အရှိအတိုင်း

အရှိကိုအရှိအတိုင်း

' သင်္ကြန်နှစ်ဦး တူးပို့တူးပို့ '  သင်္ကြန်သီချင်းများ ဖွင့်နေကြသည်။ နွေကလည်း ပူစွ။ မကြာခင် သင်္ကြန်ကျပြီပေါ့။

သင်္ကြန်တေးတွေ လွှမ်းနေတဲ့ လမ်းမပေါ်မှာ လမ်းလျှောက်လာနေသော မောင်လူပေလည်း အတွေးတွေကြွယ်မိသည်။

သင်္ကြန်ဆိုတာ ကူးပြောင်းခြင်းလို့ အဓိပ္ပါယ်ရသတဲ့။ နှစ်ဟောင်းကနေ နှစ်သစ်ကို ကူးပြောင်းခြင်းပေါ့။ နှစ်ဟောင်းကနေ နှစ်သစ်ပြောင်းသလို သင်္ကြန်မှာမွေးခဲ့တဲ့မောင်လူပေလည်း လူဟောင်းကနေ လူသစ်ပြောင်းချင်းတာ။ လူဟောင်းကြီးကို ရာဝင်အိုးထဲမှာထားခဲ့ .. အဲလေ.. ရာဇဝင်ထဲမှာထားခဲ့ပြီး လူသစ်ပြောင်းလို့ရမယ်ဆို သိပ်ကောင်းမည်။

လူဟောင်းကြီးက ငါးထိပ်စီးမို့ အတော်ဟောင်းနွမ်းနေပြီ။ အော်ရဂျင်နယ်အန်းတိတ်ကြီးပေါ့။ နောက်ဆုံးပေါ်မော်ဒယ်လေးတွေလို မသွက်လက်တော့။ သံရည်ကျိုဖို့ သင့်နေပြီ။ ကားဟောင်းလို ပြန်အပ်ပြီး စလစ်ထုတ်လို့ရရင် ကောင်းမည်။ မော်ဒယ်ခပ်လတ်လတ်လေးနဲ့ လဲချင်သည်။

ဒီလိုဒီပုံတွေးမိတော့ အတော်စိတ်ပိန်ရ၏။ ငါးနဲ့နှစ်ကို ရှေ့နောက်ပြောင်းပြီး ၂၅ လောက်လုပ်လို့ရရင်ကောင်းမယ်။ ဘွဲ့ရကာစအရွယ်။ ကလပ်သွားဖို့ အကောင်းဆုံးအရွယ်။ ဘီယာဆိုင်မှာ ငြိမ့်ကောင်းမဲ့အရွယ်။ ကာရာအိုကေမှာ ဟဲလို့ကောင်းမဲ့အရွယ်။ အလုပ်အကိုင်ကောင်းများရှိရင် သမီးရှင်တွေ ဖြတ်ဖြတ်လူးမဲ့အရွယ်။ ရီးစားထားဖို့ အကောင်းဆုံးအရွယ်။ ဒီလိုအတွေးများစွာနဲ့ တယောက်ထဲ လမ်းလျှောက်နေတုန်း ကိုယ့်ရှေ့တည့်တည့်က လမ်းလျှောက်လာနေသူကို သတိထားမိ၏။  လား...လား။ သကြားမင်းယူနီဖေါင်း မဝတ်ထားတဲ့ သကြားမင်းကြီးဦးမာဃ ပါလား။ စတိုင်အပြည့်နဲ့။ နေကာမျက်မှန်ကြီးတတ်လို့။ မြင်နေကြ သကြားမင်း ယူနီဖေါင်းတော့မဟုတ်။

မနှစ်က သင်္ကြန်ပြီးလို့ ပြန်အတက်မှာ မောင်လူပေနဲ့တွေ့ခဲ့ဖူးတာကို အမှတ်တရ ရေးဖူးခဲ့၏။ ဒါကြောင့်လည်း သူ့ကိုမြင်မြင်ချင်းပဲ မှတ်မိသည်။

