နောက်ဆုံးခရီးတွေ အေးချမ်းစွာ ထွက်ခွာနိုင်စေဖို့
ဤခရီး နီးသလား။ ဟုတ်ကဲ့ နီးပါတယ်။ မွေးလာထဲက ဒီခရီးဆီကို ချီတက်နေကြတာ။ တစ်နေ့မှာတော့ ဒီခရီးကို သွားရမှာ။
ဒီခရီးကို နောက်ဆုံးခရီးလို့လည်း ဆိုကြတယ်။ ကိုယ်တိုင်သွားနိုင်မဲ့ ခရီးတော့မဟုတ်။ သူတစ်ပါးက ပို့ပေးမှ ရောက်ရမှာ။ ချစ်သူခင်သူတွေက ပို့ဆောင်ပေးကြလိမ့်မယ်။
မွေးရပ်မြေ ရွှေပြည်ကြီးက နောက်ဆုံးခရီးတွေရော၊ အခုခေတ္တရောက်ရှိနေရာနိုင်ငံက နောက်ဆုံးခရီးတွေရော အတော်များများကို လိုက်ပါပို့ဆောင်ခဲ့ဖူးတယ်။ ဘာသာမျိုးစုံ၊ လူမျိုးပေါင်းစုံရဲ့ နောက်ဆုံးခရီးတွေကို စိတ်မကောင်းခြင်းများစွာနဲ့ လိုက်ပို့ခဲ့ရတယ်။ ကာယကံရှင်တွေရဲ့ ရင်ထဲမှာတော့ ဘယ်လိုပူလောင်နေရှာမယ်ဆိုတာ ပြောပြစရာ လိုမယ်မထင်။
နောက်ဆုံးခရီးကို ထွက်ခွာရသူအတွက်ကတော့ ဘာမျှမသိနိုင်တော့ပြီမို့ ထားတော့။ ကျန်ရစ်သူ အပူသည်တွေအတွက် အေးချမ်းတဲ့ ပို့ဆောင်မှုလေးဖြစ်ခဲ့ရင်တော့ အကောင်းဆုံးပေါ့။ ပူလောင်နေသူကို နှစ်သိမ့်မှုပေးရင်း အေးချမ်းစွာပို့ဆောင်နိုင်ကြဖို့ အလွန်အရေးကြီးပါတယ်။
အထူးသဖြင့်တော့ ရွှေပြည်ကြီးက နာမည်ကြီးတွေရဲ့ နောက်ဆုံးခရီးတချို့ကို တွေ့ရတာ စိတ်မကောင်းစရာပါ။ စီစဉ်သူတွေဖက်က အားနည်းမှုတွေရှိနိုင်သလို ဒီခရီးကို လာရောက်ကြတဲ့ ချစ်ခင်သူလူအပေါင်းရဲ့ စည်းကမ်းမဲ့စွာ တိုးဝှေ့နေမှုတွေကလည်း နောက်ဆုံးခရီးကို အတော်အနှောက်အယှက်ရှိနေတာ တွေ့မိတယ်။ အော်ဟစ်ဆူပူ တိုးဝှေ့ဆဲဆို နေကြတဲ့ နောက်ဆုံးခရီးတချို့ကို တွေ့ရတာ စိတ်မကောင်းဖြစ်မိတယ်။
ဒီလိုဖြစ်တာ လူမျိုးစရိုက်ကြောင့်လို့ လူမျိုးကို နှိမ့်ချအပြစ်တင်တာကိုတော့ မကြိုက်လှ။ ဒီလူမျိုးက ကမ္ဘာမှာ အလွန်ယဉ်ကျေးတဲ့လူမျိုးဟု နာမည်ကြီးခဲ့သူတွေပဲ။ ဘာလို့ မထိမ်းနိုင်ကြတာလဲ။ အသုဘရှုအခမ်းအနားမှာ လုယက်တိုးဝှေ့ဖြစ်နေကြတာ စရိုက်နဲ့တော့မဆိုင်။ ကိုယ်ချစ်ခင်သူရဲ့နောက်ဆုံးခရီးမှာ နောက်ဆုံးအချိန်လေးကို မြင်ချင်လွန်းလို့ တိုးဝှေ့နေကြခြင်းပါ။
