ကုန်သွယ်ရေးစစ်ပွဲ စပြီလား

ကုန်သွယ်ရေးစစ်ပွဲ စပြီလား။

အမေရိကန်သမ္မတ ထရန့်ရဲ့ တစ်ကမ္ဘာလုံးနဲ့တစ်ယောက် ကုန်သွယ်ရေးစစ်ပွဲကို အားလုံးက စိုးရိမ်တကြီးစောင့်ကြည့်နေကြတယ်။ ဒီနေ့တော့ တရုတ်က တင်သွင်းနေတဲ့ စိုက်ပျိုးရေးလုပ်ငန်းသုံးပစ္စည်းတွေ၊ လေယာဉ်အပိုပစ္စည်းတွေ အပါအဝင် ပစ္စည်းတွေ တင်ပို့မှုကို ၂၅%အခွန်သီးခြားကောက်ဖို့ ညွှန်ကြားချက်ထွက်လာပြီ။ ဒေါ်လာ(၃၄)ဘီလီယံဖိုးရှိမယ်တဲ့။ ကုန်သွယ်ရေးစစ်ပွဲ စဖို့ တာစူလိုက်ပြီ။ ဒါက ပထမဆုံး ပြသလိုက်တဲ့ ခြိမ်းခြောက်မှု။

အမေရိကန်က တရုတ်ကိုသွင်းနေတဲ့ ပဲပိစပ်၊ ကား စတဲ့ပစ္စည်းတွေကိုလည်း (၃၄)ဘီလီယံဖိုး အခွန်သီးခြားကန့်သတ်မယ်လို့ တရုတ်ကလည်း ပြန်ကြေညာတယ်။ ပါးကိုက်ရင် နားကိုက်မယ်ပေါ့။

ပြသနာက တရုတ်နဲ့အမေရိကန်ရဲ့ကုန်သွယ်ရေးမညီမျှမှုပါ။ တရုတ်ရဲ့ အမေရိကန်ကိုသွင်းကုန်က လေးဆ ပိုများပါတယ်။ ဒါကြောင့် ထရန့်ကလည်း ကျန်တဲ့ပို့ကုန်တွေလည်း အခွန်ကောက်ဖို့ မကြာမီလာမယ်လို့ ခြိမ်းခြောက်ထားတယ်။ နောက်နှစ်ပတ်ကြာရင် ဒေါ်လာ(၁၆)ဘီလီယံဖိုးလာမယ်။ ညှိလို့မပြေလည်ရင် နောက်လမှာ ဘီလီယံ(၄၀၀)ကျော်ဖိုးလာမယ်တဲ့။ တရုတ်ပို့ကုန်ဘီလီယံ(၅၀၀)ကို အကုန်လုံးအခွန်တိုးကောက်မဲ့သဘော။ တရုတ်က အမေရိကန်ပို့ကုန်အားလုံးကို အခွန်တိုးကောက်မယ်ဆိုရင်တောင် ဒေါ်လာဘီလီယံ(၁၃၀)ကျော်ပဲရှိမယ်တဲ့။

ဒီလိုအပြန်အလှန် ဖြစ်ကြမဲ့ ကုန်သွယ်ရေးစစ်ပွဲမှာ နှစ်ဖက်လုံးက လျှော့မယ့်ပုံမမြင်ရသေး။ တရုတ်ကလည်း သူနိုင်မယ်ထင်သလို အမေရိကန်ကလည်း သူနိုင်မယ်ထင်နေတယ်။ အဆုံးသတ်က ဘယ်လိုရှိနိုင်မလဲလို့ စီးပွားရေးပညာရှင်တွေ တွက်နေကြတယ်။

တရုတ်ရဲ့ပို့ကုန်တွေအခွန်တိုးကောက်ရင် တရုတ်လုပ်ပစ္စည်းတွေက အရင်လိုဈေးပေါပေါနဲ့ ဝယ်လို့မရတော့ဘူး။ အမေရိကန်တွေ ဈေးကြီးပေးသုံးရမယ်။ ဒါပေမဲ့ အမေရိကန်တွေဆီမှာ တရုတ်ပစ္စည်းတွေ တောင်လိုပုံနေပြီ။ ပေါပေါရ၊ ပေါပေါဝယ်၊ ပေါပေါသုံး၊ နည်းနည်းဟောင်းရင်လွှင့်ပြစ်နဲ့ အိမ်တိုင်းမှာ အသုံးမလိုတော့လို့ မသုံးဖြစ်တော့တဲ့ ပစ္စည်းတွေနဲ့အပြည့်။ ဒါကြောင့် အမေရိကန်တွေအတွက် သိပ်ထိခိုက်စရာမရှိ။ စီးပွားရေးကလည်းကောင်းနေတော့ ဖြုံမယ်မထင်။ ကုန်သွယ်ရေးစစ်ပွဲစကြောင်း ကြေညာတဲ့ ဒီနေ့မှာတောင် စတော့ရှယ်ယာတွေက ထိုးမကျသွားပဲ ထပ်တက်နေတယ်။ ဒေါ်လာဈေးပဲနည်းနည်းကျတယ်။ ဒါကြောင့် ဒီစစ်ပွဲကို အမေရိကန်ဈေးကွက်က ကြောက်မက်ဖွယ်လို့ မသတ်မှတ်သေး။ တရုတ်မှာတော့ ရှန်ဟိုင်းအညွှန်းကိန်းက နှစ်ပတ်အတွင်း (၁၀)ရာခိုင်နှုန်းကျော် ထိုးဆင်းသွားခဲ့တယ်။