" ဦးမာဃ၊ ဦးမာဃ ဘယ်တုန်းက ရောက်နေတာလဲဗျ။"
"အလို.. မောင်လူပေ။ တွေ့မှတွေ့တတ်ပလေကွယ်။ အတော်ပဲ။ ကျုပ်လည်း မောင်ရင်လေးကိုတွေ့ချင်နေတာ။ တနေရာမှာ စကားပြောကြစို့။"

ဒီလိုနဲ့ နှစ်ယောက်သား အနီးဆုံး လမ်းဘေးလက်ဖက်ရည်ဆိုင်လေးမှာ ဝင်ထိုင်ဖြစ်သည်။

" လက်ရှိအသက်ကို ပြောင်းပြန်လုပ်ချင်နေတဲ့ မောင်လူပေ။ စိတ်ကူးတွေယဉ်နေတာ များတယ်မထင်ဘူးလားကွ။"

ဦးမာဃကြီးက လက်ဖက်ရည်ပေါ့ကျနှစ်ခွက်မှာပြီး လက်ဖက်ရည်ကြမ်းငှဲ့ပေးရင်း ပြောလိုက်၏။

သူက မောင်လူပေ့အတွေးတွေကိုပါ ကြိုသိနေပုံရသည်။ စီအိုင်ဒီကပုလိပ်တွေကို သူ့ဆီမှာ သင်တန်းတက်ခိုင်းသင့်တယ်လို့ တွေးမိသေးရဲ့။

" အေးဗျာ။ ဦးမာဃကြီးပြောရင်လည်း ခံရတော့မှာပဲ။ အခုတလော အတော်ချူချာနေလို့ စိတ်ဓါတ်ကြနေတာ။ ဒါကြောင့်လည်း ငါးနဲ့နှစ်နံပါတ်နှစ်လုံး ရှေ့နောက်ပြောင်းရင် ကောင်းမလား စဉ်းစားမိတာပါ။"
" ဒါ သဘာဝလေကွယ်။ မင်းတွေ့တဲ့အခု မာဃလည်း မနှစ်ကတွေ့ခဲ့တဲ့မာဃထက် တနှစ်အသက်ပိုကြီးသွားပါပြီ။ နေရမဲ့နှစ် တနှစ်တိုသွားပါပြီပေါ့ကွာ။ မင်းပြောသလို နံပါတ်တွေပြောင်းပြန်ရေးလည်း လူကတော့ မပြောင်းလည်းနိုင်တော့ပါဘူး။ အရှိကို အရှိအတိုင်း လက်ခံနိုင်ဖို့ပဲ လိုတာပါ။"

" ဟုတ်ကဲ့။ မဖြစ်နိုင်တာကို ဖြစ်န်ုင်မယ်ထင်ပြီးမတွေးတော့ပါဘူး။ ဦးမာဃကြီးပြောသလိုပဲ အရှိအတိုင်းမြင်နိုင်အောင်ကြိုးစားပါ့မယ်။ "
" အဲဒါအကောင်းဆုံးပဲကွ။ သီချင်းထဲကလိုပေါ့။ အရှိကိုအရှိတိုင်းသာ ဆင်ခြင်ပါ။ "

ကျွန်တော်တို့နှစ်ယောက် အားပါးတရ စကားတွေပြောနေကြတာ အသံကျယ်နေလို့လားမသိ။ ဘေးဝိုင်းတွေကလူတချို့က ကွက်ကြည့်ကွက်ကြည့် လုပ်နေကြသည်။ ဒါကိုသတိထားမိဟန်တူတဲ့ ဦးမာဃကြီးက သတိပေးသည်။

" မင်းက ဦးမာဃ ဦးမာဃ နဲ့ခေါ်သံကြားလို့လားမသိဘူး။ ဘေးကလူတွေ ကြည့်နေကြတယ်။ တိုးတိုးပြော။ " တဲ့။

