ဝက်ဒုက္ခ

ဝက်ဒုက္ခ (ဝက်တုတ်ကွေးအကြောင်း)

ကြက်ဒုက္ခ ရေးပြီးတာမကြာသေး။ အခုတလော မြန်မာ့ဖေ့ဘုတ်သတင်းတွေမှာတော့ H1N1 Pandemic level ဆိုပဲ။ အွန်လိုင်းမှာ ဖွတဲ့သူကဖွ။ မသိသူတွေကလည်း ယုံပေါ့။ တိုင်းသူပြည်သားတွေကို အသိပညာပေးတာမဟုတ်ပဲ ကြောက်လန့်အောင် ရေးသားမှုမျိုးကိုတော့ ရှုံ့ ချပါတယ်။

အစိုးရကို အပြစ်ပုံချသူကချလို့။ ဒီလောက်ဆိုးနေတာတောင် မျက်ကွယ်ပြုထားတယ်။ ဖုံးဖိထားတယ်နဲ့ ကဲ့ရဲ့သူကကဲ့ရဲ့ကြလို့။ သတင်းမှားတွေကို ရှယ်တဲ့သူက ရှယ်။ Pandemic level ဆိုတာက ကူးစက်ရောဂါတစ်ခုခုဟာ ထိန်းမနိုင်သိမ်းမရနဲ့တကမ္ဘာလုံးကို ကူးစက်ပျံ့ပွားသွားနိုင်တဲ့အခြေအနေမျိုးကို ဆိုလိုပါတယ်။

ကျွန်တော် ဆရာဝန်မဟုတ်ပါဘူး။ ဒါပေမဲ့ သိသမျှလေးကို ပြောခွင့်ပြုပါ။ ကမ္ဘာပေါ်မှာ တုတ်ကွေးရောဂါအမျိုးမျိုးရှိပါတယ်။ ဗိုင်းရပ်ပိုး ( Virus) တွေက ကူးစက်တဲ့ရောဂါတွေပေါ့။ ဖြစ်လာရင် ယေဘူယျအားဖြင့် Anti virus ဆေးတွေပေးလေ့ရှိတယ်။ ဆေးပတ်လည်အောင် သောက်ကြရတယ်။ flu season ရောက်ရင် anti flu ထိုးဆေးတွေလည်း နှစ်တိုင်း ထိုးကြတယ်။ နှာခေါင်းကရှူတာလည်းရှိတယ်။ ဒီ flu shot လို့ခေါ်တဲ့ တုတ်ကွေးကာကွယ်ထိုးဆေးတွေဟာ နှစ်စဉ် flu season ရောက်တိုင်း ထိုးကြရတာဖြစ်ပေမဲ့ ဆေးတစ်မျိုးဟာ flu တုတ်ကွေးရောဂါ အားလုံးကို မကာကွယ်နိုင်ပါ။ တချို့ဆေးက ၇၅% တချို့ဆေးက ၆၀% တချို့ဆေးက ဒီရောဂါတစ်ခုတည်း စသည်နဲ့ ကာကွယ်နိုင်မှုတွေမတူကြ။

ဒါကြောင့် flu shot လုပ်ထားပေမဲ့လည်း တုတ်ကွေးမိရင်မိတတ်ပါတယ်။ ထိုးဆေးက မကာကွယ်တဲ့ တုတ်ကွေးမိတာ ဆိုပါတော့။ ကိုယ်ခံစွမ်းအားရဲ့ ခုခံမှုနဲ့ ဆေးတန်ခိုးတွေကြောင့် သုံးလေးရက်ဆိုရင် ပြန်ကောင်းကြတာများပါတယ်။ အသက်ငါးနှစ်အောက် ကလေးတွေ၊ အသက် ၆၅နှစ်အထက်လူကြီးတွေ၊ အခံမူလရောဂါတစ်ခုခု ရှိနေသူတွေ အတွက်သာ စိုးရိမ်ရပါတယ်။