ဒီလိုအခြေအနေကိုကြည့်ပြီး ရေရှည်မှာ တရုတ်ကိုဆိုးဝါးစွာ ထိခိုက်မယ်လို့ ပညာရှင်တချို့က ဆိုနေကြပြီ။ တရုတ်စီးပွားရေးပညာရှင်တစ်ဦးကလည်း ရှန်ဟိုင်းတက္ကသိုလ်ဟောပြောပွဲမှာ "တရုတ်အစိုးရထဲက ကုန်သွယ်ရေးစစ်ပွဲမှာ ကိုယ်ပဲအသာရမယ် မှန်းထားသူတွေဟာ လက်တွေ့နဲ့ကင်းကွာပြီး အထင်တစ်လုံးနဲ့ နေသူတွေဖြစ်နေပြီ။ ဒါကြောင့် အဆိုးဆုံးကိုရင်ဆိုင်ဖို့ ခုထဲကပြင်ထားသင့်တယ်။" လို့သတိပေးသွားလေတယ်။

တရုတ်ပိုးလမ်းမစီမံကိန်းက အကောင်အထည်ဖေါ်ဆဲ၊ သမ္မတစီကျင်းပင်ကလည်း ထာဝရသမ္မတလုပ်ဖို့ ပြင်ဆင်ထားချိန်မှာ ပြသနာဖြစ်ချင်ပုံမရ။ တရုတ်ကြီးဖက်က လျှော့ပေးမယ်လို့ မှန်းကြပေမဲ့ ခုထိတော့ မလျှော့သေး။

တရုတ်ပြည်က စီးပွားရေးလုပ်ငန်းရှင် ဒေါ်လာငွေ အနည်းဆုံး(၄.၅)သန်း လုပ်ငန်းရှိသူ သန်းကြွယ်သူဌေး အယောက်နှစ်ရာကျော်ကို စစ်တမ်းကောက်ရာမှာတော့ ၂၀%ကပဲ တရုတ်က ကုန်သွယ်ရေးစစ်ပွဲကို နိုင်မယ်လို့ ဖြေကြသတဲ့။ ၄၀%ရာနှုန်းက ညှိရင်းပြီးမယ်လို့ဖြေတယ်။ ကျန်တဲ့၄၀%က အမေရိကားနိုင်မယ်လို့ ဖြေတယ်။

ဒီသူဌေးတွေရဲ့လေးပုံသုံးပုံက ဖွံ့ဖြိုးပြီး နိုင်ငံတစ်ခုခုကို ပြောင်းမယ်လို့ ဖြေကြတယ်။ သူတို့ပြောင်းချင်တဲ့နိုင်ငံတွေထဲမှာ အမေရိကားက ပထမ၊ အင်္ဂလန်က ဒုတိယ၊ ကနေဒါက တတိယ။ အမေရိကားမြို့တွေထဲမှာ L.A, Seattle, San Francisco နဲ့ New York တို့ကို အစဉ်လိုက်ရွေးကြတယ်။ တရုတ်ပြည်မှာ လေထု၊ရေထု ညစ်ညမ်းမှုနဲ့ ပညာရေးနိမ့်ပါးမှုကြောင့် ပြောင်းချင်တာလို့ ဖြေကြတယ်။ အမေရိကားဟာ တက္ကသိုလ်ပညာရေးမှာ ထိပ်ဆုံးကရှိနေမြဲမို့ ပိုစိတ်ဝင်စားကြတယ်။ ဒေါ်လာငါးသိန်းကျော် ရင်းနှီးမြှုတ်နှံပြီးရင် အမြဲတမ်းနေထိုင်ခွင့်လျှောက်လို့ရတဲ့ အမေရိကားကို ပထမရွေးတာ မထူးဆန်းပါ။

သူတို့တွေက ပိုင်ဆိုင်မှုတွေရဲ့ (၁၅)%ကိုလည်း Overseas တွေမှာ ရွှေ့ထားကြပါသတဲ့။ တရုတ်ယွမ်ငွေ ဆက်တိုက်ကျဆင်းမှုကြောင့် အကျိုးအမြတ်အရမ်းနည်းတဲ့အတွက် ပိုင်ဆိုင်မှု ရွှေ့ပြောင်းတဲ့အခါ အဆင်သင့်ပေါ့။