ကျွန်တော်လည်း ဒီတော့မှပဲ အသံနှိမ့်ပြီး ပြောရသည်။

" ဟုတ်ကဲ့။ ဆင်ချင်ပါ့မယ်။ ဒါနဲ့ ဦးမာဃကြီးက ဘယ်လိုလုပ်ပြီး သင်္ကြန်မတိုင်ခင် မြန်မာပြည်ထဲရောက်နေတာလဲ။ ပြီးတော့သကြားမင်း ဘူစီဖေါင်း အဲ.. ယူနီဖောင်းလည်း ဝတ်မထားဘူး။ "
" ဖြေးဖြေးမေးပါကွာ။ ဖြေပါ့မယ်။ မင်းတို့ဆီက မြန်မာအိုင်ဒေါဖိုင်နယ်နေ့ထဲကရောက်နေတာကွ။ "

" ဗျာ။ ဦးမာဃကြီးက အိုင်ဒေါလည်းသိတာပဲလား။"
" သိတာပေ့ါကွာ။ တို့ဆီမှာလည်း မြန်မာအိုင်ဒေါက နာမည်ကြီးပဲ။ တီဗီကအိုင်ဒေါပြမဲ့နေ့ဆို နတ်သဘင်အစည်းအဝေးတောင် ရက်ရွှေ့ပေးရတယ်။ နတ်သမီးနတ်သားတွေ မတက်ကြလို့။ နတ်သားတွေက အန်ကယ်ကြီးစတိုင်လိုက်ဝတ်ကြတာတောင် ခေတ်စားနေတယ်။"

သူပြောမှ သတိထားမိသည်။ ဦးမာဃကြီးဝတ်ထားတဲ့စတိုင်က အန်ကယ်ကြီးအလား။ နေမပူတဲ့အရိပ်ထဲထိ နေကာမျက်မှန်ကြီးလည်း မချွတ်။

" ဒါနဲ့ ဦးမာဃကိုယ်တိုင် အိုင်ဒေါဖိုင်နယ်ပွဲအမှီ ဆင်းလာခဲ့ရတယ် ဆိုပါတော့။"
" မင်းတို့မြန်မာအိုင်ဒေါက အတော်ဒုက္ခပေးသကွဲ့။ ရဲနောင်၊ဇင်ကြီး၊ ပိုးမီ၊ ဘီလီ၊ သားငယ် ဆိုပြီး နတ်သမီးနတ်သားတွေ ကွဲကြပြဲကြ။ တချို့ဆို ထသတ်ကြလို့ တရားရုံးတွေရောက်။ နောက်ဆုံးဖိုင်နယ်ပွဲအထိ သားငယ်၊ ဘီလီကွဲကြတုန်း။ ငါက ဘီလီ၊ ငါ့မိဘုရားကြီးသုစိတ္တာက သားငယ်၊ အဲ့ဒီလိုတွေဖြစ်ကြတာ။ အမ်ပီတီကငွေဖြည့်ကပ်တွေနဲ့ မဲတွေပေးလိုက်ရလို့ ငါ့ဘဏ္ဍာတိုက်တောင် အတော်ထိသွားတယ်။ နောက်ဆုံး ဝင်းနား(winner) ကတော့ အမ်ပီတီပေါ့ကွာ။ သူ့အိပ်ထဲကို ငွေတွေ လှိမ့်ဝင်သွားတာပေါ့။ "

" ဦးမာဃတို့ဆီရော အမ်ပီတီက သက်ရောက်လား။"
" တို့ဆီတော့ အမ်ပီတီမရှိဘူးပေါ့ကွာ။ တို့ဆီမှာတော့ တီတီကွန်းတဲ့။ တာဝတိံသာ တယ်လီ ကွန်မြူနကေးရှင်း ( Tarwayainthar Telecommunications) ကိုသုံးတာ။ အင်တာနက်လိုင်းကလည်း အရမ်းမြန်။ ဖုန်းလိုင်းတွေက ဖိုက်ဂျီ(5G LTE) ။ ခက်တာက မြန်မာအိုင်ဒိုကိုမဲပေးဖို့ အမ်ပီတီဖုန်းနဲ့ပဲ လက်ခံတာမို့ အမ်ပီတီကို လုပ်ကျွေးလိုက်ရတာ။"

