ဆားပုလင်းနှင်းမောင်နှင့် ခေတ်ပေါ်လက်နက်အမှု
"အိုင်ဆေး ကိုနှင်းမောင်။ ဘာတွေကြည့်နေတာလဲဗျ။"
"အခုတလောခေတ်စားနေတဲ့ ဝန်ကြီးဟောင်းရဲ့သား လက်နက်အမှုကိုလေ့လာနေတာပါ အိုင်ပီ။"
"ဘာမှ စိတ်ပူစရာမရှိပါဘူး။ လိုအပ်သလိုမူးယစ်အမှုနဲ့ အရေးယူနေပြီလို့ နေပြည်တော်ပုလိပ်မင်းကြီးကိုယ်တိုင် အစီရင်ခံထားပြီပဲကိုနှင်းမောင်ရယ်။ လက်နက်နဲ့အတူမိတဲ့ကိစ္စပဲ။ ကျုပ်တို့ စီအိုင်ဒီနဲ့အနေသာကြီးပါ။"
"အထင်မစမောနဲ့ အိုင်ပီ။ အဲဒီနေပြည်တော်ပုလိပ်မင်းကြီးက ကချင်ပို့လိုက်လို့ လောပန်တွေနဲ့အဖွဲ့ကြနေပြီတဲ့။ အခုမှရောက်လာတဲ့ နေပြည်တော်ပုလိပ်မင်းကြီးအသစ်က စီအိုင်ဒီကိုအကူအညီတောင်းလို့ စုံထောက်မင်းကြီး မစ္စတာစတီးဝပ်က ကျုပ်နဲ့ခင်ဗျားကို အဆိုင်းလုပ်ပေးထားတယ်။"
"တန်တော့။ ဒါဆိုကျုပ်တို့ကို ညောင်မြစ်တူးခိုင်းတာပေါ့ကိုနှင်းမောင်။ ပုတ်သင်ဥတွေ ထွက်မလာပါစေနဲ့လို့ဆုတောင်းရတော့မှာပဲ။"
"အစဖေါ်ပြီး အမြီးဆွဲထုတ်ခိုင်းတာပေါ့အိုင်ပီရယ်။ ကျားမြီးသွားဆွဲမိလို့ကတော့ သေပြီဆရာပဲ။"
"ဆားပုလင်းနှင်းမောင်.....'သဂရိတ်' တောင် 'အဘားအဘား' အော်ရပြီလားဗျာ။"
"ဆရာမင်းသိင်္ခခေတ်မှာပဲ ဆားပုလင်းနှင်းမောင်ကမင်းသားဖြစ်တာ။ အခုခေတ်ဆားပုလင်းက အသွင်ပြောင်းလာတဲ့အထက်အရာရှိအတွက် ဆက်ကြေးကောက်ပေးရတဲ့ဘဝဆိုတာ အသိသားနဲ့အိုင်ပီရယ်။ ဆလံတွေအခါခါပေးနေရတဲ့တာတောင် အဟောက်ခံရသေး။ အသွင်ပြောင်းထားပေမဲ့ အသွေးအသားက အရင်အတိုင်းရှိနေတော့ ထူးမခြားနားပေါ့။ ဂါဗားမန့်ကလည်း အာဏာမစိုးမိုးတော့ ခက်သားမဟုတ်လားဗျာ။ ဒါတွေအသာထားဦး။ လက်နက်မှုအတွက် ဆက်ကြဦးစို့။"
" ကိုနှင်းမောင်ကရော ဘယ်လိုထင်လို့လဲ။"
"ထင်တာမဟုတ်ဘူးအိုင်ပီရဲ့။ မြင်တာမြင်တာ။"
"အလင်းပြပါကိုနှင်းမောင်ရယ်။ ကျုပ်က ပိန်းတယ်။"
"ဒီလိုလေဗျာ။ အရင်ဝန်ကြီးဟောင်းရဲ့သား သန်းကြွယ်သူဌေးက လက်နက်တွေယူလာပြီး လေယာဉ်စီးဖို့လာတယ်ဆိုတာ ထူးနေတယ်လို့ မထင်မိဘူးလား။"