အနုပညာရှင်နာမည်ကြီးတွေ၊ ပြည်သူချစ်တဲ့ သူတွေရဲ့ နောက်ဆုံးခရီးတွေမှာ တိုးဝှေ့လုယက် ဆူညံအော်ဟစ်နေကြတဲ့ မြင်ကွင်းကို နိုင်ငံခြားသားတစ်ယောက်သာမြင်ခဲ့ရင် ဘယ်လို ထင်မြင်ယူဆသွားမလဲဆိုတာတော့ မပြောတတ်။
ဒီတော့ သူတို့တွေရဲ့ နောက်ဆုံးခရီးကို အေးချမ်းစွာထွက်ခွာနိုင်စေရေးအတွက် အစီအစဉ်တွေထဲမှာ အနည်းငယ် ပြောင်းလည်းလိုက်ရင် ပိုပြီး အဆင်ပြေသွားမယ်လို့ ရိုးသားစွာ ထင်မြင်မိတယ်။
နောက်ဆုံးခရီး အခမ်းအနားမှာ viewing လို့ခေါ်တဲ့ အသုဘရှုချိန်လေး တိုးပေးလိုက်ရင် ပိုအဆင်ပြေမှာပဲ။ နာမည်ကြီးတွေကို ချစ်ခင်ကြသူတွေ အဲဒီအချိန်မှာ ကြည့်ခွင့်ရမယ်။ နောက်ဆုံးခရီးကို လာရောက်ပို့ဆောင်ကြသူတွေကလည်း နိုင်ငံကြီးသားပီသစွာ တန်းစီကြပြီး ငြိမ်သက်ခြင်း၊ စိတ်မကောင်းခြင်းတို့နဲ့ ကူညီပေးကြဖို့ရင် ပိုအဆင်ပြေမယ်။ အသံဆူညံအော်ဟစ် ငိုယိုတတ်သူတွေကိုလည်း အားပေးနှိမ့်သိမ့်မှုတွေနဲ့ ဖေးမပေးကြဖို့ ပိုပြီးလိုအပ်မယ်။ သတင်းထောက်တွေ၊ ဓါတ်ပုံရိုက်လိုသူတွေအတွက် အဲဒီအချိန်မှာ ရိုက်ကြပါစေ။
Viewing ပြီးရင်တော့ ကာယကံရှင်ရဲ့ ဆွေမျိုးများနဲ့ ရင်းနှီးသူများနဲ့သာ လုပ်ဆောင်ရန်ကျန်ရှိတာတွေ ဆက်လက်လုပ်စေသင့်တယ်။ ကာယကံရှင်တွေ ဖိတ်ခေါ်ထားသူများမဟုတ်ရင် ခန်းမထဲက ထွက်ပေးခြင်းဖြင့် ကူညီရာလည်းရောက်မယ်။ အဲဒီလို မလုပ်နိုင်တော့ ခန်းမထဲက လူအုပ်ကြီးကို အော်ဟစ်ဖယ်ရှားခိုင်းနေရတာကလည်း အမြင်မတော်လှပါ။
ကျွန်တော်ခေတ္တနေထိုင်ရာဒေသမှာ ဒီလိုဆယ်လီတွေရဲ့ နောက်ဆုံးခရီးက ပို့ချင်သလို ပို့လို့မရ။ Public viewing အချိန်ပဲ တန်းစီပြီး ငြိမ်သက်စွာ ကြည့်လို့ရမယ်။ ဂုဏ်ပြုလို့ရမယ်။ နောက်ဆုံးခရီးပို့ချင်ရင်တော့ လမ်းမှာတန်းစီပြီးစောင့်။ ကိုယ့်ရှေ့က ဖြတ်သွားတဲ့အချိန် အရိုအသေပေး။ ဒီလောက်ပဲရတယ်။ နောက်ဆုံးခရီးကို သက်ဆိုင်သူတွေသာ ပို့ဆောင်ခွင့်ရှိတယ်။ အဲဒါလေးနဲ့ယှဉ်ပြီး တွေးမိတာမို့ ဒီစာလေးရေးမိပါတယ်။ လွန်တာရှိ ဝန္တာမိပါဗျာ။
ချစ်တဲ့
မောင်လူပေ
No comments:
Post a Comment