" ဒါဆို ဦးမာဃကြီးက ဘီလီကို လာအားပေးတာပေါ့။"
" အေးပေ့ါကွာ။ vacation လေးယူပြီး ကြိုဆင်းလာတာ။ မြန်မာအိုင်ဒေါလည်း ကြည့်ချင်တာပါတယ်။ မင်းတို့ဆီက ကွီးတွေနဲ့အပြိုင် ငါလည်း ဘီလီကို vote လုပ်တာပါပဲ။ ဒါပေမဲ့ ငါ့မဟေသီလေးပါးလုံးက သားငယ်မှသားငယ်ဖြစ်ကြလေတော့ တို့ကွီးတွေက မဲအရေအတွက်နည်းပြီး ဘီလီလေးရှုံးရရှာတာ။"

သူပြောမှသတိရသွားသည်။ ဦးမာဃကြီးမှာ တရားဝင်ဇနီးလေးယောက်နဲ့။ သုစိတ္တာ၊ သုနန္ဒာ၊ သုမာလာ၊ သုဇိတာ ဆိုလား။ ညီမအရင်းတွေ။ ဒီကြားထဲမှာ နတ်သားတွေအဝေမတည့်လို့ သူ့အတွက်ဆိုပြီးသိမ်းလိုက်တာတွေ၊ မာနတ်ကြီးသမီးကို ခိုးပြေးတာတွေ မပါသေး။ အတော်များတဲ့မယားတွေ သူ့မှာရှိသည်။

" အဲဒါ ဦးမာဃကြီး မိန်းမအများကြီးယူလို့ ဖြစ်ရတာ။ ဘီလီလေး ရှုံးရတာ။ "
" ငါ့ကြောင့်ပဲ ဘယ်ကမလဲ။ တို့ဆီက မောင်တွေက နတ်သားတစ်ယောက်ကို နတ်သမီးတစ်ဖက်ငါးရာနဲ့ နှစ်ဖက်တစ်ထောင် အနည်းဆုံးယူထားတဲ့ မောင်တွေမို့ ယောက်ျားတစ်မဲပဲ ဘီလီရပြီး ကျန်တဲ့ သူ့မိန်းမတွေ မဲတစ်ထောင်က သားငယ်ရသွားတာပဲကွာ။ "

ဒါကြောင့်ဖြစ်မည်။ သားငယ်တယောက် bottom three ခုံတွေမှာထိုင်ခဲ့ရတာ မရှိခဲ့။ တာဝတိံသာက နတ်သမီးတွေလက်ချက်ပင် ဖြစ်ရမည်။ ကွီးတွေဘယ်လောက်ပဲ ဘီလီကိုမဲပေးပေး သားငယ်ကိုအားပေးကြတဲ့ နတ်သမီးမဲတွေကို ကျော်လွှားနိုင်ဖို့ လမ်းမရှိ။ ဒါဟာ မြန်မာပြည်က အဘတွေလုပ်ခဲ့သလို မျိုးစောင့်ဥပဒေဆိုတာ တာဝတိံသာမှာ မရှိလို့ ဖြစ်ရတာ ဖြစ်မည်။

