အားလည်းနာတယ်၊ ခင်လည်းခင်တယ်။ (၃)
' ရွှေနိုင်ငံ' တဲ့။
ရွှေစေတီတွေဝင်းနေတဲ့ မြန်မာပြည်ကို ရွှေနိုင်ငံဟု တင်စားသည်။ မြန်မာတွေကတော့ သူတို့ကိုယ်သူတို့ 'ရွှေ' တဲ့။ မြန်မာတွေ ရွှေခေတ်မှာ ရွှေထီးဆောင်းနေဆဲဟု သင် ထင်ပါသလား။
မြန်မာတွေမညံ့ပါ။ တချိန်တုန်းကရွှေခေတ်ဖြစ်ခဲ့သည်။ နောက်ပိုင်းမှာတော့ ခေတ်စနစ်တွေညံ့ခဲ့သည်။ အုပ်ချုပ်သူတွေညံ့ခဲ့သည်။ အထွေထွေညံ့ဖျင်းမှုတွေကြာလာတော့ မြန်မာတွေ လူလုံးမလှ ဖြစ်လာကြသည်။ မြန်မာနှင့် ရွှေခေတ်ကား ကွာလှမ်းခဲ့သည်မှာ အနှစ်ခြောက်ဆယ်နီးပါး ရှိနေပေပြီ။ မြန်မာတွေ ရွှေမဖြစ်တော့သည်မှာ ကြာခဲ့ပြီကော။
ထောက်ချုပ်ပြုတ်ကြီး၏ အင်တာဗျူးတစ်ခု ကြည့်လိုက်ရ၏။ ရှေးဟောင်းပုဂံဘုရားတွေကိစ္စမေးခွန်းတွေဖြေရင်း ' ဘုရားပြင်ရင် ရွှေချရမှာပေါ့၊ တို့က ထေရဝါဒဗုဒ္ဓဘာသာဝင်တွေ။ ' ဟု ဖြေကြားသွားသည်လည်း ကြားခဲ့ရသည်။ ထေရဝါဒဗုဒ္ဓဘာသာစစ်ဖို့ ဘုရားရွှေချဖို့လိုသည်ဟု ထင်မှတ်နေပုံရ၏။ ဒီမိုး ဒီရေ ဒီလူတွေနှင့် ဒီနိုင်ငံကြီးလည်း ဒီဘဝရောက်ခဲ့ရသည်မှာမဆန်းလှပါ။
ထေရဝါဒဗုဒ္ဓဘာသာသည် ဗုဒ္ဓဟောကြားခဲ့သောလမ်းစဉ်တရားတော်အတိုင်း ထေကြီးဝါကြီးအစဉ်အဆက်က ထိန်းသိမ်းလိုက်နာလာခဲ့သည့်လမ်းစဉ်ဟု ဆိုလို၏။ ဗုဒ္ဓဘာသာသည်ရုပ်ထုကို ကိုးကွယ်သော သာသာမျိုးမဟုတ်။ သက်ရှိထင်ရှားဘုရားကို အာရုံယူရန် အထောက်အပံ့တစ်ခုမျှသာဖြစ်သော အကြင်စေတီ၊ ပုထိုး၊ ရုပ်ပွားတော်တို့သည်ကလည်း ဗုဒ္ဓခေတ်နောက်ပိုင်း နှစ်သုံးရာနီးပါးအကြာ သီရိဓမ္မာသောကမင်းကြီးလက်ထက် အချိန်အထိ မရှိခဲ့သေး။ ဓမ္မစကြာင်္တရားကို ကိုယ်စားပြုသည့် လှည်းဘီးပုံသဏ္ဍာန်ကိုသာ တရားအထိမ်းအမှတ်အဖြစ် ပူဇော်ခဲ့ကြသည်ဟု မှတ်သားဖူးသည်။
'ရွှေကျောင်းပြောင်ပြောင် ဝမ်းခေါင်ခေါင်' တဲ့။ မောင်လူပေတို့၏ ရွှေနိုင်ငံကား သည်စကားပုံနှင့် သိပ်မထူးလှ။ အိမ်နည်းချင်းနိုင်ငံများမှာ ရောက်ရှိနေကြပြီးဖြစ်သော ရောက်လာနေဆဲဖြစ်သော ရွှေ့ပြောင်းအလုပ်သမားများကား နိုင်ငံကိုမချစ်သောကြောင့် နိုင်ငံပြင်ပထွက်ပြီးအလုပ်လုပ်နေကြသည်ဟု ထင်မှတ်ပါသလား။ ရွှေကျောင်းထဲမှာ ဝမ်းခေါင်လှ၍ ဝမ်းရေးကိုဖြေရှင်းရန် ဒုက္ခတွေခါးစည်းခံရင်း သူများနိုင်ငံတွေမှာ သူများမလုပ်ချင်သည့်အလုပ်ကို သူများအနှိမ်ခံပြီး လုပ်နေကြရသူက အများစုဖြစ်သည်ကို ပြောရန်မလိုပါ။ ထိုမြန်မာတွေက 'ရွှေ' တွေဟုဆိုလျှင် အကြင်နိုင်ငံသားများက 'စိန်' တွေဟု ဆိုရန်သာရှိတော့၏။
ရွှေနိုင်ငံကား စေတီပုထိုးတွေပေါ၏။ ဘုရားကျောင်းတွေလည်းပေါ၏။ ပလီတွေလည်းပေါ၏။ ဘာသာရေးလိုက်စားသူလည်းပေါများ၏။ စစ်ပွဲတွေလည်းပေါများ၏။ ရန်ပွဲတွေလည်းပေါများ၏။ အဆဲကလည်း သန်ကြ၏။ ဘာသာရေးမှာရွှေဖြစ်နေသော်လည်း စိတ်ဓါတ်ရေးရာမှာ ရွှေဖြစ်ဖို့လိုနေဟန်တူသည်။