H1N1 ဆိုတာ Swine flu လို့ခေါ်တဲ့ တုတ်ကွေးတစ်မျိုးပါ။ ဝက်တုတ်ကွေးလို့လည်း ခေါ်ကြတယ်။ ဝက်တွေဆီမှာ ဖြစ်တဲ့ရောဂါပိုးက လူတွေကို ကူးစက်ခဲ့တာလို့ဆိုတယ်။ မြန်မာပြည်မှာတော့ ကြက်တုတ်ကွေးနဲ့ မှားနေကြတုန်းပါ။ ကြက်တုတ်ကွေးကို H5N1. Avian influenza (flu) လို့ခေါ်တယ်။ ခွေးတုတ်ကွေး၊ မြင်းတုတ်ကွေး စသည်ဖြင့်လည်း ရှိပါသေးသတဲ့။

H1N1 swine flu ဝက်တုတ်ကွေးရောဂါဟာ ၂၀၀၉ ခုနှစ်မှာ မက္ကဆီကိုက စလိုက်တာ တကမ္ဘာလုံး လန့်ရတဲ့အထိ Pandemic level ဖြစ်ခဲ့ဖူးတယ်။ စုစုပေါင်း လူဦးရေ တစ်သောင်းရှစ်ထောင်ကျော် အသက်ဆုံးခဲ့ရဖူးတယ်။ (တချို့ကလည်း သိန်းချီသေတယ်လို့ ပြောကြတယ်။) ဒီလို အခြေအနေရောက်သွားတဲ့နေရာတွေမှာဆိုရင်တော့ ကျောင်းပိတ်၊ ရုံးပိတ်၊ ဈေးပိတ်၊ ခရီးသွားခွင့်ပိတ်နဲ့ isolated လုပ်ပြီး ထိန်းချုပ်ကြရပါတယ်။ အများဆုံးဖြစ်ပွားရာဒေသတွေက အာဖရိကနဲ့ အရှေ့တောင်အာရှတို့ပါ။

အခုမြန်မာပြည်မှာဖြစ်နေတာက အရေးပေါ်အခြေအနေမဟုတ်သေးတဲ့  ရောဂါပျံ့နှံ့ကာစ အခြေအနေမို့  H1N1 swine flu Outbreak လို့ခေါ်မှ မှန်ပါတယ်။စုစုပေါင်း ခြောက်ဦးသေဆုံးသွားပြီ။ ရောဂါပိုးတွေ့ထားသူ သုံးဆယ်ကျော်ရှိတယ်လို့ ဆိုပါတယ်။ ကျန်းမာရေးဝန်ကြီးဌာနက သတင်းတွေထုတ်ပြန်ပေးတယ်။ ပညာပေးရေးတွေလုပ်နေတယ်။ ပြည်သူတွေကလည်း ကြိုတင်ကာကွယ်နေကြတယ်။ WHO ကိုတောင် အကူအညီတောင်းထားတယ်။ ရောဂါကို ထိန်းချုပ်နိုင်ဖို့ အသည်းအသန်ကြိုးစားနေကြတယ်။  ဒီလိုကြောင့်လည်း WHO ရဲ့ ဌာနေကိုယ်စားလည် က " I am generally impressed." လို့ ခြီးမွန်းခဲ့တာ ဖြစ်မယ်။

H1N1 ဝက်တုတ်ကွေးရောဂါကလည်း ဝက်သားစားလို့ကူးစက်တာမဟုတ်ပါ။ လေထဲကနေပြီး အသက်ရှူလမ်းကြောင်းကတဆင့် ကူးစက်မှုကအများဆုံး၊ မသန့်ရှင်းတဲ့ လက်တွေတဆင့် ကူးစက်မှုက ဒုတိယ ပါတဲ့။ ဒါကြောင့် အပြင်ထွက်ရင် ခွဲစိတ်ခန်းသုံး နှာခေါင်းစီး ( surgery mask ) နဲ့သွားပါလို့ဆိုတယ်။ ဈေးကြီးတဲ့ နှာခေါင်းစည်းတွေနဲ့ ခွဲစိတ်ခန်းသုံးနှာခေါင်းစီးဟာ ရောဂါကာကွယ်ရေးမှာ သိမ်မကွာဘူးလို့ဆိုတယ်။ ဒုတိယကတော့ လက်ကိုစင်ကြယ်အောင်ဆေးဖို့ပါပဲ။