တရုတ်တွေသာမကပါဘူး။ ကုလားပြည်က သူဌေးတွေလည်း အမေရိကန်ကို အစုလိုက်အပြုံလိုက် ရွှေ့ပြောင်းနေကြတယ်။ ပိုင်ဆိုင်မှုတွေ ရွှေ့လာကြတယ်။ ဒါကြောင့် အာရှ အမေရိကန်တွေရဲ့တိုးနှုန်းကလည်း အမေရိကားမှာ အမြင့်ဆုံးပဲ။ ဒီနှုန်းအတိုင်းတိုးတက်နေရင် ၂၀၅၀အကျော်မှာ အာရှသားတွေက အမေရိကားမှာ အများဆုံး လူဦးရေပိုင်ရှင်တွေဖြစ်သွားမှာ။ စပိန်နွယ်တွေက ဒုတိယအများဆုံး။ လူဖြူတွေက တတိယဖြစ်မယ်။ ဒါကြောင့် လူဖြူလက်ယာစွန်းထရန့်က လူဝင်မှုကြီးကြပ်ရေးဥပဒေတွေ တင်းကျပ်၊ ကမ္ဘာနဲ့ရန်ဖြစ်ဖို့ စဉ်းစားထားပုံပဲ။

တကယ်ကတော့ ကုန်သွယ်ရေးစစ်ပွဲသာ အရှိန်အဟုန်နဲ့ ဖြစ်လာခဲ့ရင် နှစ်ဖက်လုံးက ပြည်သူတွေပဲ အထိနာကြမှာ။ ဈေးကြီးပေးပြီး ဝယ်သုံးရမယ်။ ရောင်းအားကျရင် စက်ရုံတွေပိတ်ရမယ်။ ကျွဲနှစ်ကောင်ကြားက မြေစာပင်။ ကမ္ဘာကြီးရဲ့ စီးပွားရေးကိုပါ ရိုက်ခတ်မယ်လို့ မှန်းသူလည်းရှိရဲ့။ စတော့ဈေးတွေအရမ်းတက်ထားတော့ ပုံမှန်ရှိသင့်တဲ့ဈေးကို ပြန်ဆင်းမဲ့ correction ဖြစ်မှာတော့ အမှန်။

ဒီကုန်သွယ်ရေးစစ်ပွဲမှာ အမြတ်ရမဲ့နိုင်ငံတွေက အရှေ့တောင်အာရှနိုင်ငံတွေပဲ။ Made in China တံဆိပ်တွေခွာပြီး Made in Asian နာမည်တွေနဲ့ အမေရိကားကို ပို့ကြလိမ့်မယ်။ ဒါက တရုတ်ကြီးလုပ်နေကြအလုပ်မို့ မခက်ခဲ။ မြန်မာအစိုးရလည်း လုပ်စားတတ်ရင် အလုပ်ဖြစ်မဲ့သဘော။

တရုတ်ယွမ်ငွေ ဈေးကျနေတာရယ်၊ လုပ်ခလစာ ကြီးမြင့်တာရယ်၊ ပတ်ဝန်းကျင်ထိန်းသိမ်းရေးဥပဒေတွေ တင်းကျပ်တာရယ် စတဲ့အကြောင်းစုံကြောင့် ဂျပန်အပါအဝင် တောင်ကိုးရီးယား၊ တိုင်ဝမ် စတဲ့ အာရှသူဌေးလုပ်ငန်းရှင်တွေက စက်ရုံတွေကို ဗီယက်နမ်ဆီ ရွှေ့နေကြပြီ။ မြန်မာကတော့ အလုပ်သမားပြသနာတွေ၊ ဥပဒေမခိုင်မာမှုတွေ၊ လျှပ်စစ်၊ ရေ၊ မီး၊ သယ်ယူပို့ဆောင်ရေး အားနည်းမှုတွေ၊ ခုထိ အမြစ်တွယ်နေဆဲ အကျင့်ပျက်ခြစားမှုတွေကြောင့် လုပ်ငန်းရှင်တွေ လက်ရှောင်နေဆဲမို့ အရမ်းကိုနစ်နာတယ်။ တရုတ်အခက်၊ မြန်မာအချက်ဆိုပြီး လုပ်စားတတ်ရင် အခွင့်ကောင်းအခါကောင်းပဲ။

မြန်မာ့စီးပွားရေးအတွက် Trade War ဟာ ကောင်းသောလာခြင်းဖြစ်ပါစေဟု မျှော်လင့်လျှက်ပါ။

ချစ်တဲ့

မောင်လူပေ