" ဒါဆိုရင် ဦးမာဃတို့ဆီလည်း ဒီမှာလို မျိုးစောင့်ဥပဒေလိုနေပြီ။"
" မလုပ်ပါနဲ့ကွာ။ ငါကိုယ်တိုင် ထောင်ထဲသွားနေရပါဦးမယ်။ တစ်ယောက်ပိုယူမိတိုင်းခုနှစ်နှစ်နှုန်းနဲ့သာဆိုရင် နှစ်ဆယ့်ရှစ်နှစ်တောင် ထောင်ကျမဲ့ကိန်းပဲ။ ဒါတောင် တရားဝင်တွေလေးယောက်ပဲတွက်ထားတာ။ တရားမဝင်စမောတွေမပါသေးဘူး။ တခြားနတ်သားတွေလည်း နှစ်ခုနှစ်ထောင်ကျော် ထောင်ထဲထည့်ထားရမဲ့သဘောဖြစ်နေတယ်။ ဒီအတိုင်းပဲရှိပါစေတော့။ နတ်သားတွေထောင်ကျနေရင် သာဝတိံသာကုန်ထုတ်စွမ်းအားထိခိုက်မယ်။ နတ်သားတယောက် ထောင်ကျတိုင်း ကျန်ခဲ့တဲ့ မိန်းမ တစ်ထောင်ကို တာဝတိံသာအစိုးရက တာဝန်ယူရရင်လည်း ငါ့အစိုးရ ဒေဝါလီခံရလိမ့်မယ်။ သူတို့အချင်းချင်း ကြေနပ်ရင် ပြီးတာပဲလို့ သဘောထားလိုက်။ ယုံထောင်ကြောင်မိတွေ ဖြစ်ကုန်မှာ။ "

" ဦးမာဃကြီးပြောတော့လည်း ဟုတ်သလိုလိုပဲ။ အရှိအတိုင်းပဲထားလိုက်ကြရတော့မှာပေါ့။"
" အေးလေ။ တာဝတိံသာကို အရှိအတိုင်းသာထားဖို့ပြောတာပါ။ ဒီမြန်မာပြည်ရောက်ရင်တော့ ငါလည်း မိန်းမများကြောင်း လူသိမခံရဲပါဘူး။ ဒါကြောင့် နှစ်တိုင်း ဘယ်မိန်းမမှမပါပဲ ဆင်းလာတာပေ့ါ။ မျိုးစောင့်ဥပဒေနဲ့ငြိတယ်ဆိုပြီး အချုပ်ထဲရောက်သွားရင် သင်္ကြန်အတက်မှာ တာဝတိံသာကို မပြန်တက်နိုင် ဖြစ်သွားနိုင်တယ်။"

" ဒါကြောင့် လူမသိအောင် ယူနီဖေါင်းမဝတ်ပဲ မာဖီနဲ့ အပီကဲလာတာပေါ့။ "
" မဟုတ်ပါဘူးကွာ။ ငါက သင်္ကြန်ရောက်မှ လူဆိုးတွေကို အိုင်ပက်အသစ်ကြီးနဲ့ နာမည်မှတ်တဲ့ဂျူတီကျမှာလေ။ ယူနီဖေါင်းက အဲဒီကြမှ ဝတ်ရမှာ။ အခုက vacation ခွင့်နဲ့နားနေတဲ့အချိန်။ ယူနီဖေါင်းကြီးတကားကား ဝတ်ထားဖို့မလိုဘူး။ ဒါကြောင့် တာဝတိံသာမှာ ခေတ်စားတဲ့ အန်ကယ်ကြီးစတိုင် ယူထားတာ။ မောင်ကျော်ထက်အောင်။ ကြိုက်လား။ "

" ကြိုက်ပါတယ်အန်ကယ်။ အန်ကယ်နဲ့ထပ်တူပါပဲ။ "
ဟဲဟဲဟဲ..... မင်းလည်း ငါ့လိုပဲ နောက်တတ်လာပြီ။ "

အန်ကယ်ကြီး၏ သိန်းတထောင်ဖက်ရှင်ကား သာဝတိံသာဘုံဖျားထိ ခေတ်စားလေစွတကား။ သကြားမင်းကြီးဦးမာဃတောင် လိုက်ဝတ်နေပြီဆိုတော့ တာဝတိံသာမှာဆို ပြောဖွယ်မရှိ။ အချစ်ဆုံးတေးချစ်သူကြီးတွေများတဲ့ ဦးမာဃကြီးအတွက် အန်ကယ်ကြီးဖက်ရှင်တွေ ထောင်ချီရှိပေလိမ့်မည်။ အရှိကို အရှိအတိုင်း တွေးမိခြင်းဖြစ်၏။