လက်ဆေးတဲ့နည်းကလည်း အမျိုးမျိုးရှိသေးရဲ့။ ရေဆေး၊ ဆပ်ပြာတိုက်၊ ရေပြန်ဆေး စုစုပေါင်း စက္ကန့်နှစ်ဆယ်ကြာရမယ်တဲ့။ Happy birthday သီချင်းကို စိတ်ထဲမှာဆိုကြည့်လို့ အစအဆုံးပြီးရင် စက္ကန့်နှစ်ဆယ်ပဲလို့လည်း အချိန်ရေတွက်ပုံကို ညွှန်းကြတယ်။

ကြက်တုတ်ကွေးကသာ ကြက်သားကို မကျက်တကျက် ချက်စားရာက ကူးတတ်တာပါ။ လုံးဝနူးသွားအောင် မီးပြင်းပြင်းနဲ့ ချက်စားလို့ရပါတယ်။ H5N1 ကြက်ငှက်တုတ်ကွေးမဖြစ်လာအောင် တုတ်ကွေးဖြစ်တဲ့ ကြက်ခြံတွေပိတ်၊ ကြက်တွေအကုန်ရှင်းနဲ့ ဆောင်ရွက်နေကြတယ်လို့လည်း သိရတယ်။

ကမ္ဘာရွာကြီးမှာ ရေမြေတွေကျဉ်းသွားပါပြီ။ တကယ်လို့သာ အရေးပေါ်အခြေအနေဖြစ်တဲ့ pandemic level ရောက်နေရင် ဘယ်နိုင်ငံကမှ ကြည့်မနေပါဘူး။ ချက်ခြင်းဝင်ရောက်ကူညီကြမှာပါ။ မြန်မာကနေ ကမ္ဘာကိုကူးစက်မဲ့ဘေးဆိုးကြီးတစ်ခု ဖြစ်လာတဲ့အထိ စောင့်ကြည့်နေကြမှာမဟုတ်။

ကျန်းမာရေးဌာနက တာဝန်ရှိသူဆရာဝန်တွေက ပညာပေးဆောင်းပါးတွေရေးပြီး အသိပညာပေးနေတာတွေ့ရလို့ဝမ်းသာရသလို လူမှုရေးစိတ်ဓါတ်ရှိတဲ့သူတွေ အသင်းအဖွဲ့တွေက နှာခေါင်းစီးတွေအခမဲ့ ဝေငှနေကြတာတွေ အွန်လိုင်းမှာ ဖတ်ရ မြင်ရလို့ နိုင်ငံရှေ့ရေးအတွက် အလွန်အားတက်မိပါတယ်။

ကျွန်တော်တို့မြန်မာနိုင်ငံက ဆင်းရဲတဲ့နိုင်ငံတစ်ခုပါ။ ငွေကြေးဆင်းရဲပေမဲ့ စေတနာတွေမဆင်းရဲကြဘူး။ ရိုင်းပင်းကူညီကြဖို့ မဆင်းရဲကြဘူး။ မေတ္တာ စေတနာတွေချမ်းသာကြပါတယ်။ လူမျိုးမရွေး၊ ဘာသာမရွေး မြန်မာပြည်မှာမွေးရင် မြန်မာတွေချည်းပါပဲ။

မိတ်ဆွေသူငယ်ချင်းများအပါအဝင် မြန်မာပြည်သူပြည်သားအပေါင်း ရောဂါအမျိုးမျိုး၊ ဘေးရန်အမျိုးမျိုးမှ ကင်းဝေနိုင်ကြပါစေ။

ချစ်ခြင်းအားဖြင့်

မောင်လူပေ