"အေးလေ။ လေယာဉ်ပေါ်မတက်ခင် အရှာခံရမှာသိရက်နဲ့ လက်နက်တွေယူလာတာ ထူးနေတယ်။"
"သူ့အတွက်က အရှာခံရတာထူးတယ်အိုင်ပီ။ ဒါကြောင့်လည်း ခုလိုဖြစ်ကုန်တာ"
"နားမရှင်းဘူးကိုနှင်းမောင်။"
"ဒီလိုဗျ။ အခုဖြစ်တာ နေပြည်တော်လေဆိပ်။သူကဝန်ကြီးဟောင်းရဲ့သား။ VVIP ပေါ့အိုင်ပီရယ်။ ပုလိပ်တွေအတွက်ဘုရားသခင်ရဲ့သားတော်လိုအဆင့်မျိုး။ ဘယ်ပုလိပ်ကမှမျက်မွေးကျော်လို့ မော်မကြည့်ရဲတဲ့သူမို့ တံခါးမရှိ ဓါးမရှိ ဝင်ထွက်နေကြပေါ့။ ဒီအခေါက်လည်း အရင်လိုပဲထင်ပြီး သယ်လာခဲ့တာ။ လုံခြုံရေးတင်းကျပ်ထာတဲ့အချိန်မှာ အဖွဲ့သစ်နဲ့တိုးပြီး ဂိသွားတာပဲအိုင်ပီရေ။"
"လက်နက်တွေကလည်းထပ်ရှာ ထပ်တွေ့နဲ့ အများကြီးပါလား ကိုနှင်းမောင်ရယ်။"
"အိုင်ပီတို့က အလွန်မေ့လွယ်တာပဲ။ နဝတ၊နအဖတခေတ်လုံးမှာ သူတို့ရဲ့အပေါင်းအပါတွေအားလုံးက ဥပဒေအထက်မှာလေ။ ဘယ်သူကစစ်ဆေးရဲခဲ့လို့လဲ။ သေနပ်တွေကိုင်တာများအဆန်းလုပ်လို့။ ကိုယ်ပိုင်အစောင့်တပ်တွေတောင်ထားကြတာ။ ဒါကြောင့် ဗခကျော်ဘသားတောင် သေနပ်ပစ်မှုဖြစ်ခဲ့တာ မေ့ပြီလား။ အချင်းချင်းထိပ်တိုက်တွေ့ပြီးပစ်ခပ်မှုတွေမဖြစ်ခဲ့တာပဲကံကောင်းလို့မဟုတ်လား အိုင်ပီရယ်။"
"အဲဒါက အရင်ခေတ်ကလေ ကိုနှင်းမောင်။"
"အရင်၊အခုဆိုတာ အချိန်မတူပေမဲ့ ကျုပ်တို့ပုလိပ်တွေအတွက်ကတော့ မင်းနှစ်မင်းကြားက နီးရာဓါးကြောက်ရတာမဟုတ်လားအိုင်ပီ။"
"အဲဒီတော့ကိုနှင်းမောင်က ဘယ်လိုကောက်ချက်ဆွဲမလို့လဲ။"
"ပုလိပ်တွေသိက္ခာကျရမဲ့အမှုတွေများနေပြီမို့ မပြောပါရစေနဲ့အိုင်ပီ။ကျားမြီးလည်းမဆွဲရဲဘူး။ မင်းနှစ်မင်းကြားမှာ အနေအထိုင်မတတ်ရင် ကြားညှပ်နိုင်တယ်လေ။ ဒါကြောင့် စုံစမ်းဆဲလို့သာ အန်ဒါစတွတ်လိုက်တော့။ အလုပ်လုပ်ရတာမောပြီဗျာ။ တရုတ်အဝိန်ဆိုင်မှာ ရေခဲတောင်စီးကရက်လေးခဲ၊ ကြက်ဥခေါက်ဆွဲကြော်လေးဆွဲရင်း အကိတ်လေးတွေကဲတဲ့ မယ်ရွေးပွဲဗီဒီယိုဖိုင်လေးတွေနဲ့ ဖုန်းပွတ်ရင်း နားလိုက်ကြစို့ အိုင်ပီရေ။"
No comments:
Post a Comment