ။

အချုပ်အားဖြင့်ဆိုရသော် ဆန်ဖရန်စစ္စကိုမြို့သည် လူမျိုးပေါင်းစုံ၊ ဘာသာပေါင်းစုံ၊ အတန်းအစားပေါင်းစုံ စုရုံးနေထိုင်သောမြို့တစ်မြို့သာဖြစ်သည်။ သဘာဝဘေးဒါဏ်ကို အကြိမ်ကြိမ်ခံစားခဲ့ရသည်။ မြို့လုံးကျွတ်နီးပါး မီးဘေးသင့်ခဲ့သည်။ အကြိမ်ကြိမ်ပြိုလဲခဲ့သော်လည်း မြို့သူမြို့သားများသည် မတူညီသောအရာများမှ ခွန်အားတစ်ရပ်ဖေါ်ဆောင်ကာ ပြန်လည်တည်ဆောက်ခဲ့ကြသည်။ အမုန်းတရားများကို ချစ်ခြင်းအားအဖြစ် ပြောင်းလည်းနိုင်ခဲ့သည်။ ခရစ်ယာန်၊ ဗုဒ္ဓ၊ ဟိန္နူ၊ အစ္စလ္လမ်၊ လူဖြူ၊ လူမဲ၊ လူဝါ၊ ကျား၊ မ၊ လိင်တူချစ်သူ ဟူသည့် အမည်နာမများမှ ဖေါက်ထွက်ကာ အရည်အချင်းရှိသူကို အရည်အချင်းရှိသလို နေရာပေးနိုင်သော အခြေအနေတစ်ရပ်ကို ဖန်တည်းနိုင်ခဲ့သည်။

ထို့ကြောင့်လည်း မတူညီမှုများညီညွတ်ခဲ့သည့်ဆန်ဖရန်စစ္စကိုမှ လူဖြူခေါင်းဆောင်များအပြင် အာရှနွယ်ဖွားမြို့တော်ဝန်၊ လူမဲအမျိုးသမီးမြို့တော်ဝန်၊ အမျိုးသမီးရဲချုပ်၊ အမျိုးသမီးမီးသတ်ဦးစီးချုပ်၊ လိင်တူချစ်သူ ရပ်ကွက်အုပ်ချုပ်ရေးမှူး စသည်တို့ ထွက်ပေါ်ခဲ့သလို ကမ္ဘာပေါ်ရှိ အနယ်နယ်အရပ်ရပ်မှ အခြေချရန်ရောက်ရှိလာကြသည့် သူမှန်သမျှကို နွေးထွေးစွာဖြင့် ကြိုဆို နေဆဲဖြစ်သည်။မည်သူဖြစ်စေ ဥပဒေအောက်တွင် လူတိုင်းကို ညီမျှစွာအခွင့်အရေးရစေသည်။ ထို့ကြောင့်လည်း ဆန်ဖရန်စစ္စကိုမြို့သို့ လာလည်ကြသူဧည့်သည်အပေါင်းမှာ ဝင်လာမစဲတသဲသဲ။ မြို့၏နာမည်သည်လည်း ကမ္ဘာ့အလည်တွင် ထွန်းတောက်နေဆဲ။

ကျွန်တော်တို့ မြန်မာပြည်တွင်လည်း လူမျိုးပေါင်းစုံ ဘာသာပေါင်းစုံ မှီတင်းနေကြသည်။ ခုချိန်ထိတော့ တိုက်ကြခိုက်ကြ ဆဲကြဆိုကြသည့် အမုန်းကမ္ဘာထဲမှ မထွက်နိုင်ကြသေး။ မယုံကြည်မှုများစွာမှ ဖေါက်မထွက်နိုင်ကြသေး။ မတူညီမှုတွေကို အားတစ်ခုဖြစ်လာရန် ညီညွတ်စွာ မတည်ဆောက်နိုင်ကြသေး။ တစ်နေ့နေ့မှာတော့ ထိုညီညွတ်မှုကို မြင်ရနိုင်ကောင်းပါသည်။ ထိုနေ့ကို မျှော်လင့်ရင်းဖြင့် ဆန်ဖရန်စစ္စကိုဆောင်းပါးရှည်ကြီးကို အဆုံးသတ်လိုက်ပါရစေ။

ချစ်သော မိတ်ဆွေသူငယ်ချင်းအပေါင်း ကျန်းမာချမ်းသာကြပါစေ။

ကျွန်တော်မောင်လူပေပါ။

ချစ်တဲ့

မောင်လူပေ