အမေရိကန်ပြည်ထောင်စု ဆန်ဖရန်စစ္စကိုတဝိုက်တွင် မှီတင်းနေထိုင်ကြသော မြန်မာပြည်ဖွားတရုတ်နွယ်များ မနည်းလှ။ ထောင်ချီရှိသည်။ ဒီနယ်တဝိုက်တွင်ရှိ မြန်မာရွှေ့ပြောင်းနေထိုင်သူများ၏ လေးပုံသုံးပုံခန့်လောက်မှာလည်း ဒီလူတွေပါပဲ။
ထိုမြန်မာတရုတ်များက နှစ်စဉ်လိုလိုပင် တရုတ်နှစ်သစ်ကူးပွဲတော်ကို ကျင်းပခဲ့သည်မှာ (၇)ကြိမ်အထိရှိခဲ့လေပြီ။ မကြာခင်ကြရောက်တော့မည့် ခွေးနှစ်သစ်ကိုလည်း ထုံးစံအတိုင်း ကျင်းပကြတော့မည်။
အရင်က တရုတ်နှစ်သစ်ကူးပွဲတခုအနေဖြင့် စုပေါင်းမကျင်းပနိုင်ခဲ့ကြ။ မိမိတို့ မိသားစုများ၊ ဆွေမျိုးများဖြင့်သာ သီးခြားစီ ကျင်းပခဲ့ကြသည်။ အခုနောက်ပိုင်းတော့ စုပေါင်းညီညာ အောင်ကြောင်းဖြာ ဆိုသော ခံယူချက်ကို လက်ကိုင်ထားသော ဆော်သြရေးသမား(organizer) တွေ၏ မလျှော့သော ကြိုးပမ်းမှုတို့ကြောင့် ယခုကဲ့သို့ နှစ်စဉ် ကျင်းပနိုင်ခဲ့ခြင်း ဖြစ်သည်။
အမေရိကန်ရောက် မြန်မာများ၏ဘဝက အလုပ်များကာ ပင်ပန်းကြသည်။ များသောအားဖြင့် ပထမမျိုးဆက်များသာ ဖြစ်ရကား ရရာအလုပ်နှင့် ရုန်းကန်နေရသူက အများစု။ ဆရာဝန်၊ အင်ဂျင်နီယာ စသည်ဖြင့် အသက်မွေးသူက လက်ချိုးရေတွက်နိုင်သည်အထိ နည်းသည်။ မြန်မာအမေရိကန်ပထမမျိုးဆက် ဆိုသည်ကား သူတို့၏ ဒုတိယမျိုးဆက်တွေ အတွက် လှုပ်ရှားရုန်းကန်နေရသောအခြေအနေမို့ ပထမအလုပ်ပြီးရင် ဒုတိယအလုပ်ဆိုသည်မှာ မဆန်းလှ။ နားချိန်မရှိ၊ အားချိန်နည်းလှသော ထိုထို မြန်မာနွယ်ဖွားများအတွက် ပျော်စရာဆိုသည်ကား ဘုန်းကြီးကျောင်းရန်ပုံငွေ သင်္ကြန်ပွဲနှင့် မြန်မာပြည်မှ ခေတ္တရောက်လာသူ နာမည်ကျော်အချို့၏ ဖျော်ဖြေပွဲတချို့သာ ရှိသည်။ထို့ကြောင့်လည်း ပွဲငတ်နေသူမြန်မာနွယ်ဖွားများအတွက် ရေငတ်နေတုန်း ရေတွင်းထဲကြသည့်အလား။
မြန်မာပြည်ဖွားတရုတ်အမျိုးသားတွေမို့ မြန်မာပြည်အတွက်ဆို ရှေ့တန်းက ပါဝင်လှူတန်းကြသူတွေဖြစ်၏။ လူမှုရေး၊ ဘုန်းကြီးကျောင်းရေး၊ သဘာဝဘေးကူညီရေး စသည်ဖြင့် ရန်ပုံငွေပွဲတွေ လုပ်လေတိုင်း ရှေ့ဆုံးက ကူညီကြ ဝိုင်းကြဝန်းကြသူတွေကို ကြည့်လျှင်လည်း ဒီလူတွေက အမာခံတွေပါ။
မြန်မာပြည်မှာမွေးတော့ မြန်မာပြည်ကိုချစ်သည်။ မြန်မာစာကြိုက်သည်။ မြန်မာစကားပြောရမှ အားရကြသည်။ ပြီးတော့ မြန်မာသီချင်းဆိုရတာ နားထောင်ရတာကိုလည်း ကြိုက်ကြပါသည်။
ပွဲတခုလုပ်ဖို့အတွက် ငွေအင်အား၊ လူအင်အားစိုက်ထုတ်နိုင်သူ၊ လုပ်အားပေးနိုင်သူ၊ ကမကထပြုနိုင်သူတွေ လိုမည်မှာပြောစရာမလို။ ထိုသူတွေက ဆန်ဖရန်စစ္စကိုတရုတ်နှစ်သစ်ကူးပွဲတော်ကို အောင်မြင်စွာ ကျင်းပနေခြင်းပင်။ အကျွေးအမွေးအလျှံပယ်။ သက်ကြီးပူဇော်ပွဲ၊ ကလေးများဂုဏ်ပြုပွဲပင် ပါလိုက်သေး၊ ဝင်ကြေးကား အခမဲ့။