မောင်လူပေကား ညံ့ပေစွ။ အရှေ့ အနောက်တောင်မြောက် အရပ်လေးမျက်နှာက ပြေးကြည့်လျှင်လည်း မဒီကညာ ခေါ်စရာ အချစ်ဆုံးတေးချစ်သူဆိုလို့ မဒန်ပေတယောက်သာ ရှိသည်။မဒန်လေတို့ မဒန်ဝေတို့ မရှိခဲ့ရ။ အရှိကိုအရှိအတိုင်း ဝေဖန်ရလျှင် နှောင်းခဲ့ပြီပေ.. ဟုတ်ပေါင် နှောင်းခဲ့ပြီမောင်လူပေ..။

နောင်ဘဝမှာ ဦးမာဃကြီးလို မိန်းမအများကြီးရအောင် ခုထဲက ကုသိုလ်တွေပြုမှ။ သူကတော့ မာဃလုလင်ဘဝမှာ အတော်ကောင်းမှုတွေ ပြုခဲ့သတဲ့။ ဒါဆို မာဃလုလင်လောင်းတွေဖြစ်တဲ့ ကိုချိုဦး၊ ကိုစိန်၊ ကိုဂျေစင်၊ ကိုမျိုးလွင်၊ ကိုအေးချို တို့ထံမှာ တပည့်ခံရမည်။ ဒါမှ သူတို့တွေ ဦးမာဃနဲ့ နေရာလဲကြရင် ဦးမာဃရဲ့ ကားဆရာမာတလိအဆင့်လောက်တော့ဖြစ်ကောင်း၏။ တာဝတိံသာက နတ်ယဉ်ပျံတွေက မာစီးဒီးတွေထက်တောင် မောင်းလို့ကောင်းမှာ သေချာသည်။ ဒရိုင်ဘာမာတလိလောက်ပဲ မှန်းတာမို့ ဖြစ်နိုင်ကောင်းရဲ့။ သကြားမင်းလောင်းကိုချိုဦးတို့လို နတ်သမီးတစ်ထောင်မရှိရင်တောင် တစ်ရာလောက်တော့ ရကောင်းပါရဲ့။

အဲဒီအချိန်မှာဖြစ်မဲ့ ဦးမာဃလက်သစ်ကိုတော့ တာဝတိံသာမှ နတ်သမီးများ မြန်မာအိုင်ဒေါ မဲပေးခွင့်မရှိစေရဟု အမိန့်သစ် ထုတ်ပြန်ခိုင်းရမည်။ ဒါမှလည်း နောက်ပေါ်လာမဲ့ ဘီလီလေးတွေ ဆေ့ဖ် ( safe ) ဖြစ်မှာပေ့ါ။ နတ်ကွီးတွေကတော့ မဲပေးလိုက ပေးစေ။ အကြောင်းမဟုတ်။ ဒီကိစ္စကိုလည်း အရှိကိုအရှိအတိုင်း ထား၍မဖြစ်။

