ပန်းပန်နေဆဲ ကိုဒေါ်လာ
ဒေါ်လာကတော့ ပန်းပန်လျှက်ပါဆိုပြီး ရေးခဲ့တာ တစ်လပြည့်တော့မယ်။ မြန်မာငွေဈေးထိုးကျသွားပြီး တစ်ဒေါ်လာကို ၁၄၀ဝဖြစ်သွားချိန်မှာရေးခဲ့တာပါ။ တစ်လနီးပါးဖြစ်လာတဲ့ အခုအချိန်မှာတော့ မြန်မာငွေဈေးက ၁၄၂၀တဲ့။ ဒေါ်လာက ဆက်ပန်းပန်နေပြီး တရုတ်ယွမ်က ဆက်ပြီးကျနေလို့ပေါ့။
တရုတ်ယွမ်က ဒေါ်လာတို့ ယူရိုတို့လို နှုန်းရှင်သတ်မှတ်ထားတာမဟုတ်ဘူးဗျ။ တရုတ်ဗဟိုဘဏ်က ဈေးသတ်မှတ်ပေးတာ။ ဆိုတော့ တရုတ်ဗဟိုဘဏ်သတ်မှတ်ဈေးဟာ ပေါက်ဈေးပဲ။ ကုန်သွယ်ရေးစစ်ပွဲကြောင့် အမေရိကန်သမ္မတထရန့်က တရုတ်ပို့ကုန်အားလုံး ဒေါ်လာ (၅၀၅)ဘီလီယံဖိုးကို သီးခြားအခွန်ကောက်မယ်လို့ ချိမ်းခြောက်ထားတယ်။ ဒါကြောင့် အမေရိကားမှာ သူပစ္စည်းတွေ အရမ်းဈေးမတက်အောင် ငွေဈေးကိုဆွဲချထားပုံရတယ်။
တရုတ်ငွေဈေးကြတာ တရုတ်ကုန်တွေ ဈေးပေါပေါနဲ့ရောင်းနိုင်တဲ့အမြတ်ထွက်တယ်။ ဒါပေမဲ့ တရုတ်ငွေကိုင်ထားသူတွေက ရောင်းထုတ်ပြီးပြေးကြမှာမို့ နိုင်ငံထဲကငွေတွေထွက်သွားမဲ့အရှုံးလည်းရှိတယ်။ ဈေးဆက်ချထားရင် ဖြစ်လာမဲ့ အကောင်းနဲ့အဆိုးက ဒွန်တွဲနေတယ်။
အမေရိကန်ဒေါ်လာဈေးတက်တော့ အမေရိကန်ပို့ကုန်တွေဈေးကြီးမယ်။ အဲဒါကြောင့် ထရန့်က အမေရိကန်ဗဟိုဘဏ်ရဲ့ အတိုးနှုန်းတက်တာကိုမကြိုက်ဘူး။ ဗဟိုဘဏ်က သီးခြားရပ်တည်နေတာမို့ ဘာမှလည်း ဝင်စွက်ဖက်လို့မရဘူး။ အဲဒါကြောင့် တွီတာကပဲ တရုတ်နဲ့ဥရောပက စီးပွားရေးအမြတ်ထုတ်နေပါတယ် ဘာညာနဲ့အော်လိုက်၊ ဗဟိုဘဏ်ကို အပြစ်တင်လိုက် လုပ်နေရရှာတယ်။ သူ့ရဲ့တွီတာကတွိတွေကြောင့် ဒေါ်လာနည်းနည်းလေးအားပျော့လာပေမဲ့ ခိုင်မာမှုကို လက်လျှော့မဲ့အရိပ်အရောင်မတွေ့သေး။
အမေရိကန်သမ္မတထရန့်ကသာ ပြသနာပေါင်းသောင်းခြောက်ထောင်နဲ့တိုင်ပတ်နေပေမဲ့ အမေရိကန်ဒေါ်လာက ပန်းပန်နေတာ အဲဒီနိုင်ငံရဲ့ ငွေကြေးစနစ်ရဲ့စနစ်ကောင်းမှုနဲ့ ခိုင်မာမှုကို လူတွေယုံကြည်နေကြဆဲမို့ပါ။ အမေရိကန်သမ္မတဘယ်သူတက်တက် စနစ်ကောင်းရှိနေတဲ့အတွက် စီးပွားရေးခိုင်မာမှုရှိနေဆဲ။
ရေရှည်မှာတော့ ဘယ်လောက်တောင့်ခံနိုင်မလဲဆိုတာ ဘယ်သူမှမသိ။ တရုတ်ယွမ်ကတော့ ဂျွမ်းထိုးဆင်းပြီး ကုန်သွယ်ရေးစစ်ပွဲကိုအသာစီးရဖို့ ကျိုးစားနေပြီ။ ကြားညှပ်တာကတော့ မြန်မာပေါ့လေ။ တရုတ်ကြီးနဲ့ အဓိကကုန်သွယ်ရလေတော့ ယွမ်ဈေးကျရင် မြန်မာငွေဈေးလည်း လိုက်ကျနေမှာပဲ။
ဒါကြောင့်မို့ မြန်မာငွေဈေးပြန်တက်ဖို့အတွက် တရုတ်ယွမ်ငွေပန်းပန်ပါစေလို့ဆုတောင်းပေးလိုက်ပါတယ်။
No comments:
Post a Comment