ဖရီးမောင့်တဝိုက်တွင် ကိုအေးချို၊ မလှလှဝင်းတို့ ဇနီးမောင်နှံကို မသိသူမရှိ။ နတ်ဖက်တဲ့စုံတွဲလို့ ပြောရလောက်အောင် ရှေ့သွားနောက်လိုက်ညီသည့်အပြင် ဂီတဝါသနာကပါ တထပ်တည်းပင်။ ကိုအေးချိုက အတီးသမား၊ သူ့ဇနီးက အဆိုရှင်။ သူတို့မောင်နှံ၏ စင်မြင့်ပေါ်က နှစ်ကိုယ်တူချစ်သမျှ သီချင်းကို အဝေးကသာ ကြားရလျှင် ရန်အောင်နှင့်ဟေမာဟုပင် ထင်ကြလိမ့်မည်။
မြန်မာပြည်မှာရှိစဉ်ထဲက တရုတ်အမျိုးသားတီးဝိုင်းတွင် တီးခဲ့ဆိုခဲ့ကြသည့် သူတို့မောင်နှံက တောင်ငူမြို့ ဟုတ်ဝမ်ဘုရားကျောင်းရာပြည့်ပွဲအထိ လာရောက်ဖျော်ဖြေခဲ့ဖူးကြောင်း သိရသောအခါ တောင်ငူသားနဲ့ရန်ကုန်သား တသားတည်း ဖြစ်သွားတော့သည်။အခုတော့ ဖရီးမောင့်သားတွေဘဝနဲ့ပေါ့။
ကိုအေးချိုတို့လို ဂီတဝါသနာပါကြသူ မြန်မာတရုတ်နွယ်ဖွားများလည်း မနည်းလှပါ။ ကိုဂျိန်းနှင့် မမွှေးတို့ ဆိုလည်း ဝါသနာတူ အတွဲ။ သီချင်းတွေဆိုကြ၊ ကကြ၊ ပျော်ကြ။ ပြေတီဦးနှင့် အိန္ဒြာကျော်ဇင်နှယ်။ အားလုံးက အားကျရသည့်အတွဲ။ ဒီလိုအတွဲတွေအများသား။ မမြမြဝင်းတို့ကိုမင်းနိုင်တို့အတွဲ၊ ကိုနန္ဒ မဥမ္မာ၊ မမိမိခိုင်တို့စုံတွဲ၊စသည်နှင့်။ အဆိုကျော်စုံတွဲတွေ ပေါသောအရပ်။
အတီးပညာရှင်ချည်းပင်လည်း တီးဝိုင်းသုံးဝိုင်းစာ ရှိသည်။ အဆိုပညာရှင်မိုက်ခဲများကား ရာချီ။ ထိုထိုသော နယ်ခံ အဆိုကျော်အပေါင်းတို့၏ တေးသံသာများကိုလည်း အခမဲ့ နားသောတ ဆင်နိုင်ကြမည့်ပွဲတခုပါ။
တရုတ်နွယ်ဖွားတွေမို့ သနဲ့တမကွဲတာလေးတော့ ရှိတတ်ပါသည်။ တခါက ဒီအကြောင်းကို တံတာတာတေးတံတာ အမည်ဖြင့် ရေးခဲ့ဖူးသည်။ ချစ်ခြင်းမျက်စိဖြင့် ကြည့်တတ်လျှင်တော့ အပြစ်ဟူသမျှ မြူမှုန်မျှပင် မြင်မည်မထင်ပါ။
ကိုအေးချိုတို့၊ ကိုဂျိမ်း မမွှေးတို့လို အော်ဂနိုက်ဇာတွေကျေးဇူးကြောင့်သာ အောင်မြင်သော တရုတ်နှစ်သစ်ကူးပွဲတော်ကို အားလုံးပျော်ရွှင်စွာ ဆင်နွဲနိုင်ကြခြင်းဖြစ်သောကြောင့် ကိုအေးချိုနှင့်တကွ ပွဲဖြစ်မြောက်ရေးစီစဉ်သူ အော်ဂနိုက်ဇာများအား လှိုက်လှဲစွာ ကျေးဇူးတင်ကြောင်း ပြောကြားလိုပါသည်။နှစ်စဉ်နှစ်တိုင်းလည်း ဒီလိုနှစ်သစ်ကူးပွဲတော်တွေ ဆက်လက် ဆင်နွဲနိုင်ပါစေကြောင်း တောင်းဆုပြုပါသည်။
ယခုလာမည့် မတ်လ(၁၀)ရက်နေ့တွင် ကျင်းပမည့် မြန်မာပြည်ဖွားတရုတ်အမျိုးသားများ၏ တရုတ်နှစ်သစ်ကူးပွဲတော်သို့လည်း ဘာသာမရွေး လူမျိုးမရွေး အိမ်ဆူးဆို့ ကလေးလက်တို့ ခွေးအို့အို့ ဆိုသည့်နှယ် တပျော်တပါး လာရောက်အားပေးကြပါရန် မိတ်ဆွေသူငယ်ချင်း ရောင်းရင်းအပေါင်းအား ဖိတ်ကြားအပ်ပါသည် ခင်ဗျား။
ချစ်ခြင်းအားဖြင့်
မောင်လူပေ
No comments:
Post a Comment