နိုင်ငံရပ်ခြားတွေမှာ အခြေချသူများကို ကြည့်မိသည်။ လူနည်းစဉ်မှာ စည်းရုံးကြသော်လည်း အနည်းငယ်မျှ များလာသည်နှင့် ကွဲကြတော့၏။ ကိုယ်တိုင်က ဦးမဆောင်နိုင်၍ နောက်လိုက်ကောင်းဖြစ်ရန်ကျိုးစားသူက အနည်းစု။ ဘေးထိုင်ဘုပြောသူများလာတော့ ဦးဆောင်သူတွေ နောက်ဆုတ်ကုန်ကြသဖြင့် မြန်မာကွန်မြူနတီတွေမှာ စလုံးရေစ အဆင့်က မတက်နိုင်။ နှစ်ခြောက်ဆယ်နည်းပါး အသင်းအဖွဲ့များဖွဲ့စည်းခွင့်ကို ကန့်သတ်ခံခဲ့ရသူများပီပီ အများနှင့်ပူးပေါင်းလုပ်ဆောင်မှုမှာ အားနည်းကြသည်မို့လည်း အပြစ်ပြောရန်ခက်လှ၏။
ဘာသာရေးကိုဦးစားပေးသောနိုင်ငံတွေ၊ အမျိုးသားရေးကို ဦးစားပေးသောနိုင်ငံတွေကား ဆင်းရဲလှ၏။ လူကို လူလို တန်ဖိုးထားသော နိုင်ငံတွေသာ ထိပ်တန်းရောက်နေကြသည်။ စိတ်ထားတွေ ' ရွှေ' ဖြစ်ခဲ့သဖြင့် နိုင်ငံတွေပါ ရွှေဖြစ်ခဲ့ကြ၏။
အာဏာရှင်တို့သည် သူတို့၏ အကြွင်းမဲ့အာဏာ တည်တံ့ခိုင်မြဲရေးအတွက် ဘာသာရေးနှင့် အမျိုးသားရေးကို ခုတုံးလုပ်ခဲ့ကြသည်။ အမျိုးသားရေး၊ ဘာသာရေးတွေ ဆိုသည်ကလည်း လူကြိုက်လွယ်သော လှုံ့ ဆော်ရေးဖြစ်ရကား ထောက်ခံမှုတွေရကြပြီး အာဏာရှင်တွေ ဖြစ်လာကြသည်။ အာဏာက လူကို အကြွင်းမဲ့ဖျက်ဆီးခဲ့လေရကား သူတို့တွေကောင်းမှုဖြင့် ထိုထိုနိုင်ငံတွေလည်း ဆင်းရဲတွင်းက မတက်နိုင်ကြတော့။ နှစ်ပေါင်းတွေကြာလှမှပဲ အဖြစ်မှန်ကို ရိပ်မိကြတော့ နိုင်ငံက fail state ဘဝကို ဦးတည်နေလေပြီ။ ရွှေနိုင်ငံဖြစ်ဖို့ ကျွေးကျော်ရင်း ရွှံ့နိုင်ငံ ဖြစ်မှန်းမသိ ဖြစ်နေလေပြီ။
အမှန်တကယ် ' ရွှေနိုင်ငံ' ဖြစ်ဖို့ မောင်လူပေတို့တွေ စိတ်ထားလေးတွေ ပြင်ဖို့သာလိုပါမည်။ အမျိုးဘာသာမခွဲခြားပဲ လူကိုလူလိုမြင်ဖို့ လိုပါမည်။ အကြမ်းဖက်သူကို အကြမ်းဖက်သူအဖြစ်၊ လူကောင်းကို လူကောင်းအဖြစ် ခွဲခြားမြင်တတ်ဖို့ လိုပါမည်။ အမျိုးဘာသာချီ၍ ဆဲဆိုနေကြခြင်းများသည် အမုန်းတရားတွေ ဝေလာစေဖို့သာရှိရကား ပန်းစကားတွေဝေဖို့လိုပါမည်။ မကောင်းသူကို မကောင်းသလို အပြစ်ပေးသလို ကောင်းသူကိုလည်း ကောင်းသလို ချီးမြှောက်တတ်ဖို့ လိုပါမည်။
ထိုအခါတွင်ကား အများအလယ်တင့်တည်သည့် ' ရွှေ' စိတ်ထားပိုင်ရှင် ' ရွှေနိုင်ငံ' သားတွေ ဖြစ်လာကြမည်မလွဲပါ။ ဘာသာလူမျိုးမခွဲခြားသော မြန်မာနိုင်ငံသားတွေကသာ ရွှေနိုင်ငံကိုတည်ဆောက်နိုင်မည်ဟု ထင်မြင်ယူဆမိပါကြောင်း။
မိတ်ဆွေသူငယ်ချင်းအပေါင်း ကျန်းမာချမ်းသာကြပါစေ။
အမှန်အကန် ရွှေနိုင်ငံဖြစ်ဖို့ မျှော်လင့်နေတဲ့
သင်တို့ရဲ့
ချစ်ခြင်းအားဖြင့်
မောင်လူပေ
No comments:
Post a Comment