အာကာသ တပ်မတော်

အာကာသတပ်မတော်(Space Force)

အမေရိကန်တပ်ပေါင်းစုမှာ အဓိကစစ်တပ်ကြီးငါးခုရှိတယ်။ ကြည်းတပ်၊ ရေတပ်၊ လေတပ်၊ မရိမ်းတပ် နဲ့ ကမ်းခြေစောင့်တပ် တွေဖြစ်ပြီး သီးခြားစီရပ်တည်ကြတယ်။ မကြာမီ ၂၀၂၀အရောက်မှာ တပ်အသစ်တိုးလာတော့မယ်လို့ ပင်တဂွန်စစ်ဌာနချုပ်က ကြေညာလိုက်တယ်။ အဲဒီတပ်မတော်အသစ်ကို "အာကာသတပ်မတော်"လို့ အမည်ပေးထားတယ်။

"အာကာသတပ်မတော်"ဟာ ဘယ်တပ်တွေရဲ့လက်အောက်မှာမှမရှိတဲ့ သီးခြားတပ်မတော်သစ်တစ်ခုဖြစ်လာမယ်။ ကြယ်လေးပွင့်ဗိုလ်ချုပ်ကြီးတစ်ဦးရဲ့ ဦးဆောင်မှုအောက်မှာ ဒီတပ်သစ်က တည်ရှိမယ်။

"အမေရိကန်အာကာသတပ်မတော်ဌာနချုပ်" အုပ်ချုပ်ရေးပိုင်းအတွက် ဒုတိယကာကွယ်ရေးဝန်ကြီးတစ်ပါးလည်း ထပ်မံ ခန့်ထားမှာဖြစ်တယ်။

ဒီအစီအစဉ်ကို လူသိရှင်ကြားထုတ်ဖေါ်ပြောကြားလိုက်သူကတော့ ဒုတိယသမ္မတ မိုက်ပန်းဖြစ်ပြီး ဂျွန်လတုန်းက ကာကွယ်ရေးဝန်ကြီးဌာနတွင်းက အကြီးအကဲတွေကို အာကာသတပ်ဖွဲ့အတွက် နည်းလမ်းရှာကြဖို့ အကြံပေးခဲ့တဲ့ သမ္မတထရန့်ရဲ့မိန့်ခွန်းအတိုင်းလိုက်နာ အကောင်အထည်ဖေါ်တာလည်း ဖြစ်ပါတယ်။

တပ်မတော်အသစ်တစ်ခုကို ထပ်မံဖွဲ့စည်းတာ လွယ်ကူတဲ့အလုပ်မဟုတ်။ ဒီတပ်မတော်သစ်ကို အဆင့်လေးဆင့်နဲ့ လုပ်ဆောင်မယ်လို့ ဆိုတယ်။

(၁)အာကာသတပ်မတော်ကို သီးခြားတပ်မတော်အဖြစ်ဖွဲ့စည်းခြင်း၊
(၂)အတော်ဆုံး(elite)လူတွေပါဝင်မဲ့ အာကာသအရာရှိများ(Space Officer) နဲ့ အာကာသစစ်ဆင်ရေးတပ်များ( Space Operations Force) ဖွဲ့စည်းခြင်း၊
(၃)အာကာသဖွံ့ဖြိုးရေးအေဂျင်စီတည်ထောင်ပြီး အာကာသအတွက် လိုအပ်မဲ့ လက်နက်၊ ပစ္စည်းများ တည်ထွင်ဖေါ်ထုတ်ခြင်း၊
(၄)အာကာသတပ်မတော်ဌာနချုပ်ကို အုပ်ချုပ်ကွပ်ကဲဖို့ အရပ်သားဖြစ်သူ ဒုတိယကာကွယ်ရေးဝန်ကြီးခန့်ထားခြင်း တို့ကို အဆင့်ဆင့်ဖေါ်ဆောင်မှာဖြစ်ပြီး ၂၀၂၀နှစ်ဦးပိုင်းလောက်မှာ ဒီတပ်မတော်ကြီးကို တရားဝင်ဖွင့်လှစ်နိုင်မယ်လို့ မျှော်လင့်တယ်လို့ ဒုတိယသမ္မတက ဆိုတယ်။