နတ်သက်ရှည်လှသော ဦးမာဃကလည်း ဘယ်သောအခါရောက်မှ သကြားမင်းရာထူးကို စွန့်မည်မသိရ။ နောက်ကတက်ဖို့စောင့်နေတဲ့ ကိုချိဦးတို့တတွေ နှစ်ပေါင်းအသင်္ချေ စောင့်ရကိန်းရှိ၏။ မောင်လူပေလည်း မာတလိဖြစ်ရန် မသေချာတော့။ ဒါကိုတော့ အရှိကိုအရှိအတိုင်း ထားလို့မရ။ သကြားမင်းသက်တမ်းကို ကန့်သတ်ရမည်။ သက်တမ်းတစ်ကြိမ်ငါးနှစ်စီဖြင့် သက်တမ်းနှစ်ကြိမ်သာ သကြားမင်းလုပ်ခွင့်ရှိသည်ဟူပြီး သာဝတိံသာဖွဲ့စည်းပုံအခြေခံဥပဒေကို ပြင်စေရမည်။ တာဝတိံသာမှာ တမတ်သားမရှိတာမို့ အခြေခံဥပဒေပြင်မဲ့ကိစ္စက မြန်မာပြည်လောက်တော့ ခက်မည်မထင်။ သကြားမင်းအငြိမ်းစားကို မြန်မာပြည်က တပ်ချုပ်ငြိမ်းကြီးလို တစ်လသိန်းတစ်ထောင်ကျော် ပင်စင်လခပေးပြီး နန်းတော်လိုအိမ်ကြီးဆောက်ပေးလိုက်လျှင် သဘောတူမည် ထင်ရ၏။

" နတ်သမီးတွေ မြန်မာအိုင်ဒေါ မဲပေးခွင့် ပိတ်ပင်ရေး.... တို့အရေး။"
" တာဝတိံသာတွင် မျိုးစောင့်ဥပဒေ မပြဌာန်းရေး..........တို့အရေး။"
" ဦးမာဃ၏ တာဝန်သက်တန်းကို ကန်ုသတ်ရေး.........တို့အရေး။"

တာဝတိံသာရောက်လျှင် လုပ်ဆောင်ရန် တို့တာဝန် အရေးသုံးပါး... သုံးပါး.......။

" ဘာတွေသုံးပါးနေတာလဲ ကလူပေ။ ထထ။ ဧည့်ခန်းထဲမှာ ငုတ်တုတ်အိပ်နေရင်း ဘာတွေ ယောင်နေတာလဲ။ "

မြန်မာအိုင်ဒေါမှာ ကိုယ်အားပေးတဲ့ ဘီလီလေး မနိုင်ပဲ ရှုံးသွားရတာကို အားမလိုအားမရဖြစ်ပြီး အိပ်ပျော်နေသော မောင်လူပေကား မဒန်ပေနှိုးမှပဲ နိုးလေတော့၏။ ဒီတော့မှပဲ အရှိကို အရှိအတိုင်း ဆင်ခြင်မိသည်။ ဦးမာဃကို အားကြလို့ မဖြစ်သေး။ မဒန်ပေ ဒေါသအိုးကွဲပြီး ဟိုတိုင်ဒီတောလုပ်လျှင် အချုပ်ထဲရောက်သွားသူက မာမူမဟုတ်ပဲ ထောင်ကဲပေ ဖြစ်သွားကာ မရှိမဲ့ရှိမဲ့ သိက္ခာလေးတွေကျ၊ မဟာအရှက်တော် ဖျန်းဖျန်းကွဲသွားနိုင်သည် မဟုတ်လား။ ဒီတော့လည်း အရှက်ပြေလေး မဒန်ပေကို ပြန်ပြောရသည်။

" ဘာမှမဟုတ်ပါဘူးကွာ။ ငါ့မွေးနေ့ရောက်ရင် ဘုန်းကြီးသုံးပါးလောက် ဆွမ်းကပ်ရင်ကောင်းမလား စဉ်းစားမိလို့ပါ။ "

တော်ပါသေးရဲ့။ ဘုန်းကြီးသုံးပါးကယ်ပေလို့။

အရှိကို အရှိအတိုင်းဆင်ခြင်ပြီး နေကြစို့လား။ ကွီးအပေါင်းတို့ခင်ဗျား။

ကျန်းမာချမ်းသာကြပါစေ။

ချစ်ခြင်းအားဖြင့်

မောင်လူပေ

(အိုင်ဒေါမှာ ဘီလီရှုံးရခြင်းကိစ္စ။)