အာကာသထဲမှာရှိတဲ့ အမေရိကန်အစိုးရပိုင်ဆိုင်သော အရပ်ဖက်သုံး၊ စစ်ရေးသုံး ပစ္စည်းအဝဝရဲ့ တန်ဖိုးတွေဟာ ထရီလီယံပေါင်းများစွာတန်သလို စစ်ရေးအတွက်လည်း အသက်သွေးကြောတွေဖြစ်တယ်။ ဒီပိုင်ဆိုင်မှုတွေကို ကာကွယ်ဖို့ လိုအပ်တယ်လို့ ကွန်ဂရက်မှာ တောင်းဆိုနေကြတာကြာပြီ။ အသုံးစားရိတ်အရမ်းများမှာမို့ အထက်၊ အောက်လွှတ်တော်နှစ်ရပ်က အကြိမ်ကြိမ်ပယ်ချခဲ့တယ်။ အခုအစီအစဉ်ကိုလည်း ကွန်ဂရက်လွှတ်တော်ကသာ ဖွဲ့စည်းပုံ ပုဒ်မ(၁၀)ကိုပြင်ဆင်ပြီး ခွင့်ပြုနိုင်တယ်။ ကွန်ဂရက်က ရီဗာဗလစ်ကင်အမတ်တွေလက်ထဲမှာမို့ ဖြစ်နိုင်တယ်လို့ယူဆကြတယ်။ (လာမဲ့နိုဝင်ဘာလ ကြားဖြတ်ရွေးကောက်ပွဲမှာ သူတို့တွေအရေးနိမ့်ရင်တော့ လွှတ်တော်မှာ အခြေအတင်ငြင်းခုံကြရလိမ့်မယ်။)

အာကာသကို အရင်က အမေရိကားနဲ့ရုရှားပဲ ကြီးစိုးခဲ့ရာက အခုတော့ ချိုင်းနားကပါ ကြီးစိုးလာခဲ့ပြီ။ ရုရှားက တည်ထွင်နေတဲ့ အာကာသမှာသုံးမဲ့ လေဆာရောင်ချည်လက်နက်တွေကိုလည်းအမေရိကန်တွေက စိတ်ပူနေတယ်။ ရုရှားနဲ့ချိုင်းနားပူးပေါင်းပြီး အမေရိကန်ပိုင်ဆိုင်သမျှ အာကာသယာဉ်တွေ၊ထောက်လှမ်းရေး ဆက်သွယ်ရေး ဂြိုလ်တုတွေကို ဖျက်ဆီးမှာ၊ ဒါမှမဟုတ်ရင် နှောက်ယှက်ဟန့်တားလာမှာကို ကာကွယ်ဖို့ ဒီလိုတပ်မတော်လိုအပ်လို့ ဖွဲ့စည်းရတာဖြစ်တယ်လို့ဆိုတယ်။ ၂၀၀၇ခုနှစ်က ဂြိုလ်တုဖျက်ဒုံးကျည်ကို ချိုင်းနိစ်တွေ စမ်းသပ်ခဲ့တာကို ထောက်ပြတယ်။ "သူတို့လုပ်နေတဲ့ပုံကြည့်ရင်သိသာပါတယ်။ အာကာကကို ကြီးစိုးဖို့ လုပ်နေတာပဲ။ အာကာသမှာ စစ်ဖြစ်လာနိုင်တဲ့အရေးကို ရှောင်လို့မရနိုင်တော့ဘူး။ ဒါပေမဲ့ ရှင်းအောင်ပြောလိုက်မယ်။ အမေရိကန်တွေရဲ့ အာကာသကိုလွှမ်းမိုးထားနိုင်မှု အင်အားတွေကတော့ သေးငယ်သွားမှာမဟုတ်ပါဘူး။ " လို့ ဒုတိယသမ္မတက ဆိုပါသေးတယ်။

အာကာသတပ်မတော်ပေါ်ပေါက်လာရင် အမေရိကန်ရဲ့မဟာမိတ်နိုင်ငံတွေဖြစ်တဲ့ ဥရောပနဲ့အာရှနိုင်ငံတွေကလည်း အာကာသထဲမှာ သူတို့တွေပိုင်ဆိုင်သမျှတွေကို ကာကွယ်ပေးဖို့ အခကြေးငွေနဲ့ ငှားရမ်းအသုံးပြုနိုင်မယ်လို့ ယုံကြည်ကြတယ်။

အမေရိကန်ရဲ့ အာကာသတပ်မတော်ကို ယှဉ်ပြိုင်နိုင်မဲ့ အခြားနိုင်ငံတွေတော့ လောလောဆယ်မရှိသေးဘူး။ ရုရှားကလည်း ငွေအခက်အခဲကြောင့် မလုပ်နိုင်သေးသလို ချိုင်းနားကလည်း နည်းပညာအခက်အခဲတွေရှိနေသေးတယ်။ သူတို့နှစ်ဦးပေါင်းပြီး လုပ်ကြမှ ဖြစ်နိုင်မဲ့သဘောရှိတယ်။ ဒါပေမဲ့ မတူတဲ့နိုင်ငံနှစ်ခုပေါင်းတဲ့ အာကာသတပ်မတော်ဆိုတာ ဖြစ်နိုင်ခြေ နည်းလွန်းပါတယ်။ သူတို့နှစ်နိုင်ငံရဲ့ ဂြိုလ်တုတွေအပါအဝင် အာကာသမှာရှိတဲ့ ပိုင်ဆိုင်မှုစုစုပေါင်းကတော့ အမေရိကန်ပြည်ထောင်စုပိုင်ဆိုင်သမျှတွေနီးပါးလောက် ရှိပါသတဲ့။

အာရှရဲ့ စစ်အင်အားကြီးနိုင်ငံတွေထဲက တစ်နိုင်ငံဖြစ်တဲ့ မြန်မာနိုင်ငံရဲ့ တပ်မတော်ကြီးလည်း ကြည်း၊ရေ၊လေ တပ်သုံးတပ်အပြင် အာကာသတပ်ပါထပ်ချဲ့နိုင်ခဲ့ရင်တော့ တပ်မတော်(အာကာသ) လို့ ခေါ်မလား၊ ဒါမှမဟုတ် အတိုကောက်ပဲ ကက(အာ) လို့ခေါ်မလား စဉ်းစားနေမိတယ်။

ကက(အာ)ပေါ်လာရင်တော့ ဖေ့ဘုတ်ပေါ်မှာ  ငြင်းခုန် စစ်ခင်းနေကြတဲ့ ကီးဘုတ်တပ်သားတွေအားနဲ့ အတော်အလုပ်ဖြစ်မှာ။ သူတို့ကိုအရံအင်အားထားရမှာပေါ့။ ကက(အာ)ချုပ်ကိုတော့ အာကောင်းတဲ့ အာသန်တဲ့ အာအဘတစ်ယောက်ကို တပ်ချုပ်ကြီးက ရွေးပေးမှာပဲ။

မြန်မာ့ကက(အာ)ကာကွယ်ပေးဖို့ အာကာသပိုင်ဆိုင်မှုတွေတော့ လောလောဆယ်မရှိသေးဘူးပေ့ါ။မြန်မာပိုင် ဂြိုလ်တု(လျှက်ဆား)ပဲရှိသေးတာ။ နောက်မှ ဘာလွှတ်တင်မယ်ဆိုတာ စဉ်းစားကြတာပေါ့။ ကက(အာ) အရင်ဖွဲ့ဖို့ ခုထဲက စီစဉ်ကြပါစို့။ ဒါမှ အာကာသတွင်း ပူးပေါင်းစစ်ဆင်ရေးတွေ ဘာတွေ လုပ်တဲ့အခါ အဆင်သင့်ဖြစ်နေမှာလေ။ ဘတ်ဂျက်လည်း ပိုတောင်းလို့ကောင်းတာပေါ့။ တိန်။

ချစ်တဲ့

မောင်လူပေ